من الوحي إلى النبي أشعيا 58
58
الصوم المقبول عند ربّ العالمين
1أوحى الله تعالى للنبي إشعيا (عليه السلام) هالكلام:
"نادي بأعلى صوتَك وما تسكُت،
وصرّخ متل البوق وعلّي الصوت،
خبِّر قومي عن تمرّدهُن،
قومي بني يعقوب عن ذنوبهُن.
2يلّي بيتظاهروا يوميّاً إنن إلي طالبين،
وبتطبيق تعاليمي هنّ وعابدين،
فبيتصرّفوا كأمّة مؤمنين صالحين،
فروضُن مش تاركين، وبطالبوني بالعدل والدين،
راغبين بالتقرّب من ربّ العالمين.
3وبقولوا: "يا ربّ، لشو نحنا صمنا، إذا إنت ما شفت؟
وتذلّلنا وإنت ما لاحظت؟"
"اسمعوا! أساساً لمّا صمتوا، صمتوا لمنفعتكُن،
واستغلّيتوا يلّي بيشتغلوا عندكُن.
4ووقتا، رحتوا تخانقتوا وضربتوا بعضكُن،
فمتل هيك صيام مش مقبول عند ربكُن،
ولا بوصّل دعاءكن ولا أنا بسمَع صلاتكُن.
5هلأ هيدا هوّ الصيام الّي أنا بريدُه مفكرين؟
مجرّد يوم متذلّلين، أو روسكُن محنيّين؟
أو بِلِبْس الخيش ومسح الرماد، بالتوبة متظاهرين؟
هيدا بتسمّوه صيام، يوم بيرضي الله ربّ العالمين؟
6الصوم الّي أنا بريدُه هوّ: إنّه تنفكّ قيود المظلومين،
ويتخفّف الظلم عن المساكين،
ويُفرَج عن المأسورين، ويتحرّروا المسحوقين.
7وإنّه تقسْموا اللقمة مع الجوعانين،
وتفتحوا بيوتكُن للمساكين المشرّدين،
وتستروا العريانين،
وتساعدوا قرايبينكُن المحتاجين.
8وقتا بس بِشعّ متل ضيّ الصبح نور وجّكُن،
وبسرعة بيشفى جرحكُن،
وبتمشوا عالصراط المستقيم والبرّ بيسبقكُن،
وبحاوِطكُن جلّ جلالُه، وبيحميكُن وبيحفَظكُن.
9فبتدعوا لله وهوّ بيستجِبلكُن،
بتناجوه، فيقول: "أنّي سميعٌ مُجيب."
هيدا إذا حرّرتوا أبناء شعبكُن المظلومين من التعذيب،
ووقّفتوا الإحتقار والحكي السيّء المُعيب،
10وإذا تخلّيتوا عن لقمتْكُن للجوعانين،
ولبّيتوا حاجة المساكين،
وقتا بس بشعّ بالعتمة نور وجّكُن،
وبيتحوّل لنور ساطع سواد الشرّ الّي حولكُن.
11والهادي الرحمن على الدوام بيهديكُن،
وبوقت الجوع بِطعميكُن وبيِكْفيكُن،
وبيروي نفسكُن بتصير متل الجنّة بالربيع،
وما بتعود أبداً تنقطع ميِّتكُن متل الينابيع.
12ومنكُن رح يعيد بناء كلّ قديم مهدّم وخربان،
وبلقّبوكُن الناس "بمُرمّمي ثقوب الجدران،
ومصلّحي الشوارع لإعادة السّكان."
ويقول الله الرحمن:
13"وإذا احترمتوا يوم السبت وما اشتغلتوا،
وعن أيّ عمل أو مصلحة بهاليوم امتنعتوا،
وهالنهار يوم تنعُّم اعتبرتوا،
وعن الحكي العاطِل سكتّوا،
14وقتا بكون تنعُّمكُن مصدرُه ربّ العالمين،
وبيرفع مقامكُن فوق العالم أجمعين،
وبيعطيكُم يلّي وعد فيه أبوكُن يعقوب النبي الأمين،
وصدق قول الله اليقين."
လက္ရွိေရြးခ်ယ္ထားမွု
من الوحي إلى النبي أشعيا 58: LRT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Sabeel Media