11 ALIKƆ̍RĪNTI 8
8
Ɔjā ɔdɔ̄da yī Āchɛ yī Ikra̍yisi
1Aɛ̍nɛ̍, alɔ chikpo̍ nīi ala̍ ge̍ē jo̍ōkū lɔkɔ nīi uhwa ɔnɛ̄ɛhɛhi yī Ɔwɔ ya̍ u̍ku̍rɔ̍ abɔ̍ɔ la ogrēeyī yī āchɛ yī Ɔwɔ nīi hɔ̄ la Imɛsɛdo̍niya ma̍. 2Ɔmama̍ ɔlwɔhɔ̍hu̍ hɔ̄ de wa̍ kpɛ̍ɛji bū la akanya ɛla̍ā wa̍a̍ nīi e̍ tū la anu̍ ma̍. Ɔwɔ̄wīyā yī wā chī lɔ̄kū kpɛ̍ɛ nīi e̍ wīyābɔ̄ de ɔjā kpɛ̍ɛ bāa ɔyaya ma̍, e̍ gbōgbyeklo̍ nyaa ma̍. 3Lēchi̍, e̍ de kpɛ̍ɛ lɔkɔ nīi wɔhu̍ yī wā yɛ ge̍ ba̍ ma̍. E̍ u̍tu de gla wɔhu̍ yī wā ta̍. E̍ ya̍ i̍ngɔ̍ɔ la ūkpɔ̄tū yī aa̍ ɛlɛjā. 4E̍ nōnuni̍ ra̍ābɔ̄ de alɔ ka aɛ̍lɛ ge̍ē twɔ̄bɔ̄ la ɔjā ode ge̍ tū āchɛ yī Ɔwɔ nīi gblāa la Ijudi̍ya ma̍ wɔbɔ̄. 5Alɔ i̍ deyīche i̍ngɔ̍ɔ ɔ̄kū ni̍ lachi̍lachi̍. E̍ tu̍ hī iyī aa̍ ɛlɛjā wa̍a̍ de Ādā mɛ̍. Bū lɔkɔ nīi Ɔwɔ ɔlɔjā chikpo̍ ma̍, e̍ chī gba̍a tu̍ hī iyī aa̍ ɛlɛjā wa̍a̍ de alɔ i̍ngi̍ngɔ̍ɔ. 6Wu̍chē yī ɔla̍ā, alɔ ka de Ita̍yi̍tɔ̄ɔsi nīi wu̍tu yī u̍ku̍rɔ̍ yī ɔjā ɔdɔ̄da nūma̍ ma̍ hīka o̍ ge̍ īcha la anu̍. O̍ ge̍ wā ge̍ tū ala̍ wɔbɔ̄ hɛ̄ɛbɛ nīi u̍ku̍rɔ̍ yī ohiyumɔtū nūma̍ ge̍ de ngmɛ̍rɛ̍ la ɔgɔ̄grāa. 7Ala̍ ma̍ gbwɔdu la ɔjāha̍ ɔjāha̍ wa̍a̍: Ɔtū ode che Ɔwɔ, lɛlā ɔkɔ̄ka, ochi̍chi̍ yī lɛlā ojo̍ōje̍, ochi̍kpo̍ ge̍ twɔ̄bɔ̄ la ɔjāha̍ ɔjāha̍ wa̍a̍ ba̍la ɔhɔtū nīi alɔ hī ala̍ ma̍. Wu̍chē yī ɔla̍ā, alɔ chikpo̍ nīi ala̍ titi ge̍ wīyābɔ̄, de ɔjā yayaya lipu̍ yī u̍ku̍rɔ̍ yī ohiyumɔtū nūma̍. 8I̍ lihɔ ɔha̍ nīi n yɛ ē tōtū a̍ni̍. Onūma̍ nīi n yɛ ē chabɔ̄ lɔkɔ nīi āchɛ ɛha̍ chikpo̍ ge̍ē twɔ̄bɔ̄ ma̍, n ya̍ i̍ngɔ̍ɔ hɛ̄ɛbɛ ge̍ē jo̍ōkū lɔkɔ nīi ɔhɔtū yī ala̍ lɛ la olēchi̍ lēchi̍ ma̍. 9Je̍ka aa̍ ala̍ jo̍ōkū yī uhwa ɔnɛ̄ɛhɛhi nīi Ādādā yī alɔ, Iji̍sɔ̄ɔsi Ikra̍yisi ɔlɔjā lɛ ma̍. O̍ gbwɔdu kpɛ̍ɛji; o̍ chī de iyī nū pīya olyeklo̍ wu̍chē yī ala̍. O̍ ya̍ i̍ngɔ̍ɔ hɛ̄ɛbɛ ge̍ē ya̍ nīi ala̍ ē de ē gbwɔdu bū la yeklo̍ yī nū nīi o̍ gbo ma̍.
10Lɔkɔ nīi n gbɛri̍ya̍ nīi ala̍ ge̍ē ya̍ ma̍ hɔ̄ ma̍ bɛ̍ɛ̄nɛ̄ a̍nɛ: O̍ hwɔhi lɛbɛ nīi ala̍ ge̍ kwɛ̍ɛjī la ɔjā nūma̍ nīi ala̍ wu̍tu yī nū lɛ̍ɛla̍mā ma̍ bɛ̍ɛ̄nɛ̄. Ala̍ yɔbɔ̄ɔbū chikpo̍ ge̍ē ya̍ i̍ngɔ̍ɔ a̍nɛ; ala̍ chī gba̍a yɔbɔ̄ɔbū ya̍ i̍ngɔ̍ɔ a̍nɛ. 11Ala̍ īcha la anu̍ nīi ala̍ ge̍ kwɛ̍ɛjī la anu̍ gɛ. Lɔkɔ nīi ala̍ chikpo̍ lēchi̍ lēchi̍ ge̍ē twɔ̄bɔ̄ nīi ala̍ miya ma̍, ala̍ ā kwɛ̍ɛjī la anu̍ gala ɔgɔgu ɔla̍ā gɛ. Ɔjā nīi ala̍ lɛ ma̍ nīi ala̍ ge̍ē de a̍nɛ. 12Ala̍ ge̍ chikpo̍ ge̍ē de ɔjā i̍ngɔ̍ɔ, lɔkɔ nīi ala̍ lɛ ge̍ē de ma̍ nīi Ɔwɔ ge̍ē nāa a̍nɛ. I̍ onīi ala̍ i̍ lɛ ge̍ē de ni̍ ma̍ ni̍.
13N i̍ yɛ ē de iho̍ ɔlyɛnɛ̍nu̍ ē che ala̍ hɛ̄ɛbɛ nīi iyī āchɛ ehēhī ge̍ē lɛ fle̍fle̍ ē de wa̍ ni̍. Ɔya̍ nīi o̍ gɔ̄grāa la oe̍ ɔha̍lɔha̍ wa̍a̍ nɛ. 14U̍ma̍ama nīi ala̍ lɛ ɔjā mwɛbɛ ma̍, o̍ ngma̍ nīi ala̍ ē tū āchɛ ɛla̍ā nīi i̍ lɛ ni̍ ma̍ wɔbɔ̄. Yɛ̄grāa nīi aa̍ ge̍ chī lɛ mwɛbɛ nīi ala̍ i̍ lɛ ni̍ mɛ̍, e̍ ē tū ala̍ wɔbɔ̄ bɛ̍ɛ̄nɛ̄. Ɔla̍ā - ɔya̍ nīi o̍ gɔ̄grāa la oe̍ ɔha̍lɔha̍ wa̍a̍ nɛ. 15Lɔkɔ nīi Īpū yī Ɔwɔ ka ma̍:
“Ɔ̄chɛ nīi kpo̍ mwɛbɛ ma̍,
onīi o̍ lɛ ma̍ i̍ de mwɛbɛ ɔ̄kɔ̄kū ni̍.
Ɔ̄chɛ nīi chī kpo̍ pi̍nyɛ̍ ma̍,
onīi o̍ lɛ ma̍ i̍ de ya̍ pi̍nyɛ̍ ɔ̄kɔ̄kū ni̍.”
Ita̍yi̍tɔ̄ɔsi ba̍la alikpɛ̍ɛ yī nū
16Alɔ da Ɔwɔ o̍be gba̍a̍ wu̍chē lɔkɔ nīi o̍ ya̍ nīi Ita̍yi̍tɔ̄ɔsi yɛ ē chikpo̍ lēchi̍ lēchi̍ ge̍ē tū ala̍ wɔbɔ̄ lɔkɔkɔ nīi alɔ titi chikpo̍ ge̍ē ya̍ ma̍. 17Alɔ ka de ɔ̍ hīka o̍ ge̍ wā dikpo̍ba̍ ala̍ ma̍, o̍ chɛ̄. O̍ i̍ gba̍a i̍ngɔ̍ɔ ke̍e̍ ni̍, anu̍ ɔlɔjā chikpo̍ ge̍ē wā dikpo̍ ē ba̍ ala̍ la abɔ̄ yī nū ke̍e̍ a̍nɛ. 18Ɔɔ̍nɛ̍ yī alɔ ɔla̍ā nīi ro̍ohohu la ogrēeyī yī āchɛ yī Ɔwɔ mɔri̍mɔri̍ wu̍chē yī u̍ku̍rɔ̍ yī nū nīi re̍ka wɔ̄kā yī lɛlā yī Ɔwɔ ɔkɔ̄ka ma̍, alɔ de ɔ̍ tɛ̄rɔ̄ ba̍la Ita̍yi̍tɔ̄ɔsi yɛ abɔ̍ɔ yewā. 19I̍ ɔla̍ā ɔla̍ā ke̍e̍ ni̍, ogrēeyī yī āchɛ yī Ɔwɔ mɔri̍mɔri̍ de abɔ̄ ku ɔ̍, hu ɔ̍ ohōhu nīi o̍ ge̍ē yɛ ba̍la alɔ lipu̍ yī u̍ku̍rɔ̍ yī ohimɔtū nūma̍ nīi alɔ yɛ ē ya̍ ma̍. Owu̍chē yī ɔkɔ̄kā yī Ādā, ba̍la ɔchabɔ̄ hīka alɔ chikpo̍ ge̍ē twɔ̄bɔ̄ nīi alɔ wa̍a̍ yɛ ē ya̍ a̍nɛ.
20Alɔ yɛ ē ya̍ bāa ɔkɛ̍mɛ̍kɛ̍mɛ̍ ma̍, hɛ̄ɛbɛ nīi wɔ̍na yī lɛlā ɔha̍lɔha̍ ge̍ e̍e būtū wu̍chē yī ɔpɔ̄pū nīi alɔ bī yɛ ē nāa ɔjā nīi ala̍ yɛ ē de la ɔlɛyaya ma̍ ni̍. 21Alɔ chikpo̍ ge̍ē yɛ̍ɛ̄lā nīi hwɔhi gɔ̄grāa la īkprī yī Ɔwɔ ba̍la iyī āchɛ̄ɛchɛ i̍ngi̍ngɔ̍ɔ ma̍.
22Wu̍chē yī ɔla̍ā, alɔ de ɔɔ̍nɛ̍ yī alɔ ɔha̍ tɛ̄rɔ̄ ba̍la aa̍ yɛ abɔ̍ɔ yewā. Alɔ ma ɔ̍ ma̍ yɛ̄grāa yɛ̄mɛ̄mɛ̄ de jo̍ōkū mɛ̍ hīka o̍ chikpo̍ lēchi̍ lēchi̍ ge̍ē twɔ̄bɔ̄ myɛ̄grāa-myɛ̄grāa. U̍ma̍ama nīi o̍ de ɔtū che ala̍ brii gble̍ge̍de̍ ma̍, o̍ chikpo̍ kpɛ̍ɛ lēchi̍ lēchi̍ ge̍ē twɔ̄bɔ̄. 23Ita̍yi̍tɔ̄ɔsi ma̍ - ɔ̄chɛ ɔ̍mɛpa yī u nīi ē ya̍ u̍ku̍rɔ̍ ba̍la ami la wɔbɔ̄ otū ala̍ otōtū ma̍ nɛ. Āchɛ ehēhī nīi yeēwā ba̍la anu̍ ma̍, ogrēeyī yī āchɛ yī Ɔwɔ wa̍a̍ nīi e̍ kulɛhu̍ yī wā a̍nɛ. Ɔla̍ā ge̍ē bī ɔkɔ̄kā ke̍ke̍ni̍ ge̍ē de Ikra̍yisi. 24Ala̍ ā chabɔ̄ yī ɔhɔtū yī ala̍ hu̍ wā hɛ̄ɛbɛ nīi ogrēeyī yī āchɛ yī Ɔwɔ wa̍a̍ ge̍ jo̍ōkū hwɔhi hwɔhi. Ɔla̍ā ge̍ē chabɔ̄ hu̍ wā hīka o̍ ngma̍ nīi alɔ ē bī ala̍ ē gbogū i̍ngɔ̍ɔ pɛtɛpɛtɛ.
လက္ရွိေရြးခ်ယ္ထားမွု
11 ALIKƆ̍RĪNTI 8: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)