11 ALIKƆ̍RĪNTI 11
11
Ipɔ̍ɔli ba̍la alɛrɔ̄ ɛha̍ nīi - alarīmɛ̄ ma̍
1Ala̍ chu̍chu̍u! N ge̍ yɔ̍ɔ̄ya̍ i̍bobo pi̍nyɛ̍ oo, ala̍ ā tu̍ u bla̍a iyē ji. Ala̍ ē tu̍ u bla̍a iyē i̍ngɔ̍ɔ myɛ̄grāa-myɛ̄grāa. 2Ya̍ka nīi n ē hɛ̍ tū ala̍ ma̍ lɛ bāa ya̍ka ɔhɔ̍ɔ̄hɛ̍ yī Ɔwɔ ma̍. Lɛlā yī ala̍ lɛ bāa ɔɔ̍pɛ̄ ɔnɔ̄nyā nīi i̍ je̍ ɔngrɔ̄ɔ we̍ ni̍ ma̍. N chikpo̍ ge̍ē de ala̍ ē bla̍a Ikra̍yisi, lɛba̍ ūkpo̍he i̍ngɔ̍ɔ kpo̍kpo̍. 3N chī yɛ amu ē tūuhwi hīka e̍ ge̍ē de ɛri̍ya̍ ogbōgbo yī ala̍ ē bīya, ē ya̍ nīi ala̍ ē tu̍labɔ̄ hī ode iyī ala̍ kwɔbɔ̄ ke̍e̍ de Ikra̍yisi. Gala ɔgɔgu ɔla̍ā nīi yɛgwā bī i̍ji̍yēyī gla I̍ifu a̍nɛ. 4Wu̍chē oji̍ nɛ, ala̍ ē wɔ̄wīyā nāa lɛlā yī ɔ̄chɔga ɔha̍lɔha̍ ji nīi ē wā ge̍ē kɛlā ku̍ Iji̍sɔ̄ɔsi ɔha̍ nīi hɔ̄ɔ̄hɔ̄ hi̍ onīi alɔ ē ka ma̍. Ala̍ ē nāa uhu ɔha̍ nīi hɔ̄ɔ̄hɔ̄ hi̍ onīi ala̍ nāa la abɔ̄ yī alɔ ma̍. Ala̍ ē chī nāa wɔ̄kā ɔha̍ ji nīi hɔ̄ɔ̄hɔ̄ hi̍ Wɔ̄kā Ɔlwɔnyɛ nīi ala̍ nāa la abɔ̄ yī alɔ ma̍.
5N i̍ gbɛri̍ya̍ hīka ami lɛ tɛ̍bɛ̍lɛ̍ gɔ̄ga hi̍ alɛrɔ̄ ɛ̍lɛma̍ nīi - āchɛ ɛlamu ɛlamu yī ala̍ ma̍ a̍ni̍. 6N i̍ ka̍a ɔ̄chɛ ɔkɛlā ka̍ka̍ bāa aa̍ ma̍ ni̍ oo, nɛ̄ni̍ i̍ iyī ochi̍chi̍ yī lɛlā ojo̍ōje̍ ka̍ka̍ ni̍. Alɔ de lɛlā nūma̍ chāyenyi de ala̍ i̍ngɔ̍ɔ yɛ̄grāa ɔha̍lɔha̍ ba̍la ɔpɔ̄pū ɔha̍lɔha̍ mɛ̍.
7Yɛ̄grāa nīi n wā ge̍ē kā Wɔ̄kā Ɔlwɔnyɛ yī Ɔwɔ de ala̍ ma̍, n i̍ hɛ̍ ala̍ wɔ̍la̍ ɔjɔ̄jā ni̍. N bī iyī u ga ajɛ hɛ̄ɛbɛ ge̍ē ya̍ nīi ala̍ ē de ē pīya āchɛ ɔlamu ɔlamu. Ɔla̍ā, n i̍ ya̍ mɛ ni̍? 8Yɛ̄grāa nīi n yɛ ē ya̍ u̍ku̍rɔ̍ la olo̍ōlo̍ yī ala̍ ma̍, ogrēeyī yī āchɛ yī Ɔwɔ nīi hɔ̄ la ɛbɛ ɔha̍ ma̍ ē de okpo de u a̍nɛ. A ge̍ ka ge̍ē ka, o̍ re̍ka n yɛ ē nu̍ wā okpo ge̍ē tū ala̍ wɔbɔ̄. 9Yɛ̄grāa nīi hɔ̄ abɔ̍ɔ ba̍la ala̍ ma̍, lɛlā yī okpo ge̍ ko̍ōku̍ um ɔkɔ, n i̍ ē che ala̍ ikpo̍ yī wɔbɔ̄ ɔtū um otōtū ɔha̍lɔha̍ ni̍. Aɛ̍nɛ̍ yī alɔ nīi bū la Imɛsɛdo̍niya ma̍ ē bī ɔjāha̍ ɔjāha̍ nīi ku̍ um ɔkɔ ma̍ ge̍ē de u a̍nɛ. Lɔkɔkɔ nīi o̍ lɛ la okwi̍ihi okwi̍ihi ma̍, i̍ngi̍ngɔ̍ɔ nīi o̍ ge̍ē lɛ la ɔ̄chī iyɔ̄bū a̍nɛ: N i̍ chikpo̍ ge̍ē de ē pīya iho̍ ɔlyɛnɛ̍nu̍ ē de ala̍ ge̍ē gbo̍ ni̍. 10Bū la lɛlā olēchi̍ lēchi̍ yī Ikra̍yisi nīi hɔ̄ la ibi̍īyē yī u ma̍, lɛlā nūma̍ nīi n yɛ ē bī gbogū ma̍, ɔ̄chɔ̄chɛ i̍ ge̍ē ya̍ nīi n ē pīyēbi̍ la anu̍ amu la ɔcha yī Igri̍isi wa̍a̍ ē mɛ ni̍. 11Oji̍ - ohu̍ nīi ka i̍ngɔ̍ɔ ma̍? Ala̍ i̍ hi um ɔtū ni̍ - ohu̍ a̍nɛ? Īchāha̍ īchāha̍! Ɔwɔ jo̍ōkū ka ala̍ ɔ̍lɔ hi amɔ̍lɔ ɔtū.
12Lɛlā nīi n yɛ ma̍ ē ya̍ ma̍, n ge̍ē ya̍ gāa iyɔ̄bū iyɔ̄bū kpɔ̍ɔ̍ hɛ̄ɛbɛ nīi alɛrɔ̄ ɛha̍lɛha̍ ji ɛla̍ā ge̍ e̍e ma̍ ochi̍chi̍ yī lɛlɛ̄lā bī gbogū ni̍; hɛ̄ɛbɛ nīi e̍ ge̍ e̍e bɔ̍ɔ̄tū ka hīka aɛ̍lɛ yɛ ē ya̍ u̍ku̍rɔ̍ gala ɔgu ūkpo̍he ūkpo̍he bāa aɛ̍lɛ ma̍ ni̍. 13Āchɛ ɛla̍ā i̍ alɛrɔ̄ lēchi̍ lēchi̍ ni̍. Alɛrɔ̄ nīi - alarīmɛ̄ ma̍ nɛ. E̍ ē warīmɛ̄ yī u̍ku̍rɔ̍ nīi e̍ ē ya̍ ma̍. E̍ ē de iyī wā pīya ē ta̍ de ē ya̍ bɔ̄ɔjā nīi e̍ - alɛrɔ̄ yī Ikra̍yisi ichɛ̄ɛhi nɛ ma̍. 14Lɛlā ɔlɛbɛ̍bi̍ kɔ̍ɔ̄ abɔ̍ɔ? Je̍ka Isa̍tan de iyī nū pīyata̍ i̍ngɔ̍ɔ de ya̍ bɔ̄ɔjā nīi o̍ - ɔyɛ̍ɛ̄chɛ̄rɔ̄ yī ɛbɛ ɔlɛgēdēgēdē nɛ ma̍ je̍? 15A̍chɛ̍ yī nū titi ge̍ de iyī wā pīyata̍ bɔ̄ɔjā nīi e̍ - a̍chɛ̍ yī lɛlā ɔlɛkpakpa ma̍, ɔlɛbɛ̍bi̍ yī nū kɔ̍ɔ̄ nɛ? La ɔkwɛ̍ɛjī yī nū, Ɔwɔ ge̍ē de ichi̍ nīi ngma̍ la aa̍ ma̍ ē de wa̍ wu̍chē yī ɔjā ɔla̍ā nīi e̍ ya̍ ma̍.
Akanya yī Ipɔ̍ɔli bāa ɔlɛrɔ̄ yī Ikra̍yisi ma̍
16Lɔkɔkɔ nīi n ka i̍gba̍a ma̍: Ɔ̄chɔ̄chɛ ge̍ e̍e gbɛri̍ya̍ ka amɔ̍lɔ - oli̍bobo ni̍. Ala̍ ge̍ chī yɛ ē gbɛri̍ya̍ i̍ngɔ̍ɔ, ɔ̍lɔma̍ ala̍ nāa ami bāa oli̍bobo ma̍ ji, hɛ̄ɛbɛ nīi n ē lɛ ɔjā ɔha̍ pi̍nyɛ̍ bī gbogū. 17Lɛlā nūma̍ nīi n yɛ ma̍ ē ka u̍ma̍ama ma̍, i̍ ɔjā nīi Ādā chikpo̍ ka amɔ̍lɔ ge̍ē ka ma̍ ni̍. Lɛlā obī gbogū nīi hɔ̄ ma̍ ma̍, n yɛ ē ka bāa oli̍bobo ma̍ ichɛ̄ɛhi. 18Wu̍chē lɔkɔ nīi āchɛ yɛ̄mɛ̄mɛ̄ yɛ ē bī lɛlā yī yɛchɛ ɔlamu ji ē gbogū ma̍, ami titi ge̍ē ya̍ i̍ngi̍ngɔ̍ɔ. 19Ala̍ nīi jyɛ̍ɛ̄lā ka̍ka̍ nīi chī nāa lɛlā yī ali̍bobo ɛla̍ā bāa ɔyaya ma̍ bɛ̍ɛ? 20Ɔ̄chɛ ɔha̍ ɔ̄chaha̍ ji nīi ge̍ yɛ ē ku̍ ala̍ ē pīya afiyɛ, kɛ̄ɛ yɛ ē bī a̍chālā ya̍ ala̍ ē re̍, ala̍ ā hīdīdū ji. E̍ ge̍ yɛ ē rɛ̍ɛda ē kla̍ ala̍ kɛ̄ɛ yɛ ē nāa ala̍ tɛ̍bɛ̍lɛ̍ kɛ̄ɛ grāa ala̍ abɔ̄ la eyī, ala̍ ā hīdīdū yɔɔ. 21O̍ de ya̍ u liwēyī iwēyī la ɔchɛ̄ hīka, alɔ ma̍ lɛ kwīkwī la ɔya̍ ala̍ i̍ngɔ̍ɔ.
Ɔ̄chɛ ɔha̍ ge̍ chī ya̍akanya bī lɛlā ɔha̍ yɛ ē gbogū, ɔ̍lɔma̍ ami titi ge̍ē bī lɛlā gbogū i̍ngi̍ngɔ̍ɔ. N yɛ ē ka i̍bobo ji bɛ̍ɛ̄nɛ̄. 22E̍ ge̍ bī gbogū ka aɛ̍lɛ - Ihi̍bru nɛ, ami titi kē Ihi̍bru nɛ. E̍ ge̍ - Ali̍sɛ̄rɛli, ami titi kē Oli̍sɛ̄rɛli nɛ. E̍ ge̍ - ībī yī A̍brahāam, ami titi kē ībī yī A̍brahāam nɛ. 23E̍ ge̍ chī wɛ a̍chɛ̍ yī Ikra̍yisi, ami chī - ɔ̍chɛ̍ yī Ikra̍yisi gɔ̄ga nɛ. Onūma̍ ma̍, n yɛ ē ka ji bāa ɔlyɛ̍lɛ̍ ma̍ bɛ̍ɛ̄nɛ̄. Lēchi̍, ami ya̍ u̍ku̍rɔ̍ gba̍a̍ gɔ̄ga a̍nɛ. N tū igbakɔbɔ yɛ̄grāa yɛ̄mɛ̄mɛ̄ hi̍ wā. Āchɛ grāa ami a̍grɛ̄chi̍ yɛ̄grāa yɛ̄mɛ̄mɛ̄ hi̍ wā pɛtɛpɛtɛ. N tū la obrīihu yī rikū yɛ̄grāa yɛ̄mɛ̄mɛ̄ hi̍ wā. 24Igbɛrwɔ̄ nīi āchɛ yī Iju̍u grāa ami a̍grɛ̄chi̍ ohoohu che igwa̍arāanɛ ma̍. 25Igbɛta̍ nīi āchɛ gwō u lijē la ɔchi̍ ma̍. Yɛ̄grāa ɔha̍, e̍ yɛ ge̍ē de u ngmo̍ la achāchɔ̄. Igbɛta̍ nīi wɔwu̍ ɔnɔ̄kɔ̄kū ku̍ mīyanya nīi n tū abɔ̍ɔ ma̍. Ɔha̍ ma̍, n tū abɔ̍ɔ la yenyi ligbo̍ kpɛ̍ɛ bāa yɛ̄grāa yī ɔ̄chī ge̍ chɛ̄ yɛ̄grāa yī ɔ̄chī ɔmɛpa ma̍. 26Yɛ̄grāa yɛ̄mɛ̄mɛ̄ nīi n ē gāa ɛyɛ yī u i̍ngɔ̍ɔ ma̍, n ē ta̍tū la obrīihu yī rikū la ɔpɔ̄pū yɛ̄mɛ̄mɛ̄: wu̍chē yī yenyi ɔhɛ̍rɛ̍, uwī, Iju̍u nīi - āchɛ yī u ma̍, Ɛchɛkɔcha, ba̍la āchɛ ɛha̍ nīi ē warīmɛ̄ ka aɛ̍lɛ - aɛ̍ɛya amɔ̍lɔ nɛ ma̍. N ē ta̍tū la obrīihu yī rikū la ipwo̍gra, lipu̍ a̍chi̍ ba̍la lipu̍ li̍hu i̍ngɔ̍ɔ wa̍a̍. 27N ya̍ u̍ku̍rɔ̍ ɔlamu, gba̍a ya̍ u̍ku̍rɔ̍ ɔlwɔhɔ̍hu̍. Yɛ̄grāa yɛ̄mɛ̄mɛ̄, wɔlā īkprī i̍ ē hɔ̄ de u ni̍. Ɔha̍, n ē de ē ku̍ lɛmiyɛ, de ē ku̍ odīyenyi. Yɛ̄grāa yɛ̄mɛ̄mɛ̄, ojōre̍ oko̍o i̍ hɔ̄ ni̍, a̍ywɔ̍da̍ ode lɛhu̍ kɔ̍ hɔ̄ ni̍, ɔjā otūlibi̍īyē i̍ ē hɔ̄ ni̍. 28Ba̍la ɛha̍ yɛ̄mɛ̄mɛ̄ nīi n i̍ ka gɛ ni̍ ma̍. Mɔ̄chīmɔ̄chī, n ē hɔ̄ la ɛri̍ya̍ ogbōgbo wu̍chē yī wɔbɔ̄ otōtū yī ogrēeyī āchɛ yī Ɔwɔ. 29Ɔ̄chɛ ɔha̍ ge̍ lɛ kwīkwī, n ē de ē lɛ kwīkwī tāa ɔlɔjā. Ɔ̄chɛ ɔha̍ ge̍ ngma̍ ta̍tū la lɛlā ɔdwɔ̄bi̍, īlāanyī lā u gba̍a̍.
30N ge̍ yɛ ge̍ē bī lɛlā gbogū, lɛlā nīi ge̍ē chabɔ̄ lɔkɔ nīi ami lɛ kwīkwī ma̍ nīi n ge̍ē bī gbogū a̍nɛ. 31Ɔwɔ nīi re̍ka A̍dā yī Ādādā Iji̍sɔ̄ɔsi ma̍ jo̍ōkū ka amɔ̍lɔ i̍ yɛ ē warīmɛ̄ ni̍. O̍gbo̍ ge̍ iyī nū kpɛɛ ku yɛ̄grāa ɔha̍lɔha̍! 32Yɛ̄grāa ɔha̍ nīi n hɔ̄ abɔ̍ɔ la Idama̍si̍kɔsi ma̍, ɔ̄chɛ odeyīrɛ ajɛ yī ɔchwɔ̄lɛ̍ nīi re̍ka A̍rɛ̄ta̍asi ma̍ de āchɛ kwīinya la oko̍nɔ̄ɔpu yī ipwo̍gra ɔla̍ā hɛ̄ɛbɛ ge̍ē de u ē ku̍. 33Āchɛ chī de okri tū u̍kpa̍, nāa ami tū ga la a̍rɛ̍pa̍ yī ɔga̍ha̍ du̍mɔ̍ ga ajɛ ga oe̍. E̍ ya̍ i̍ngɔ̍ɔ nīi n de gwɛ̍ɛnya ke̍e̍.
လက္ရွိေရြးခ်ယ္ထားမွု
11 ALIKƆ̍RĪNTI 11: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)