Génesis 37
37
1Jacob Canaán yakat watwi yalahna dai, witing papangni kidika pāni yakat ma as as yalahwādai yakat. 2Adika kuduh Jacob sulani balna yulnina.
José dawi wirahni balna karak
José witing kurih 17 duwa kat wirahni balna karak kalpakwi sīp maintatalwadai, dawak witing wirahni balna kidika laih papangnina Jacob yalni binina Bilha dawi Zilpa kaupak yakna dai kidika. Dawak José witing papangni yakat kiwi kalyulwadai wirahni balna dutni yayamwa kidika.
3Israel kidika witing walanibis José yakat tanit dalani talwadai walanibis as balna kidika karak dawakat, kat witing kidika muihbarak kalwakat José kidika batahndana dai kidika bahang. Kidika bahang parakni yaksihni as yamwi kalana dai. 4Kaunah wirahni balna tatalwak witingna papangnina kidika José yakauh tanit dalani talwadai, witingna karak dawakat, kaput bahang dutni kalkukulna, dawak bik pararaswasdai.
5José witing ma as kat amana talwi wirahni balna yakat diyulna; kaunah witingna baisa dutni kalkukulna, 6kat aput diyulna dai bahang:
—Dakanauh, amana talnayang kidika manayulki ki. 7Amana kau talnayang, mayang bitik yamak yakat bangmayang dai, dawak plawar minik kidika wirdi sitda dai, dawak yang wirtik sitnayang kidika sirihni yaklauna, kaunah manna wirta sitnamana kidika laih yang wirtik sitnayang yaihnit yakat aiwi awai dawi rispik sainni yayamna.
8Kaput dawak wirahni balna yaklauwi nangnitlalana:
—¿Yulnin kultaman, man kidika yangna kingkina awamayah, dawak yangna akat yanataihmayah?
Dawak baisa dutni kalkukulna, amana talwi diyulna kidika yulni.
9Usnit yak José amana ūk talwi wirahni balna yakat diyulna. Aput diyulna:
—¿Manna amanglana manah yang amana, yang talnayang kidika laih, ma, waiku dawak yala 11 yang akat rispik sainni yayayamna kidika?
10José yaklauwi amana talna kidika papangni dawak wirahni balna yakat bik diyulwak, papangni yaklauwi bilwi aput kalyulna:
—¿Ais tanka yulnin kultaman amana talnaman kidika balna karak? ¿Kaput laih nanangma, wirahma balna dawak yang bik man yakat rispik matanakiyah?
11Dawak wirahni balna laih kaltutumwadai,#Ap.w 7:9. kaunah papangni laih uba kulwa dai adika yulni.
José kidika wirahni balna yaklauwibakanpapamna
12Mani as kat José wirahni balna kidika Siquem yakat uina, papangnina sīp balna kasninna sihrsihr walwi uina. 13Dawak Israel yaklauwi José yakat kalyulna:
—Talah, man wirahma balna kidika Siquem yakat sīp maintalwa bangki. Dukih yawi wirahma balna yakat yawa ditalna atnam.
José yaklauwi nangnitlana:
Yang yawik ditalki.
14—Yamniki —kalatna Israel yaklauwi—, yawatalah wirahma balna ampat bangyah dawak sīp balna bik, dawak usnitkat aiwa yayultah yulni kidika.
Israel yaklauwi José kidika sihna Hebrón sauni langni kaupak, dawak José witing Siquem yakat kiuna, 15dawak kidika yakat ta disna. Kaput laih muih al as kalpakwi kalyulwi dakana:
—¿Ais waltalikmahn?
16—Wirahki balna waltalikyang —kalatna José yaklauwi—. ¿Sipmahn yayulnam angkat sīp maintalwa bangpa?
17—Akaupak uman kalahwi uina —kalatna al dai kidika yaklauwi—. Dotán yakat mawi atwi yuyulwak dakanayang.
José witing wirahni balna kidika walwi kiwi Dotán kat. 18Witingna kaltatalna naikaupak, José kidika kaiwak, dawak baisa yaihnitna yakat kiwi kawas yakau witing yulbabauna īna atnin. 19Dawak witingna biri biri yuyulna:
—¡Talnauh, amana talyang muihni dai kidika kaiwi! 20Aiwanang kat idanang; usnit kat pa kudungni as kau apamdarang, dawak yuldarang asangpas dini anyang as kaspamna. ¡Dawak taldarang amana talna balna dai kidika karak ais kalahwarangpa!
21Adika yulni Rubén dakawi witing wirahni kidika laihwi yaknin kulna bahang, yulna:
—Īdas kawang. 22Ā ututuhwinih. Kauhmak wanilang paskau pa kudungni as sakkidika yakat apamtanauh, kaunah manna tingmana maisihni laih yayamwinih.
Rubén witing dukih lanadai wirahni José kidika laihwi yakwi papangni yakat watwi uiwi kalana atnin; 23kaunah José witing wirahni balna bangyakat kiwi kana kat, witingna laihwi parakni kidika yayakna, 24dawak witingna laihwi pa kudungni pas yakat ahana bahang pāni kudungni kidika laih pāni manah dawak buhni sakdai. 25Usnit kat witingna yalahwi di kakasna.
Kidika yakat, witingna tatalwak ismaelita balna kidika Galaad kaupak aiwabang dai, dawak kianinamil minit yakat ilwi duahaina pan yani walapni satni balna, bahang kidika laih Egipto yakat duwi uiwadai. 26Dawak Judá yaklauwi wirahni balna yakat diyulna:
—¿Mayang mawirahki idi ais as minit dudarangyah, dawak usnit kat dauna kidika yulni malna atnin? 27Tanit yamni karang ismaelita balna yakat bakanpamdarang kat, īdarang karak dawakat, kat adika laih mayang mawirahki bahang.
Wirahni balna laih yamni dakakana yulwa kidika, 28dawak Madián muihni balna kidika munah bayayakwak, José wirahni balna yaklauwi witing kidika pa kudungni kaupak yakwi bakanpapamna lalah 20 minit. Kaput laih José kidika Egipto yakat duwi uina.#Ap.w 7:9.
29Rubén nawatwi kaiwi talna pa kudungni yakat, bahang José kidika disdai, dawak parakni iswi bisna kulnin dalani duwa kidika yulni. 30Usnit kat wirahni balna bangyakat kaiwi diyulna:
—¡Muih albin dai kidika diski! ¿Waralaih ais yamkiyah?
31Kaput laih José parakni kidika duwi kuts as ihina kidika āni kau kakahna; 32usnit kat papangni yakat sisihna adika yulni karak: “Adika yaknayangna. Yamni laihta talah, man walambis parakni pa, kidika awas kat ūk pa.”
33Jacob witing amanglawi yulna: “¡Agha, adika ki walakibis prakni! Asangpas dini anyang as kaswi biswi dawi kaspamna.” 34Dawak Jacob witing parakni iswi biswi dawi kulnin bukna parakni kidika kana, dawak ma mahni kaidana walanbis dauna kidika yulni. 35Walanbis ahal dawak walanbis yayal balna kidika bik witingna walaniānin yayamna, kaunah witing dukih kalawasdai, walaniahawa kidika; nawatnikauh laih, walanbis dauna kidika yulwi kaidi, aput yulwadai: “Walakibis yulni kulnik bukna adika ban awaki, mampat yawik witing karak kalpakki kat, dauna balna pasyakat.”
36Madianita balna José kidika Egipto yakat duwi uiwi wauhwi bakanpapamna, al as ayangni Potifar yakat, bahang witing laih fero dini yamyang#37.36 Dini yamyang balna: Y.y. ahal yal dunin sip awas balna kidika. dai, Egipto kingni, dawakat kalbauyang balna taninatuna dai.
လက္ရွိေရြးခ်ယ္ထားမွု
Génesis 37: SUMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia Sumo
Texto © Sociedad Bíblica de Nicaragua 1998