Isaías 28
28
Llixjwere Samarian
1Niachraz ke Samarian, naken to yell yarall, na naken ke to corona
ke Efraín'na, yell ga lla' be'nn wezu;
nake ka to da llia yej da ba bkoad,
da xhoa raw rach gan de yu wen'na,
yell xhen gan ba nxoayay zu ke uvan le ake'.
2Xanllon ba nunee xnid to be'nn war,
be'nn nak war ke to yejw siw nsa yaj zed,
ka to yejw be zban xhen dalleyi,
keto ga llabia nis xhen.
Konen taken wsalen raw yu,
3na konen nie'e ka' wchochje
dan nak yarall, na corona
ke yell wezu ke Efraín'na.
4Na naken ka to da llayal gak nbaraz axha llian yej da ba nkoad,
da xhoa raw rach gan de yu wen'na,
gaken ka higos da llbia da nell;
na keten nu'n llre len'na
na keten bayun lo taken, le llawten.
5Ka lla'na
Xanllon nap doxhente yelwaken gake ka to corona da nbaraz kwis,
to da nbaraz ke be'nn ka' yegan raw yell ke'en,
6Diozen gunee nench'na be'nn ka' llun yel korchisen gak ake' be'nn lixhaj,
na gundipralle be'nn waka ya ka' llap yell xhen'na.
Kan gak konen Jerusalén'na
7Leskakse zu bal ake' llak yal ake' ni ke dan llaj ake' zu ke uvan
na lljachew ake' nike zu snian llaj aken:
bxus ka', na be'nn ka' llayixjwe di'llen leskakse llak yal ake'
nike zu snian llaj aken,
bi llzoa zu ke uvan lo yichj aken wen,
lljachew ake' nike da snia ka' llaj aken,
llak yal ake' keten llredao akren
na zull akre keten llun ake' yel korchisen.
8Yoyte raw mes ka' dup aken da sral ka' ba bayeb aken,
na ni rat bi zu ga nak yall.
9Llne'e ake' kia, na ne ake':
Yedchk'ke wadsedre neto',
wadsedre dan ba broere Diozen neto',
ka llsedre bidao riz,
10chin llzorawze llsed akbe wrab akbe:
na ne' ll-lul llwa akben.
11Axha na', cha bi gun ake' kwent dan yep aken,
konen to di'll da bi numbie akre, na da bi chejnie akre,
ka gun Diozen wne' yellen.
12Le'en bakse gulle'e le ake' kan batna:
Gani' de to latj ga nak lliteze,
gani' de yel wxhirallen,
wazirallchga be'nnen lljaxaken.
Axha biwen akre wzenay ake' ke le'e.
13Kelen'na Xanllon wne' le ake'
ka llne'e bidao ake',
chin llsed akzbe gul akbe.
Na kone ka, keten ko ake' nezen, yal ake' skullre,
gun we kwin ake', na yexj ake' raw trampen
na gana' yegan ake'.
14Le wzenay cha, di'll ke Xanllon,
be'nn bi numbie yel baran
llnebiare yell Jerusalén'na.
15Re' nere:
ba bchajllato to di'll konen yelguten,
to di'll da banllajlla konen yel llnebia ke be'nn wat ka',
nench'na ket lled da nxhullrazen,
bi wadxhenen neto';
ba bdirjto wkoaj kwinto konen da wxhiye ka'
na wkoach yel wxhiyen neto'.
16Kelen'na, Xanllon nee:
Wzoa to yaj Sión'na,
to yaj da ba biazralla da zeraw zak,
da gak to yaj da braw,
na gaken to da wrajllan.
Be'nnen wxenlall, gak soe'e nbaraz.
17Rawen gan llakchawon gunlena llin Prum ke yel korchisen
na dalixhajen gaken nivelen.
Gan bayirjre wkoach da wxhiye kere ka re
yaj zed wlleyin len,
na nisen wachachen latj gan llkoajren.
18Dan ba bchajllare konen yel guten waranen,
na di'll dan banllajlla konen yel llnebia ke be'nn wat ka', billbi saken.
Yed da nxhullrazen
na wchochjen re'.
19To to ket yeden, koellew xexhjen re'.
Yew zir yeden, ke tella, na ke bagul.
To yenzere bazan to wxistiten re'.
20Gaken ke to ga lljaxhoare lltasre ga nak cho'p,
na llkoach kwinle konen to xchan bchuyze.
21Xanllon gune kan benee raw ya'n nzi Perasim,
gunee kan benee rachen nzi Gabaón,
nench gunee kan llenle'en, lakse naken to da bi numbiere,
nench gunee kan ba llwie'e gunen, to da nak zi wabanello.
22Kelen'na bill wtitjere,
kere gunzre gakll zillull ke re',
le ba benla ke Diozen nap doxhente yelwaken
ba bnee wlleyie'e doxhente latj yell-li'on.
23Lewzenayian, le wzenay dan llnia ni:
le wzenay koasru di'll kia ka':
24Keten be'nnen llaz llanen llunee guz,
bi llwane'e bell du tiemp
o cha bi ll-le'e yu, o cha llape'e raw yell-liw ke'en.
25¿Bi naken dali ket llayull llunchawen'na
lluslase nbas ke anis o cha komin
natell to lixhaj llaze'e trigo,
natell to llwa yell-li'on llaze'e cebada na dan nzi centeno cha?
26Diozen llsedre le'e akren de gunee.
27Le kere llxhoxjtin ake' dan nzi eneldo,
na nike llchochj akze dan nzi komin konen rued ke karreten,
le kone to yayze llin ake' dan nzi eneldo,
na dan nzi komin konen to xhis.
28Llxhoxjtin aken axha kere to chize,
llde ake' rued ke karreten rawen,
na llabe ake' nbas ka, axha bi llchochj aken.
29Kaksen llun xbab ke Xanllon nap doxhente yelwaken.
Le'en nape'e xbab da llabanello,
na llune kan ba benee xbaben konen yel sin xhen.
လက္ရွိေရြးခ်ယ္ထားမွု
Isaías 28: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ