Rroman 12
12
Nkoitiei ng'ejuk nisiaayieyie Nkai
1Naaku lalachera o nkanachera, kore tankaraki lng'ur le Nkai litumo, kaitaarriyian ntae payie inchooyoyo seseni linchi metaa lasar oichu, osinya neiting'id Nkai, amu ana nkoitiei naichiaakino tinisiaayieyie Nkai. 2Emiduaaya mbaa e ana kop, kake enchoo eibelekeny ntae Nkai aiteng'ejuk mparrunot inchi, payie itumtum aatisipu inia nayieu Nkai nara supat, neiting'id ninye, necho.
Nkichoorot e munyani e Nkai
3Amu kore to munyani e Nkai naaichooki, kaitanap pooki ng'ae otii atua ntae payie medol koon ajo kera toki aitalang nkiririkinoto enye, kake nchoo eparraa pooki ng'ae ana naichiaakino, te risioroto e nkurukoto naichoo ꞉Nkai ninye. 4#1Lkor 12:12Amu kore ana nikiata rubat kumo te sesen obo, nemeata rubata nemeata siaai enye, 5nejia siake etiu, kore iyioo kira kumo, ikira sesen obo taatua Kristo, nemeata sii tee iyioo lamara rubata e likae. 6#1Lkor 12:4–11Ikiata nkichoorot naapaapaacha te nkiririkinoto e munyani e Nkai naichooki iyioo, naaku kore ilo oata nkichooroto e naibon e Nkai, nchoo easichere ana nairirikino to nkurukoto. 7Kore ilo oata nkichooroto e nkisiayiare, nchoo eisiaaichiere inia kichooroto. Kore laiteng'enani nchoo eiteng'enichiere nkichooroto enye. 8Kore ilo oitogol lkulie, nchoo eitogol te inia kichooroto enye, naa kore ilo oichooyo, nchoo eichooyo ta ltau supat, kore ilo oitacheki lkulie ta nkanisa, nchoo eitacheki to nyuata, kore ilo oing'er, nchoo eing'er te ng'ida.
Entewueni te nchaman
9Meata nchaman nkitaakino, embai ntorrok nimbung'bung aaitirrichaki mbaa supati. 10Entachamata katukul ana lalachera o nkanachera, ninchocho metaa meata lemenyok aaitodolu nkanyit alang likae. 11Nimichalulu, kake entaa loaata yieuna ninyokiekie taa ltauja, nisiaisiai Laitoriani. 12Ning'idada taatua siligi linchi, ning'iriri taatua sina, niomonmon nkata pooki. 13Entang'ar ntoki niatata o lolo sinyat lemeitoki eata, niakuku looitoomon lomon taa nkajijik inchi, 14#Mat 5:44; Luka 6:28nimayianyian lolo ooitam ntae sina, entamayian emidek ninche. 15Enting'idata o lolo oong'ida, ninchirchir o lolo ooichirita. 16#Rach 3:7Enchoo metaa irara loaata mparrunoto nabo, nimitumtum mparrunot niliepiepie ate aaitalang lkulie, kake entuchulare abaki ltung'ana oomena, nimidoldol ate aajo irara ng'eni. 17Emilaakinyie ltung'ani ntorno to ntorno, entonyok entaas inia nara supat tekue ltung'ana pooki. 18Kore ake tanaa keidimai, entewueni te seriani o ltung'ana pooki. 19#Nkit 32:35Loaachami, emintalak ltung'ani teneitaas ntae ntorno, entung'ai metumo ngoro e Nkai, amu keigero ajo, <<Etejo Laitoriani, nanu oitalakicho, naa kaitalaku nanu.>> 20#Rach 25:21,22Alang niasias inia, entaas najo Lkigerot,
<<Teneata lmang'antita lino sumach, nchoo ndaa,
teneata nkure, nchoo ntoki namat,
amu tininko nejia, naa kenya anyit te inia naitaasa ntae.>>
21Emincho ntorrok emir ntae, kake entimir ntorrok too supati.
လက္ရွိေရြးခ်ယ္ထားမွု
Rroman 12: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy