Génesis 34
34
Dina risnipik disna kidika yulnibiriwi diyayamna kidika
1Dina Lea yaklauwi Jacob yakat walanbis as kalana dai kidika; witing kiunadai kidika pāni yak yayal sirarau balna yakat awaihwi talna atnin yulni; 2kaunah Siquem witing talna dai, heveo muihni Hamor walanibis dai kidika, bahang witing laih kidika pāni yakat tunan muihni dai, dawak Dina yakat witing parasni kau laihwi laktuswi witing karak kalangwi risnipik dis kalyamna dai. 3Kaput kaunah, Dina yakat dalani palni talna bahang witing walna amput dawi kulnin laihnin kidika. 4Kaput laih witing papangni Hamor yakat kalyulna:
—Yawa yulta yatah yal sirau kidika. Witing kidika yalki dukih yawi.
5Jacob witing amanglana walanbis yal Dina kidika Siquem yaklauwi laihwi dutni kalyamwi risnipik dispamna kidika. Kaunah witing walanbis ahal balna kidika tinglau maintalwa bangdai bahang walang yakat, witing di as bik yulwas dai walanbis balna kidika aina kat. 6Kaput laih Siquem papangni Hamor kidika Jacob yakat kiwi kaltalna witing karak yulbauna atnin yulni.
7Dawak Jacob walanbis balna kidika walang kaupak aiwi dakakana di kalahna kidika, bahang witingna kulninna daukakalna, kidika laih dutni kalyamna nuhni as bahang Israel yakat, kat Siquem yaklauwi Jacob walanibis yal yakarak kalalangna kidika yulni. ¡Kidika laih yamnin dini awasdai bahang! 8Kaunah Hamor yaklauwi yuldibauna dai witingna karak, bahang aput diyulna dai:
—Walakibis Siquem kidika manna wirahmana yal yakat uba dukih kalawi, kaput bahang, plismana datanang kat duwang witing karak 9dawak manna kidika yangna karak kalwanaih malahwang; kaput laih yangna, manna walamanabis balna karak kaldutanaki dawak biri manna yangna walakinabis yayal karak kaldutanama. 10Manna watta yalahtanauh yangna karak. Yangna saukina adika laih man tingmana yakat karang; bahang kidika yakat yalahtanauh, di wauhta bakantanauh, sau bik bakanta dutanauh.
11Siquem bik yaklauwi diyulna Dina wirahni ahal balna dawak papangnina yakat bik:
—Yang manna kalmana dinit yakat buktik yultayangna, agha tinauh. Dawak manna ais yultanama kidika manana karang. 12Yang ising kultas yang minit kalnin as tanit nuhni kaunah, dawak bik di manas dauh kalaki, yang lawik; kaunah datanang kat sirau kidika dukuh.
13Kaput kaunah, Siquem yaklauwi Dina yakat risnipik dispamwi kalana bahang, Jacob walanbis balna yaklauwi biriwi nangnitlalana witing dawak papangni Hamor yakat bik, alas lani kau, 14dawak witingna yakat diyuyulna:
—Yangna wirahkina kidika al as kau sip kalatasyangna, witing Papang sainni duwas kidika, kaput bahang yangna nikingna yakat asalni as karang. 15Yangna agha atnikna sipki aput karang kat: manna kidika yangna apat awanama kat; yuldarang kat, manna pasmangna yakat muih ahal balna kidika bitik Papang sainni duduwarang kat. 16Kaput laih manna, yangna walakinabis balna karak kaldutanama, dawak biri manna walamanabis balna karak kaldutanaki; dawak manna pasmangna yakat yalahtanaki dawak mayang laih tawan aslah malahwarang. 17Kaunah manna yamtas awanama kat, Papang sainni dunin kidika, yangna akaupak yawanaki pa ūk, dawak wirahkina yal kidika duyawana ki.
18Hamor dawak walanbis Siquem karak witingna yamni tatalna dai witingna yuyulwa kidika. 19Ma balna didiswas, wahma kidika Papang sainni duna, kat Jacob walanibis yal kidika dukih kalawa bahang. Kat Siquem kidika kalwanaih balna pasyakat tanit nuhni kalkukulwadai bahang, 20witing, dawak papangni Hamor karak uina dai, tawan nuhni kiwi kawa yakat, kidika pāni yakat di ais ais balna yulbauwi tatalwadai bahang, dawak kidika pāni yakat muih balna yakat diyuyulna:
21—Adika ahalni balna laih mayang karak kaltalyang yamni balna ki, dawak witingna akat watwi yalahwi wark kalalahwarang, adika pāni akat, kat sau laih manas palni ki witingna niningna yakat; bahang mayang sipmayang witingna walaninabis karak kaldunin, dawak witingna bik mayang mawalakibis balna karak kalduduwarang. 22Kaunah, waralaih mayang tawan aslah malahwang, kaunah witingna adika dukih diawi mayang yamdarang kat witingna akat watna atnin, kidika laih mayang ahal mayang bitik Papang sainni duna atnin, witingna yayamwa kaput. 23Witingna dinina balna bitik, tingninalau balna bitik mayang madiki karang. Bahang mayang laih agha atnin manah ki, bahang kaput laih witingna watwi yalalahwarang mayang karak.
24Tawan nuhni pasyakat wawahma, kalbaunin sip balna kidika kurihnina,#34.24 Y.y. Tawan nuhni dūrni munah kalalahwa balna bitik. Kalbauyang muihni balna laih kaput yulbabauwi. witingna bitik laih yamni tatalna dai Hamor yulwa kidika, dawak walanibis Siquem karak bik, dawak uiwi Papang sainni duduna. 25Kaunah Simeón dawak Leví, Jacob walanbis ahal kidika, Dina wirahni ahal balna, bahang witingna tawan nuhni yakat uina ma bās bayakwak, muih ahal balna kidika baisa witingna muihnina Papang sainni duduna kidika dalani dakakawa kauna dai, bahang tingnina yakat isparah duduwa bahang bitik ihina dai, niningna kauh yaklaunin sip-awasdai bahang. 26Isparah kau Hamor kidika ihina dawak walanibis Siquem kidika bik; usnit kat witingna wirahnina yal Dina kidika Siquem ūni kaupak yakwi duwi uina. 27Dawak Jacob walanbis ahal ūk balna kidika bik uinadai, dawak muih dadauna balna minitna munah bayakwi tawan yakat di balna kidika bitik duduna, wirahnina yal risnipik dispapamna kidika biriwi kalyamnin yulni. 28Duwi uinadai, sīp, biriku dawak turuh yayal bik, tawan pasyakat bangdai kidika dawak walang yakat bangdai kidika balna bitik; 29ū balna yakat di balna kidika bitik laih mamalna dai, dawak laihwi duwi uinadai silak yakat walabis balna dawak yayal balna bitik. 30Kaput dawak Jacob yaklauwi walanbis balna Simeón dawak Leví balna yakat:
—Man lawa yang akat dutni yayamna mana. Waralaih adika pāni muihni balna yang akat dutni yakukulwarang, cananeo dawak ferezeo balna bik. Witingna aslah kalahwi nikingkauh yaklalauwarang, kat yang laih muih ahal bulah dutayang bahang, mai-ihiwarang dawak wanaihki balna bitik yakat bik ihiwarang.
31Kaunah witingna biriwi kalyulna:
—¿Witing kidika yangna wirahkina yal yakat pini yalni as kapat kaldunin dai katpah?
လက္ရွိေရြးခ်ယ္ထားမွု
Génesis 34: SUMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia Sumo
Texto © Sociedad Bíblica de Nicaragua 1998