Isaías 29
29
1Arielen, Arielen, niachraz naken ke
yell xhen gan bazirall Daviden.
Iz kon iz
le nawkse lni' ka' llunlen,
2na, nada' chixja dazed ke Arielen,
na kuell ake', na gusia ake'.
Na yell xhen'na gaken kia kan nzi ra Arielen.
3Wsela be'nn waka ya' kia ka' nench'na, chechj ake' rwe',
wzoa ze war ake' da llkoaj nench chechjen rwe',
na wlisa wdup ake' nench'na tilrena rwe'.
4Siw yelsdo, na tulo raw yu;
na bexne' ko'on llilliteze wne'n,
na xtillo ka' bi gun aken llakia.
5-6Axha to setegaze,
Xanllon nap doxhente yelwaken wsakzie'e be'nn ka' llwiere rwen
konen yi' bziw, kone xho, na da llun llakia,
yejw siw, be bdon, na yi' xhen dalleyi.
Be'nn zan ka' llwiere rwen wayak akte bichteze,
na be'nn zan ka' nawlloa rwen gak ake' ke yixh beb da noachachen.
7Yoyte yell zan ka'
llakdilren Arielen,
yoyte be'nn ka' dilren len
na llchinj ake' ze war ke'e ka',
be'nn ka' llsakzikse len'na,
gak ake' ke to da llne'e akre yer o cha ke to da llredao akre tllele.
8Gaken ke to be'nn llne're yer dune,
na llakre cha ba llawen,
axha ket llabanen, ne ndach lo len,
o cha ke to be'nn llne're yer llbilre
na llakre cha llaje,
axha ket llabanen, ne llbilksere
na to niech lo yenen.
Ka gak konen yoyte yell zan ka'
llakdilren ya' Sión'na.
9Le nawkse le gak be'nn bi zu lo yichj wen.
Le nawkse le gak be'nn lchul, be'nn bibi llrekse chras.
Le nawkse le gak yal ke be'nn wezu ka',
lakse bine' yejre da ka' llsullen.
10Le Xanllon ba bsele'e rawre
to bichgal zajzete.
Be'nn ka' llayixjwen nak ake' yaj raw yellen,
axha Xanllon ba bkoache llwarao aken kone to rall bllall.
11Yoyte da ka' llredawen ba guken ke re'
ka' to da ba nyoj
to le yich da nllelguy, na nyichten sey.
Chetka we aken to be'nn llak llrab,
na ye ake' le'e: brab dani,
le'e wallie'e di'llen:
bi gak wraban, le neyjen na nyichten sey.
12Na cha we aken to be'nn bi llak llrab,
na ye ake' le'e: Brab dani,
le'en wallie'e di'llen na ne'e: Bi llak llraba.
13Xanllon gulle'e nada':
Yell ni, de dillzen llwerao ake' nada'
na llap ake' nada' baran kone llwa ake' naze,
axha raxhdao aken zen zit kwis gan zian,
na gan lladup ake' llwerao ake' nadan
naken da bayirjlall be'nn nach kazen
na banes akren to lo yichj akze.
14Kelen'na guna da yelwan
na dayubre guna wabane yell ni.
Yel sin ke be'nn sin ke ake' ka',
na yel llajnie ke be'nn ke ake' ka' llajnien waran aken.
15Niachraz naken ke be'nn ka' llkoachre Xanllon
nench'na wkoach ake' dan llun ake' xbaben
na llun ake' damar ke ake' ka' de ngachze,
na ne ake': nutno llrere neto', nutno llakbekse.
16Llebraz llayirjlallre ka llchare da ka'.
Ka ne'llo benjen gaken kan nak
be'nnen llunchaw len'na.
To da benee bi gak yen be'nnen ben len'na:
Kere rwen beno nada',
ni to da nak de yu yen be'nnen llun len'na:
Bi nezro bin lluno.
Llchebe'e wasra ke Israelen
17Yeratze
ya' yeon wayaken lix ga gasgan ake',
na lix ka' gan llasllan aken wayaken ka ya' yeo.
18Ka lla'na be'nn ka' nkoell wayen akre
ket nu wrab raw aken,
na be'nn lchul ka' ware akre,
na bill su aklle raw da xchul gasj wi.
19Be'nn nexjrall ka' yewe akre dayubre kone Xanllon,
na be'nn yiach ka' yeweren akre
konen Dios Xhirall ke Israelen.
20Waran be'nn ka bi llap baran,
na bill gat yelnban ke be'nn yarall ka',
na to waranze be'nn ka' kon llun xbab gun ake' damar,
21be'nn ka' llxoa dol kull be'nn yub akre,
na llkoyel akre be'nnen llun yel korchisen,
na konen da wxhiye ka' bi llun ake' yel korchis ke be'nnen bi nap dolen.
22Kelen'na, Xanllon, Dios ke Israelen,
be'nnen basra Abraham'na, nee:
De nate bill si' Jacoben yelsdo,
na nike gakze xna llwarawen,
23le ket xhi'nn xhasoe ka'
re akre dan ba bena yell ke aken,
wazak akre yel xhirall kian, na' gap ake' nada' baran,
Dios xhirall ke Israelen.
24Be'nn ka' ba gukchixen wsed ake' gak ake' be'nn sin,
na be'nn ka' llne' mar kia si' ake' yel llajnien.
လက္ရွိေရြးခ်ယ္ထားမွု
Isaías 29: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ