Isaías 1
1
Judá, to yell wen daxhinj
1Di'll da bdixjwe Isaías, xhi'nn Amós, da bredawre kan gak ke Judán, na Jerusalén'na, lla ka' llnebia Ozías, Jotam, Ahaz na Ezequías gan nbanle Judán.
2Yell-liw, na yeba,
le wzenay dan ne'e Xanllon:
Baslliwa xhi'nna ka' xte bllinte lla guk akbe be'nn wak,
axha le akben bayechj akbe nada'.
3Bellen llayumbieba xanban
na burren leska nezeba nun llwao leban,
axha yell kia Israelen,
bi llayumbiere na bi nape'e yel sin.
4Niachraz ke re' be'nn wen daxhinj,
yell da yotekse damar,
xhi'nn xhasoa be'nn wen damar ake',
xhi'nn be'nn wen daxhinj.
Ba bsanlallre Xanllon,
ba babiy re' kwit Dios Xhirall ke Israelen,
ba bsanlallre le'e.
5Re' llenteksere gakre be'nn wednay,
na zitere ba bsakzia re', to bill zukse gare guna re' we'e.
Doxhente yichjren banaken we'e,
ba bnitre doxhente yel ndiprall keren.
6Bxhizen raw xben nia re' bllinte yichjre
bill zukse ga nak wen raw kwerp keren,
doxhenten ba nak we'e, na ba nianjen, na llian we'e ban,
nutno ne' gun len rmell, na nutno ne wchel len rall,
nike ne' gakrenze seiten wazalen gan lleyllran.
7Latj yell-liw keren ba baganen to latj dach ga nullno zu,
na llalnin yell xhen kere ka'.
Zetere llwiare'e
be'nn ka' llwieren, llaw ake' da ka' ba guzren.
Doxhenten ba baganen ke to latj dach ga nullno zu,
kan guk ke Sodoma kan blleyin.
8Tuze Sión'na ne' zella,
naken ke to yo' de yixh da zu radj gan naz ake' lba uvas ka',
tuzen zu ka to ga ze to xhur de yixh radj gan naz ake' daxhixh dan nzi melón,
ke to yell xhen da zu tuze, na nechjen be'nn llwiere len.
9Chenak Xanllon nap doxhente yelwaken
bi bakoane yeto'chopllo,
natk nakllo kakse Sodoma, na Gomorra chenak.
Dan nak dogarje kan werawllo Diozen
10Re' be'nn braw ke Sodoma, le wzenay xtill Xanllon,
yell ke Gomorra bzenayian
dan wruere Dios Kellon rwe':
11Xanllon nee:
¿Bixhchen lladware kia bazan bayix nench'na gutreba?
Ba jachiera llzeyre xhir dao ka'
na zaa ke belldao ka',
llrala llen ke belldao ka', xhirda'o ka, na chib dao ka'.
12Re' zare' lladsere kwitan
axha ¿nuxha gull re' wrajchekwre lia yodao kian?
13Bill yedware kia da llazarallre da bibi zak,
bill zoera lleen ke da ka' llzeyren.
Re' llaxhre yellen
nench'na gun ake' lni' ke be'o llene'n, na ke lla sabden,
axha nada' bi llazralla lni' ke be'nn ka' llun damaren.
14Llwiera lni' ke be'o lle'n kere ka', na keten lladupren,
ba bayaken to da llwiera kwis
na bill zoeran.
15Keten re' ll-lisre takre ka' nench'na llalwillre nadan,
nada' bi llayechja wia re',
na lakse re' seteze sere walwillre nada',
nada' bi llzenaya ke re'.
Takre ka' dupen llen.
16Le wayib, na le wayun yall kwinle,
bill llenla rera damar ke re' ka'.
Le wsan bill gunre damar.
17Le wsed gunre da wen,
le gundiprall nench gunre da nak dalixhej,
le gakren be'nn ka' llsakzin,
le gun yel korchis ke bidao bill zu xa' xna,
le gakren nor wazeben.
18Xanllon nee:
Leda, nench wello di'll akren nak dani.
Lakse daxhinj kere ka' naken ke to klor da xna ban,
nada' wakuana re' llichtat kakse bey,
lakse nakre ka' to rall da nben da morrad,
nada' wakuana re' llichtat kakse du yich xha xhir.
19Chetka re' wchebre gakre be'nn wzenay,
yej gawre dazerao da nak dawen dan llun yell-li'on,
20axha chetka zubere gakre be'nn wednay,
deksde gatre raw wdilen.
Xanllo naksen ba bnee ka'.
Xanllon wayunee yall Jerusalén'na
21Rwe' yell xhen wen dalixhej, gakre gukzen
bllino guko ka' to nor ree.
Batna yoyte be'nn ko'o ka' ben ake' dawen
na bzu ake' ben ake' dalixhej,
axha na' zerawze be'nn wen xhia llan.
22Guko ka yaj cha'on nzi plat, na na' ba bayako beb,
guko ka to zu ke uva da chaw, na na' ba bayako nis.
23Be'nn wnebia ko'o ka' nak ake' be'nn wednay
na nak ake' txhen be'nn wan ka'.
Yoy akte llwe ake' latj llaw ake' le ake' konen mell,
na llen akre we ake' le ake' da llwe ake' kaze.
Bi llun ake' yel korchis ke bidao bi zu xa' xna
na llun ake' kaze dan llayal si nor wazeb ka'.
24Kelen'na Xanllon nap doxhente yelwaken,
be'nnen nap yelwak zeren Israelen ba bnee:
Ba guk tokat, nada' wsakzia be'nn ka' llwiere nadan.
Wazia le ake' wzon.
25Wsakzia rwe' dayubre
na wzeya doxhente beb ko'on,
wayuna rwe' yall raw doxhente da bziw ko'o ka'.
26Guna nench'na wazu be'nn gun yel korchis ko'o, kan ben be'nn ka' blla batna
na be'nn wroe wsedre rwe' ka be'nn ka' blla danell.
Ket ba bayull bena ka', na ne' ake' ko'o dayubre:
Yell xhen llun yel korchis ka llayal, Yell xhen wen dalixhej.
27Konen yel korchis kian, na yel wasra kian
wasra be'nn ka' lla' Sión'na, na wayed ake' kone nada',
28axha wxhoxjtina be'nn wednay ka', na be'nn wendaxhinj ka',
na be'nn ka' wsanlall nadan kweyi ake'.
29Wayere re' ke yay zin ka', na latj gan nazre yay xhix kere ka'
daka llebraz llazrallren,
gan llweraore loe lsak ka'.
30Re' gakre ka to yay zin da ba nkoad xlaye ka',
na ka to latj ga lla yay xhix da bi yull nis.
31Be'nn waren wayake ka to yixh beb,
na da ka' benen ka to belyi':
na llop akten gal aken tuchize,
na nutno gak wasur len.
လက္ရွိေရြးခ်ယ္ထားမွု
Isaías 1: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ