Génesis 35
35
Papang yaklauwi Jacob yakatblisin kalawi Betel pāni yakat
1Papang yaklauwi Jacob yak kalyulna: “Lawa yawa Betel yakat yalahtah. Dawak kidika pāni yakat sakripais busnin pāni as yamma Papang yakat, witing man yakat lāih kalahna kidika, man wirahma Esaú yamaniduta iranaman mani dai yakat.”#Gn 28:11-17. 2Kaput laih Jacob yaklauwi wanaihni balna dawak witing karak minikdawi uina balna kidika bitik yakat diyulna:
—Manna pasmangna kau dawan dauh wayani balna dutamana kidika bitik yaktanauh, kalsuhta asmanana balna bik ūk awanauh. 3Sirihni mawanang Betel yakat, kat kidika yakat sakripais busnin pāni as yamkiki Papang risnipik kau kat yang kulnik bukna mani kat witing yaklauwi ilp yana dai bahang, dawak bik yang karakdai bahang angkat angkat pāni lik-atnayang balna yakat.
4Witingna yaklauwi Jacob yakat kalalana dai dawan dauh wayani balna bitik duduwadai kidika, dawak tapanina kau di tuyulni alalahwadai kidika bitik yakwi kalana, dawak Jacob yaklauwi kirah panan as saryakat nuna, kidika laih Siquem yaihnit ulah yakat dai. 5Witingna kalahwi uina kat, Papang yaklauwi yamna muih balna yaihnit kau balna bitik yamaduna atnin, kaput bahang Jacob walanbis balna yakat uiwi uiwas dadana.
6Jacob dawak witing karak muih balna uiwadai kidika bitik laih Luz yakat uiwi kakana, kidika tawanni nuhni kidika laih ayangni ūk bik duwadai kidika laih Betel duwak kidika laih Canaán yakat pakki. 7Dawak yakat sakripais busnin pāni as yamna, dawak ayangni pakna kidika pāni El-Betel,#35.7 Hibru kau, El-Betel kidika tanka laih Betel Papangni. kat witing wirahni kaupak kirana dai yakat, Papang kidika lāih kalahna dai witing yakat. 8Dawak yakat bik Débora dauna, yal as Rebeca yakat maintalna dai kidika, dawak kirah panan dinit yakat nununa dai, Betel yaihnit ulah yakat. Jacob yaklauwi kidika pāni ayangni pakna “Kaidana kirah panan dinit yakat”.
9Dawak Jacob witing Padam-aram kaupak nawatwi kaiwak, Papang watwi witing yakat lāih kalahna blisin kalana 10aput:
“Man ayangma laih Jacob timan,
kaunah waralaih baisa kaput mayulnaawaskarang;
warmani kaupak man ayangma laih Israel.”#Gn 32:28.
Papang yaklauwi ayangni satuk wirlana usnit kat, 11dawak kalyulna:
“Yang kuduh Papang paraski bitikdutayang kidika;
man walamabis mahni dutah.
Man kaupak nisan as kalahna karang
dawak bik tawan manas kalahna karang,
dawak man sulama balna kaupak
king kalalahna karang.
12Yang sau dianayang kidika
Abraham dawak Isaac yakat bik,
sihm man yakat bik matayang,
man kaupak usnit yakat diana awakisulama balna yakat.”#Gn 17:4-8.
13Papang Jacob karak yulbabauna pāni kaupak mahka kiuna kat, 14witing kipala as dungsakna, kidika laih ū rahni as kapat, Papang yulkalbauna pāni yakat; usnit kat witing yaklauwi Papang dini yakna, minit yakat dia utuhna dawak wain bik utuhna dai, 15dawak kidika pāni laih ayangni pakna Betel.#Gn 28:18-19.
Raquel dauna
16Usnit kat Betel kaupak uina; kaunah baisa apis naikau dai Éfrata kidika bahang yakat Raquel laih muihbin duna, muihnibin dunin awarni kana kat dutni palni dai. 17Kidika minitni yak dadasni palni dai, bahang maintalyang yalni kidika kalyulna: “Yamaduwinih, man muihbin al ūk dunaman.” 18Kaunah witing kidika daunin manah danadai, dawak witni yak wingnita puhna kidika yakat yulna Benoni#35.18 Hibru kau, Benoni kidika yulni tanka laih, kulnik bukna walanibis sihm kapat paruh yulwi. kalatna muihnibin al yakat, kaunah papangni laih ayangni paknadai Benjamín.#35.18 Hibru kau, Benjamín adika yulni tanka laih tingkipal walanibis, sihm kapat paruh yulwi.
19Kaput laih Raquel kidika dauna dai, dawak Éfrata tani yakat nununa, waradika laih ayangni Belén. 20Jacob yaklauwi sauniū minit yakat ūni kapat paknadai, kidika sauniū minit yakat ū kapat paknadai kidika warmani kat Raquel sauniū kidika lāihki.
21Dawak Israel witing mahka tani yak kalahwi kiuna, ban kiwi makau kilwi talnin pāni ayangni Edar kidika tanit yakat kiwi ūni labanni yamna. 22Israel kidika pāni duna usnitkat kidika pāni yakat, Rubén laih kiwi Bilha karak kalalangna, kidika yal laih papangni yalni bin dai. Dawak adika yulni dakana kat, kasak kulnin daukalna dai.#35.22 Kasak kulnin daukalna dai: grik kau kaput ulna. Hibru kau laih adika yulni kalahwaski.
Jacob walanbis balna
(1 Cr 2:1-2)
Jacob walanbis balna kidika laih 12 dai. 23Lea karak walanbis balna yakna kidika laih Rubén, witing walanbis barakni kidika; Simeón, Leví, Judá, Isacar dawak Zabulón. 24Raquel karak yakna kidika laih José dawak Benjamín. 25Raquel dini yamyang Bilha karak yakna dai kidika laih balna laih Dán dawak Neftalí; 26dawak Lea dini yamyang yal Zilpa karak yakna kidika balna laih, Gad dawak Aser. Adika balna kuduh Jacob walanbis balna dai kidika, Padam-aram yakat batatahnna dai kidika.
Isaac dauna
27Jacob witing Mamre yakat kiunadai papangni Isaac yakat talna atnin, kidika tawanni nuhni laih ayangni Arba, kidika awaskat Hebrón. Kidika yakat Abraham dawak Isaac, witingna yalalahna dai.#Gn 13:18. 28Isaac kurih 180 duwa kat dauna dai. 29Witing muihni bararak balna yakat kiwi kalpapakna muih barak kalna mani kat, dawak witing walanbis Esaú dawak Jacob karak nununa.
လက္ရွိေရြးခ်ယ္ထားမွု
Génesis 35: SUMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia Sumo
Texto © Sociedad Bíblica de Nicaragua 1998