Jona 1
1
Jona Mrẹ Ọrovwohwo Djẹ
1Asakiephana ota rẹ Ọrovwohwo na de bru Jona ọmọ rẹ Amitai rhe, tanẹ, 2Vrẹn, yanran kpo Ninivẹ, orere rode yena, rere wo ghwoghwo kẹ, kidie iyẹrẹ rẹ uvumwemwu rayen tevwe obọ re. 3Ẹkẹvuọvo Jona de vrẹn ọ da djẹ kpo Tarshishi rere ọ djẹ nẹ obaro rẹ Ọrovwohwo. O de kpo erhuru ri Jọpa ọ da mrẹ okọ ro kpo Tarshishi, ọ da hwa igho rẹ ofan, ọ da ro okọ, rere ọ vẹ ayen vwo kpo Tarshish, rere ọ vwọ djẹ nẹ obaro rẹ Ọrovwohwo na.
4Ẹkẹvuọvo Ọrovwohwo da vwẹ aphopho rode rhe abadi na, o kpo ogiribo de rhi dju vwẹ abadi na, okọ na ko muegbe rọ vwọ bẹrẹ. 5Oshọ de rhi mu ihwo ri biẹ okọ na, dohwo dẹdjọ rọye ki kperẹ se; kẹ ayen kpare eghwa re hẹ evun rẹ okọ na phihọ abadi na rere ọ vwọ pharhe kẹ ayen. Ẹkẹvuọvo Jona da yanran kpo ẹtan rẹ okọ na vwẹ obotọ re shevwerhẹ, ovwerhẹ de muo kokodo. 6Ọtiọye na olotu rẹ okọ na da rhe ọ da ta kẹ, Die wo roro, we oghwovwerhẹ na? Vrẹn, se ọghẹnẹ wẹn, Ọkeọvo ọghẹnẹ wẹn me chọ avwanre uko, rẹ avwanre de je ghwo.
7Ayen ohwohwo da ta kẹ ohwo, Wa yanrhe, re avwanre duvwu ite, se avwanre sa riẹn ohwo rẹ okpetu nana wan obọ rọye bru avwanre rhe. Etiyin ayen de duvwu itẹ, itẹ na de mu Jona. 8Etiyin ayen da ta kẹ, Ta kẹ avwanre, ono okpetu nana wan obọ rọye bru avwanre rhe? Didi iruo wo ruẹ? We ohwo rẹ orho vọ? Tivọ wo nurhe? Usun rẹ ohwo ọvo wọ e pha? 9O da te ke ayen. Mẹvwẹ ohwo ri Hibru, me djẹ oshọ rẹ Ọrovwohwo, Ọghẹnẹ re odjuvwu na, rọ ma abadi kugbe otọ ọyaya na. 10Etiyin ọshọ de mu ihwo na gangan, ayen da ta kẹ, Ọnana didi emu wo ruru na! Kidie ihwo na riẹnre nẹ ọ djẹ nẹ obaro rẹ Ọrovwohwo, fikiridie ọ ta kẹ ayen jovwo.
11Etiyin ayen da ta kẹ, Kidie avwanre ru we rere abadi na vwọ fọ kẹ avwanre? Kidie abadi na ra họnra phihọ họnra phihọ. 12Ọ da ta kẹ ayen, We mu vwẹ rere wa kpare ovwẹ phihọ abadi na, etiyin abadi na kọ fọ kẹ ovwan, kidie me riẹnre nẹ fiki mẹ ọye abadi na rhe vwọ họnre gangan na. 13Ẹkẹvuọvo ihwo da pharhe rere ayen bi okọ na ra vware otọ, ye ayen se ruo-o, Kidie ye abadi na kọ rhoma họnra gan phihọ. 14Etiyin ayen de kperi se Ọrovwohwo, Avwanre rẹ wẹ, E Ọrovwohwo, wo jẹn avwanre ghwẹ fiki rẹ ohwo nana-a, wo mu oghwa rẹ ọbara rẹ ekun nana nyẹ avwanre-e; Kidie wọwe, E Ọrovwohwo ri ru obo ri je we. 15Ọtiọye na ayen de mu Jona ayen do phihọ abadi na; abadi rọ họnra na da ghwa fọ riei. 16Etiyin oshọ rẹ Ọrovwohwo de mu ihwo na gangan, ayen de ze izobo kẹ Ọrovwohwo ayen de ve ive kẹ.
17Ọrovwohwo de ji eri rode ọvo rhe rọ Jona; Jona da dia evun rẹ eri na uvo erha kugbe ason erha.
လက္ရွိေရြးခ်ယ္ထားမွု
Jona 1: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.