Zacarías 14
14
Wayullna Jerusalén'na gunen gan
110 Ba za lla ke Xanllon, yell Jerusalén, zeteo llwiachicho keten wla ake' da ka' sjanapon. 2Lla'na Xanllon watupe yoyte be'nn ka' sjalla latj yell-liw ka', nench'na tilren ake' Jerusalén'na. Na llajnebia ake' yell xhen'na, na si ake' yeolol da de lo yo' rill aken na gunle akre nor ke ake' kaꞌ, na gachj be'nn kaꞌ lla raw yellen wchach ake'. Na be'nn kaꞌ yeganen' su ake' raw yellen. 3Wayullna Xanllo nakse tilrene be'nn ka' sjalla latj yell-li'on, kan ba bdilrenkse le ake' batna. 4Lla'na chep Xanllon raw yan nzi ya' ke Olivos, dan zu chla yell Jerusalén'na, gan llra' willen. Na yan gaken chopre, tolan yegan rale na yetolan yegan llelre, na wayaken to rach xhen, 5Diozen gune dani nench'na re' gak wxhonjre rachen, na wara re' le rachen llinten ye chlare gan lli yellen le Asal, wxhonj re' kan bxhonj xustawre kaꞌ batna, kan bxho dan guk kan llnebia Oseazen yell Judán. Na yed Xanllon, Dios kian, rente ankl ke kaꞌ.
6Lla'na bi gak zay, na bi kwia bey. 7Gaken to lla da braw, da numbie tuze Diozen. Kena bi wroen cha tellan o cha tllelen, le dulla duyer gat beni. 8Kena lloj to yeo Jerusalén'na da bi yeyojkse. Nis ken gaten ket llak zay, na ket llak bua, gachj nis ken yellinen lo nista'on dan de gan llra' willen, na ye gachjen yellinen lo nista'on dan de gan llayo willen. 9Lla'na wnebia Xanllon raw doxhente yell-liw. Tuze Xanllo Dioznan werao ake'. 10Doxhente latj yell-li'on wayaken rach. Surawzen gan nzi Gueba, llinten gan nzi Rimón, dan lli llelre gan nbane Jerusalén'na, na Jerusalén'na kwian chkwia, na cha be'nn rawen, surawzen reij ke Benjamín'na xte llinten reij ke skin'na gan bzukse reij guren, surawzen gan zu wdup ke Hananelen xte llinten gan llsi ake' seit ke be'nn wnebian. 11Jerusalén'na yellan be'nn dayubre, na nullno wlleyi len. Na be'nn kaꞌ yella rawen cha ake' nbaraz.
12Axha latj yell-liw ka' gukdilren Jerusalén'na, Xanllon wsakzie'e le ake': ne' nban akte gull xper aken, na gull yajrao aken, na rente rull ake' kaꞌ. 13Lla'na Xanllon wchebe'e le ake' kwis. Na suraw ake' tilren loellj ake'. 14Rente Judán chaje'e llajtilrene yell kaꞌ nechj Jerusalén'na, na watup ake' yeolol da nap latj yell-liw wrill kaꞌ, ya dan nzi plat, na ya cha'on nzi oro, na rall xha ake'. 15Kan bxhakzikse be'nn ka', ka' gakse ke kabay ka', bllin ka', kamellos ka', na burr ka', na yoyte bayix ka' sjalla konen be'nn ka' llwiere le aken. 16Na yeololte be'nn yegan raw yell ki, be'nn kaꞌ gukdilren Jerusalén'na, chaj ake' yeo iz lljeraw ake' Xanllo Diozen nap doxhente yelwaken, na gun ake' lni' dan nzi las Enramadas. 17Na cha to kwen be'nn ka' sjalla latj yell-liw ki, bi lljake Jerusalén'na lljeraw ake' Xanllon nap doxhente yelwaken, bi gak yejw rall aken. 18Na cha be'nn yell Egipto kaꞌ bi lljake, Xanllon wsakzie'e le ake', kan gunkse ke nuteze be'nn sjalla yell xhen ka', cha bi chaj ake' lljen ake' txhen, lni' dan nzi las Enramadas. 19Danin wsakzi be'nn Egipto kaꞌ, na yeololte be'nn ka' sjalla latj yell-liw cha bi chaj ake' lljen ake' lni' dan nzi las Enramadas. 20Lla'na, rente kampniy ka' sjallia le xha kabay ka' su aken sen, na wayaken Xhirall ke Xanllon. Na yes ka' llunren ake' llin gan zu yoda'on gaken xhirall, ka tas ka' sjankoa raw bkuy. 21Na yeololte yes da gunren ake' llin Jerusalén'na na ren Judán, gak aken da xhirall ke Xanllon nap doxhente yelwaken. Na keten gut ake' bayix ka', kanake lljeraw ake' Diozen, gunren ake' daki llin. Ke lla'na, nullno be'nn gak gote' na gawe'e, lo yodao ke Xanllon nap doxhente yelwaken.
လက္ရွိေရြးခ်ယ္ထားမွု
Zacarías 14: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ