Génesis 33
33
Jacob dawak Esaú karakwatwi kulnin yamni kidika duduwi
1Jacob witing talwak wirahni Esaú kidika ahal 400 karak kalpakwi aiwakat, walabis binina kidika sahwi yakna Lea, Raquel dawak dini yamyang yayal bu kidika karak. 2Tatuna dini yamyang balna bu kidika walanina karak āna, kidika balna usnit Lea walanbis balna karak āna, dawak witni yakat laih Raquel walanibis José kidika karak āna dai. 3Kidika usnit kat tanitna yaklawi kiuna, dawak witing limbabahwi muhni sau kat lakna wat tiaskaubu, wirahni kidika yaihnit yakat kiuna kat. 4Kaunah Esaú witing kiri kiwi wirahni yakat wakaihwi umna. Bahang albupak kakaidana. 5Usnit kat Esaú witing yayal balna dawak walabis balna yakat talwi yulwi dakana:
—Adika balna, ¿wais yah?
—Kidika balna kuduh man dima yamyang yakat Papang yaklauwi walanibis kalana kidika —Jacob kaput yulna.
6Kaput laih dini yamyang balna kidika yaihnit yakat uiwi limbabahwi muhnina sau kat lalakna; 7kidika usnit kat Lea witing walanibis balna karak yaihnit yakat uiwi sihm kaput yayamna, dawak witni yakat Raquel dawi walanibis José karak limbabahwi sihm yayamna. 8Dawak Esaú yulwi dakana:
—¿Man ais yamnin kultamanh, kidika uduhna balna karak kalpaktayang kidika?
—Kulnam yamni kidika dunik yulni —kalatna Jacob yaklauwi.
9—Dikah, yang wirahki, yang manas dutayang. Man dima balna kidika dutah —Esaú yaklauwi kaput kalyulna.
10Kaunah Jacob wat wat kalyulna:
—Dikah, plisma. man kulnam yamni kidika dunayang kat, adika minitdis dini adika dutah, kat man muihma nuhni palni talnin laih sihm Papang talnin kapat ki, kat man yamni yadutada bahang. 11Kalma dinit yakat buktik yultayang, dutah prisant duaitik matayang kidika, kat Papang yaklauwi di duyang yayamna bahang, yang dukih yawa dini diski.
Jacob wat wat yulna, witni kat Esaú witing prisantni balna kidika duna dai; 12kaunah yulna:
—Yamniki, akaupak mahka mawanang. Yang man tamat yakat yawaki.
13Dawak Jacob yaklauwi nangnitlana:
—Yang wirahki dalani, man amanglataman muihbinina laih parasninadis ki, dawak bik sīp balna yakat bik kulnik ki, turuh yayal walaninabis yayakna balna kidika bik; ma as pasyakat disuhlakwarang kat sipki bitik dauna atnin, sīp balna kidika. 14Tanit yamniki man dima yamyang tanit yakat lawa yawama kat; yang laih tani yawaki, yang takit yakat tinglau balna lapakwi uiwa kaput, dawak bik muih binina uiwa kaput bik, Seir yakat kalpakdarang kat.
15Esaú yaklauwi kalyulna:
—Yamni ki. Datang kat muih ahal yang karak bangkidika buas makuh.
Kaunah Jacob yaklauwi nangnitlana:
—¡Dikah plisma! ¿Ais yamta man kalustamahn?
16Sihm kidika mani Esaú laih witing Seir yakat kiuna dai. 17Dawak Jacob laih Sucot yakat kiuna, dawak kidika yakat witing ūni as yamna, dawak tingnilau balna panina bik yamna. Kidika bahang kidik pāni ayangni pakna Sucot.#33.17 Hibru kau, Sucot tanka laih, pan tingni kau ū kapat yamna.
18Jacob witing Padam-aram kaupak kaina kidika yamni Canaán yakat kaiwi bayakna dai, dawak Siquem muhnit yakat ūni labanni pakna. 19Lalah dadasni 100 karak sau pis#Jos 24:32; Jn 4:5. as bakanna, Hamor balna walaninabis kaupak, Siquem papangni, dawak kidika yakat ūni labanni pakna. 20Usnit kat sakripais busnin pāni as yamna, dawak ayangni pakna El-Elohe-Israel.#33.20 Hibru kau, El-Elohe-Israel tanka laih Papang kidika laih Israel Papangni.
လက္ရွိေရြးခ်ယ္ထားမွု
Génesis 33: SUMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia Sumo
Texto © Sociedad Bíblica de Nicaragua 1998