Rroman 11
11
Isirael oaataa muro
1 #
Lpi 3:5
Naiparu naa ajo, amaa, keiturrayie sa Nkai ltung'ana lenyena? Nakaiting'o! Eitu eiturraa, amu kore sii nanu naa kara loo Isirael ichoi e Abraam, la lmarei le Benjamin. 2Eitu eiturraa ꞉Nkai ltung'ana lenyena ooteyielo apake ta ng'asunoto. Ana miyielolo nejo Lkigerot Sinyat teinie ng'oji neipirita Elija, neikuna pee eyaki Nkai mbaa ee ltung'ana lee Isirael ejo, 3#1Lki 19:10,14<<Laitoriani, ketara loibonok linono, netodotoitie lpereren linono la lasar, naa nanu ake apeny owuon eichu neyieita nkichui ai.>> 4#1Lki 19:18Kake amaa dei, nyo etoolika ꞉Nkai ninye? Ketoolika ajoki, <<Kaiteng'elaka koon lewa nkalupuni sapa leitu egilaki Baal nkung'uchi enche aasai.>> 5Naaku kore abaki taata tana ng'amata, keatae muro nategelua ꞉Nkai te munyani enye. 6Naa tanaa te munyani etegelua naaku meirichakino ngelunoto e ltung'ani asat enyena, amu tanaa nejia, naa meitoki naa munyani ara munyani.
7Naaku nyo ejoito kuna pooki? Kore apa naiyieita Isirael naa eitu etum, kake ketumo ꞉inia muro. Kore lkulikae pooki naa keitogoloki ltauja lenche, 8#Nkit 29:4; Isa 29:10ana naigero ajo,
<<Ketipika ꞉Nkai ninche ltauja lememuso, nemening'u
o nkonyek nemedolicho
o nkiyiaa nemening'icho
ana metabaki ana parri.>>
9 #
SNk 69:22,23 Nejo Daudi,
<<Metaa nduaata enche rruachet o lgiitani ooibung'ieki ninche,
meterriaa ninche, neaku laata enche torno.
10Metipiki nkonyek enche naimin payie medolicho,
neirrigi nkoriong'i enche ntarasi.>>
11Kaiparu naa ajo, amaa Isirael ketorrorrote apa payie meinyuototo aitoki? Nakaiting'o, eitu! Kake eitu eiruk, neicho inia lkulie oreren ꞉njeunoto payie etum Isirael lom. 12Kore tankaraki neitu eiruk ninche, netum nkop pooki mayian, neaku inia ng'orikinoto enche dupoto too ltung'ana lamara loo Lyiaudi. Kewuaa sa mayian natumi, tenechukunyie Isirael pooki aairuk Yeso!
13Naa kairorie naa ntae ltung'ana loo lkulie oreren lamara loo Lyiaudi. Kara nanu lkipaaret linchi, naa kore tankaraki inia kang'idare ilo siaai lai lo lkipaaret, 14aata ajo payie apik lorere lai loo Lyiaudi lom, naitejeu lbata lenche. 15Amu amaa tanaa kore inia kiturrarroto e Isirael neyau melet nkop, nyo sa naasai teneng'amari aitoki ninche te nchula e Nkai? Meitoki nkae mara ake tenetuwuana ketum lootuata nkichui.
16Kore tanaa keisinyati orati e ndaa ekue naitakini Nkai, naaku keisinyati inia daa pooki. Naa tanaa keisinyat ntana naa keisinyat sii sura. 17Keteng'eruaki mbata ee sura e lng'erriyioi otuunoki nerubakini surai e lng'erriyioi le ntim metubulu tenebo o nkulie sura e ilo ng'erriyioi otuunoki. Kore naa ntae lamara Lyiaudi, itiuu ana inia surai e ntim naturubakaki ilo ng'erriyioi otuunoki payie ing'arng'ar parakuoicho e inia tanai e ilo ng'erriyioi, 18minkar naa tankaraki nenia sura naateng'eruaki. Naa tininkar, taparru ajo mara iyie oibung'uta ntana, kake ntana nikimbung'uta iyie. 19Indim iyie atejo, <<Keteng'eruaki nenia sura payie aarubakini nanu ilo cheni.>> 20Kedede inia, keteng'eruaki ninche tankaraki nemeata nkurukoto, naa irubakino iyie tiniwuon taatua nkurukoto. Minkar, kake tuureicho! 21Amu tanaa eitu epal Nkai sura naatubuluta apake, mikipal sii iyie. 22Teyielo naa ajo, kenana ocheke Nkai nericho. Kericho too lolo ooterriete, nenana ocheke te iyie tiniwuon taatua supaticho enye. Naa tiniminko nejia niking'eruni sii iyie, 23naa kore abaki nenia sura apa naateng'eruaki naa kerubakini aitoki tenemepuo kue meiruk, amu keata Nkai ngolon narubakinyie. 24Amu amaa tanaa ikiteng'eruaki iyie te ilo ng'erriyioi oara apake le ntim, nikirubakini ilo ng'erriyioi otuunoki leitu apake ibulunyie, kebaa sa elelek tenerubakini nenia sura lng'erriyioi laa ninye apake etubulunyie?
Njeunoto e Isirael
25Amu lalachera lainien, kayieu niyielouu ana bae naisudoro, payie midoldol ate aajo irara toki. Kore naa inia naisudoro naa ana, keitogolito lbata loo Isirael nkuechi, ana meiputakinoto ltung'ana pooki loo loreren lamara loo Lyiaudi. 26#Isa 59:20,21Naa te inia eitejeuni Isirael pooki ana naigero ajo,
<<Sion eing'uaa lalakunoni,
naa keoru lmarei le Yakobo mbaa naaitodolu aajo meurie Nkai.
27 #
Isa 27:9
Naa ele lning'o lai o ninche,
tanaaoru ng'ok enche.>>
28Kore inia natanya ꞉ninche Lomon Supati, nera lmang'ati le Nkai, neaku inia dupoto taa ntae. Kake kecham ꞉Nkai ninche, nera sotua lenche tankaraki nategelua lmakui lenche. 29Amu mejak ꞉Nkai nkichoorot o nkupototo naichorua. 30Kore apa itanya ntae ining'ining Nkai neing'urrie taata ntae tankaraki natanya Lyiaudi ening ninye. 31Nejia sii eikuna ꞉ninche nchere ketanya taata ening Nkai payie etum Nkai aing'urrie ninche tesiedi. 32Amu eteenika ꞉Nkai pooki ming'ano payie etum aing'urrie pooki.
Nkisisa e Nkai
33 #
Isa 55:8
Kebaa siake nguton e parakuoicho o ne ng'eno o ne inia naa nemeitoki meyielo ꞉Nkai! Meidimai payie iyielou aichu mbaa naadung Nkai, nemeyielounoi nkoitieii enyena! 34#Isa 40:13Ana nejo lkigerot,
<<Amu ng'ae oteyielo mparrunot e Laitoriani Nkai,
anaa ng'ae oidim aitaarriyiana ninye?
35 #
Ayu 41:11
Anaa ng'ae oichoo ninye sile,
eji metaa kelaaki ninye ꞉Nkai?>>
36 #
1Lkor 8:6
Amu kore ntokitin pooki naa ninye eing'uaa, naa ninye sii eichiwue naa ninye etiyie ntokitin pooki peetii.
Metaa nenye nkisisa ntarasi, aamin!
လက္ရွိေရြးခ်ယ္ထားမွု
Rroman 11: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy