11 ALIKƆ̍RĪNTI 10
10
Ipɔ̍ɔli nyiyoko̍o yī u̍ku̍rɔ̍ yī nū
1Ami Ipɔ̍ɔli ɔlɔjā yɛ ma̍ ge̍ē ra̍ābɔ̄ yī lɛlā nūma̍ ē de ala̍ a̍nɛ. E̍ ka amɔ̍lɔ ge̍ hɔ̄ abɔ̍ɔ ba̍la ala̍ ma̍, amɔ̍lɔ ē lɛ du̍mɔ̍ɔ̍, lɛ mlɛ̍ɛ̍ lɛlā tāa ala̍. Amɔ̍lɔ ge̍ chī pīya hī ala̍ mɛ̍, amɔ̍lɔ ē lwɔhɔ̍hu̍ lɛlā tāa ala̍. N de ɔlɛdu̍mɔ̍ɔ̍ ba̍la lɛha̍ ɔmɔ̍ɔ̄ma̍ yī Ikra̍yisi ra̍ābɔ̄ de ala̍: 2Ala̍ e̍e ya̍ nīi n de lwɔhɔ̍hu̍ lɛlā tāa ala̍ yɛ̄grāa nīi n ge̍ē wā abɔ̍ɔ ma̍ ni̍. Wu̍chē oji̍ nɛ, n jo̍ōkū lēchi̍ lēchi̍ hīka n ge̍ē lwɔhɔ̍hu̍ lɛlā i̍ngɔ̍ɔ ē tāa āchɛ ɛla̍ā nīi yɛ ē ka hīka aɛ̍lɛ nūma̍ ɔ̍lɔ yɛ ē yɛ̍ɛ̄lā lɔkɔ nīi lɛlā ɔ̍lɔ ē hla̍ āchɛ̄ɛchɛ ji ma̍. 3Alɔ - āchɛ̄ɛchɛ yī yɛchɛ nūma̍ ichɛ̄ɛhi nɛ. Alɔ i̍ chī yɛ ē nunu nūma̍ bū la a̍hla̍ yī lɛlā yī āchɛ̄ɛchɛ ni̍. 4Ɛjālɛ̄wu̍ nīi alɔ bī la unu onōnu yī alɔ nūma̍ ma̍, i̍ ɛjālɛ̄wu̍ yī yɛchɛ nūma̍ ni̍. Ɛjālɛ̄wu̍ nīi Ɔwɔ de nīi lwɔhɔ̍hu̍ gba̍a̍ ge̍ē de wɔ̍gbrū yī lɛwu̍ chāajɛ ē mɛ ma̍ nīi alɔ bī a̍nɛ. Alɔ ē de ahu̍lɛ̄lā arīmɛ̄ wa̍a̍ ē chāajɛ. 5Alɔ ē de lɛlā ɛba̍achɛ ɔha̍lɔha̍ wa̍a̍ nīi nyɔ̄ ge̍ē gū ɔpɔ̄pū yī lɛlā ojo̍ōje̍ ka̍ka̍ yī Ɔwɔ ma̍ ē hi̍ya ē tāajɛ. Alɔ ē de ɛri̍ya̍ ogbōgbo ita ɛha̍lɛha̍ wa̍a̍ ku̍ pīya afiyɛ yī lɛwu̍, ya̍ nīi e̍ ē de otūlichō de Ikra̍yisi. 6Ala̍ ge̍ ya̍ otūlichō i̍ngɔ̍ɔ la olēchi̍ lēchi̍ mɛ̍, alɔ ē ti̍bi̍īyēchɛ̄ ya̍ tāa āchɛ nīi darɔ̄lɛhu̍ ma̍ bɛ̍ɛ̄nɛ̄.
7Lɔkɔ nīi lɛlā lɛ yɛchɛchɛ yī nū ma̍ nīi ala̍ yɛ ē ma̍ ɔ̄ a̍nɛ. Ɔ̄chɛ ɔha̍ abɔ̍ɔ lipu̍ yī ala̍ jo̍ōkū yɛ̍yɛ̍ hīka amɔ̍lɔ - ɔ̄chɛ yī Ikra̍yisi nɛ? Ɔ̍lɔma̍, ɔlɔjā ge̍ gba̍a jiya ūkpɔ̄tū yī nū ma̍ yɛ̍yɛ̍. Wu̍chē oji̍ nɛ, alɔ wa̍a̍ - āchɛ yī Ikra̍yisi lɔkɔ nīi anu̍ titi iyī alɔ ma̍ nɛ. 8N ge̍ bī wɔhu̍ nīi Ādā ɔlɔjā de de alɔ ma̍ yɛ ē gbogū bɔ̄ɔjɔ̄ɔ̄jā ma̍, o̍ i̍ lɛ u liwēyī iwēyī ni̍. Wɔhu̍ nīi o̍ de de alɔ ma̍, obī ala̍ jɛ̄ nɛ; i̍ ode ala̍ chāajɛ ni̍. 9N i̍ chikpo̍ nīi o̍ ge̍ē de ya̍ bɔ̄ɔjā nīi n yɛ ē tū ala̍ uhwi la īpū nīi n ta̍ tɛ̄rɔ̄ ma̍ ni̍. 10Ɔ̄chɛ ɔha̍ ge̍ē ka bɛ̍ɛ̄nɛ̄ hīka, īpū nīi Ipɔ̍ɔli ɔ̍lɔ ē ta̍ tɛ̄rɔ̄ hu aa̍ ma̍ ɔ̍lɔ ē lɛ bu̍wabu̍wa wɔhu̍ wɔhu̍ chɔ̍ɔ! Ɔ̍lɔ ge̍ chī hɔ̄ amu ba̍la aa̍ ma̍, ɔ̍lɔ chī lɛ bāa okwīkwī ma̍. Lɛlā nīi ɔ̍lɔ ē ka yɛ̄grāa ɔ̍lɔma̍ ma̍ ɔ̍lɔ i̍ chī ɔjɔ̄jā ni̍ 11Ɔ̄chɛ ɔ̍lɔma̍ ge̍ jo̍ōkū gɛ hīka, ɔjā nīi alɔ ē ka la īpū tɛ̄rɔ̄ yɛ̄grāa nīi alɔ i̍ hɔ̄ abɔ̍ɔ ni̍ ma̍, ba̍la ɔjā nīi alɔ ē ka yɛ̄grāa nīi alɔ hɔ̄ abɔ̍ɔ ma̍ i̍ hɔ̄ɔ̄hɔ̄ ni̍.
12Ɔjā ūkpo̍he, alɔ i̍ ge̍ē bɔ̍ɔ̄tū de iyī alɔ ē lā kɛ̄ɛ ē nīi iyī alɔ ē kwichi̍ tāa āchɛ ɛha̍ nīi nāa iyī wā ke̍ke̍ni̍ ma̍ ni̍. Ali̍bobo āchɛ! E̍ ē pi ɔgulɛ̄lā yī aa̍ ɛlɛjā lā, miya iyī aa̍ ɛlɛjā la anu̍. E̍ ē hlɛ̍ɛ̄pɔ̄ yī aa̍ ɛlɛjā gala ɔgɔgu yī lɛlā yī aa̍ ɛlɛjā ɔ̍lɔma̍. 13Lɛlā obī gbogū yī alɔ ma̍ i̍ ge̍ē gla ɔgu ē ta̍ ni̍; o̍ ge̍ē tū lipi̍pu̍ yī ɔgu yī u̍ku̍rɔ̍ nīi Ɔwɔ de lā de alɔ ke̍e̍ ma̍. U̍ku̍rɔ̍ nīi alɔ yɛ ē ya̍ la olo̍ōlo̍ yī ala̍ ma̍ tū abɔ̍ɔ i̍ngi̍ngɔ̍ɔ. 14Wu̍chē lɔkɔ nīi ala̍ tū lipu̍ yī ɔgu ɛla̍ā ma̍, alɔ bī Wɔ̄kā Ɔlwɔnyɛ yī Ikra̍yisi wā dikpo̍ba̍ ala̍ ma̍, alɔ i̍ gla ɔgu ɛla̍ā ta̍ ni̍. 15Wu̍chē yī ɔla̍ā, alɔ i̍ ē bī u̍ku̍rɔ̍ nīi āchɛ ɛha̍ ya̍ gla ɔgu nīi Ɔwɔ de lā de alɔ ta̍ ma̍ yɛ ē gbogū ni̍. Ɔkɔkɔ ɔla̍ā, alɔ yɛ ē deyīche hīka ɔtū ode che Ɔwɔ yī ala̍ ge̍ē jɛ̄ hwɔhi hwɔhi. Bɛ̍ɛ̄nɛ̄ ma̍, alɔ ge̍ē lwɔhu̍ ē ya̍ u̍ku̍rɔ̍ gba̍a̍ ē gāa iyɔ̄bū iyɔ̄bū abɔ̍ɔ la olo̍ōlo̍ yī ala̍. Alɔ chī ge̍ē ya̍ la lipi̍pu̍ yī ɔgu nīi Ɔwɔ de lā de alɔ ke̍e̍ ma̍. 16O̍bū ma̍, alɔ ge̍ē bī Wɔ̄kā Ɔlwɔnyɛ yī Ikra̍yisi ē gāa ɔcha ɛha̍ abɔ̍ɔ la iyɔ̄bū yī ala̍ bɛ̍ɛ̄nɛ̄. Alɔ i̍ ge̍ē bī u̍ku̍rɔ̍ yī ɛbɛ yī ɔ̄chɛ ɔha̍ nīi o̍ de yɔ̍ɔ̄ya̍ ma̍ ē gbogū ni̍.
17O̍ lɛ lɔkɔ nīi Īpū yī Ɔwɔ ka ke̍e̍ ma̍: “Ɔ̄chɛmɔ̄chɛ nīi ge̍ chikpo̍ ge̍ē bī lɛlā gbogū, o̍ ge̍ bī lɛlā nīi Ādā ɔlɔjā ya̍ ma̍ gbogū.” 18Wu̍chē oji̍ nɛ, Ādā ɔlɔjā ge̍ gbɛri̍ya̍ ka ɔ̄chɛ i̍ngɛ̍ɛ̄nɛ̄ ɔ̍lɔ hwɔhi, anu̍ nīi o̍ re̍ka ɔlɔjā hwɔhi a̍nɛ; i̍ yɛ̄grāa nīi ɔlɔjā gbɛri̍ya̍ ka anɔ̍lɔ hwɔhi ma̍ ni̍.
လက္ရွိေရြးခ်ယ္ထားမွု
11 ALIKƆ̍RĪNTI 10: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)