Génesis 38
38
Judá dawak Tamar karak
1Kidika mani balna yakat Judá laih witing wirahni ahal balna kaupak dakwi kalahwi muih al as ayangni Hira kidika ūni yakat kiwi yalahna, bahang kidika alni laih Adulam tawanni kaupak dia. 2Kidika yakat cananeo kaupak al as ayangni Súa, kidika walanibis yal kidika duna. Kaput laih witingna kalduduwak, 3yal kidika muih karukdana, dawak witing walanbis al as yakna, bahang kidika ayangni laih Er paknadai. 4Dawak watwi witing muih karukdana, bahang walanibis ūk yakna, bahang kidika laih ayangni pakna dai Onán. 5Baisa watwi walanbis ūk duna, dawak kidika laih ayangni pakna Sela, bahang Judá laih witing Quezib yakat likkat batahndana dai.
6Judá witing walanbis Er yakat yal kalana, kidika yalni ayangni laih Tamar. 7Kaunah Dawan yamni talwas dai Er dutni yamwa kidika, bahang sangnika dakna. 8Kaput laih Judá yaklauwi Onán yakat kalyulna:
—Man tingmamak karak kaldutanauh, bahang kaput laih wirahma bahaka tingnimak pranimis kat yamma,#Dt 25:5-6. kaput laih man wirahma kidika sulani duna karang man munah.
9Kaunah Onán amanglana, walabis yakwarang balna kidika laih witing walanbis balna awas karang kidika. Kaput bahang witing tingnimak yal yakarak kalalangwa bitik kidika yamwadai yal kidika muih karuk danin-awas, kat witing kulna dai bahang wirahni kidika sulani dunin-awas witing munah. 10Dawan witing dutni talna, Onán yamwa kidika, bahang witing bik sangnika dakna. 11Kaput dawak Judá yaklauwi unisah yal Tamar yakat kalyulna:
—Tingmak papangma uni yakat yawa sak-awah, angkat mani walakbis Sela kidika muihbarak kalwarang kat.
Rahm kidika laih, Judá kulwadai walanibis Sela bik sihm kaput dauwarang, wirahni balna dadauna kaput. Kaput laih Tamar kidika papangni ūni yak kiwi yalahna dai.
12Ma balna bayakna dawak Judá yalni dauna, Súa walanbis yal dai kidika. Judá witing kulnin bukna balna kidika bayak dawakat, Timnat tawanni yakat kiuna, witing warkni kalahyang balna kidika Timnat pāni yakat sīpni balna butuni kakahrwa bangdai, dawak witing karak kaltalyang muihni yamni as duwa dai Adulam kaupak ayangni laih Hira, bahang witing minikdawak uinadai. 13Tamar witing dakana unisah kidika Timnat yakat kiuna atwak sīp balna butuni karhna, 14dawak Tamar, tingmak asnina kawa dai kidika yakpamwi dawi tunan yakat asna as suruhmna muih amangnilanin awas yulni, dawi kiwi Enaim tawanni kiwi kawa yakat yalahna bahang kidika laih Timnat tani kiwa yakat ki. Kat witing laih amanglana dai Sela kidika uman wahma kalnadai bahang, kaunah baisa witing karak kalawak kalduduwas dai bahang.
15Judá witing talwi kulna, kidika yal laih tapas yalni kulna, kat witing laih muhni asna kau putna bahang. 16Kaput laih witing ta kaupak kalahwi yal kidika yaihnit yakat kiwi kalyulna, dawak witing amanglawas bahang unisah yal kidika, kalyulna:
—¿Yadatang kat man karak alangwakuh?
—¿Man karak alangwing ais yāmayah? —yal kidika yaklauwi kalyulwi dakana.
17Yang kutski balna kidika paskaupak as yaktik masihki, —Judá yaklauwi kaput kalyulna.
—Yamniki —kaltalna yal kidika yaklauwi—, kaunah man dima as yatah kuts kidika yasihma kat biritik maki.
18Judá yulwi dakana:
—¿Ais kat dukih mawih yang manik kidika?
—Man tampma kidika wahni kauna yatah, dawak tingma kau tulmanah kidika bik —yal kidika yaklauwi nangnitlana.
Dawak Judá witing yaklauwi kalana dawak witing karak kalangna, kaput laih yal kidika muih duna. 19Usnit kat Tamar witing kiwi asnina dai kidika yakpamwi watwi tingmak asnina dai kidika kana.
20Kidika usnit kat Judá yaklauwi kuts dai kidika sihna Adulam kaupak al dai kidika karak, kaput laih witing dini balna kidika biriwi sihna atnin yulni, kaunah yal dai kidika walwi yakwasdana. 21Kaput laih kidika pāni muihni balna yakat diyulwi dakana:
—¿Angkat sakyah kidika tapas yalni Enaim kaupak ta kung yakat yalahna sakdai kidika?
—Akat, tapas yalni as bik diski —kaput kalyuyulna.
22Kaput laih witing nawatwi kaina Judá sakdai yakat, dawak kalyulna:
—Yalni kidika waltik yaktas danayang, dawak kidika pāni muihni balna bik taldaski atwi tapas yalni as kidika pāni yakat.
23Dawak biri kalyulna:
—Kaput kat kidika di balna dai kidika duwang, kaput laih muih as bik sarahni maiyulwas karang; kaunah amanglanin ki yang kuts bin kidika sihnayang kaunah man yaktas danaman.
24Waiku bās bayakwakat Judá yakat aiwi kalyuyulna:
—Tamar, man umasah yal kidika ahal ūk karak kalangna, dawak muih karukdana.
—¡Yaktanauh dawak bustanauh! —kaput Judá laih parasni sarahwi yulna.
25Kaunah witingna mahka laihwi yayakwa kat, yal kidika unisah al yakat adika yulni sihna: “Adika dini balna daniwan kidika yaklauwi muihkaruk yayamna. Man yamni talah, adika tamp wahni kauna, dawak tulninah adika bik.” 26Judá dini balna kidika talwi amanglana dawi yulna: “Witing yamni yamna, kaunah yang laih dutni yamnayang, kat yang walakbis Sela karak kalating duwas dana bahang.” Dawak watwi witing karak kalangwasdana.
27Tamar muihbin duna kat sūtki dai. 28Batahnwak minitni yakat as laih tingnipas yakna. Dawak yal maintalwa sakkidika yaklauwi trit pauni kau sitna dai dawak yulna: “Adika tatuna kalahna.” 29Kaunah kidika minitni yakat muihbin kidika tingni apamna, dawak wirahni as kidika kauh tatuna batahnna. Kidika bahang maintalwasak yalni kidika yulna ayangni Fares,#38.29 Hibru kau, Fares kidika tanka laih sulihni, itikna kau sulihni kidika. pakna, kat yulna: “¡Kat man lawa ta apahnaman bahang!” 30Usnit yak muihbin al ūk kidika batahnna, tingni yakat trit pauni sitnadai kidika, dawak ayangni pakna Zara.
လက္ရွိေရြးခ်ယ္ထားမွု
Génesis 38: SUMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia Sumo
Texto © Sociedad Bíblica de Nicaragua 1998