Ọbe rẹ Ọmraro Ọbadaya Obadaya 1
1
A Cha Vwẹ Idọm Kpotọ
1Emramrẹ rẹ Obadaya.
Enẹ Ọrovwohwo Ọghẹnẹ ta kpahe Idọm:
Avwanre nyo ikun miẹ Ọrovwohwọ rhe,
e ji ji ikọn ro ohri rẹ ẹgborho na:
Vrẹn! e jẹn avwanre vrẹn ra kpare ofovwi bro ra!
2Nighe, mi che ru we hanvwe vwẹ ohri rẹ ẹgborho na,
ka cha jẹn wẹ fia tototo.
3Eheri rẹ udu wẹn ọ phiẹn wẹ,
rọ dia asan ro kpenu,
rọ ta vwẹ evun rẹ udu wẹn,
Ono ri si vwẹ kpotọ?
4Owenẹ wọ rhan kpenu kerẹ Ugo,
owenẹ wọ bọn ẹho wẹn phihọ ohri rẹ isio,
oboyi mi de che si we rhe otọ,
eriyin Ọrovwohwo tare.
5Ọ da dianẹ iji bru we rhe, ọ da dianẹ i rhi ugborho uwe vwẹ ason–
komavọ ayen a guọghọ owẹ te–
ayen e gbi rhe cho obo re da ayen ẹro kẹ oma raye-en?
Ọ da dianẹ ihwo re kọrọ otie bru we rhe,
ayen rhe yan jẹ ibi efafa vwo?
6Obo re gborho ekuakua rẹ Isọ,
ra guọnọ efe rọye mrẹ!
7Otu wọ vẹ ọye gba obọ ejobi phiẹn wẹ,
ayen djẹ wẹ re te ughwru,
igbeyan wọ vwẹ ẹrọ so rhe kpahe ufi hẹrhẹ owẹ–
a rha sa riẹn otọ rọye-e.
8Vwẹ evun rẹ ẹdẹ yena, Ọrovwohwo tare
Me rha sa ghwọrọ evwaghwanre nẹ Idọm
kugbe ẹruọ nẹ Ugbenu rẹ Isọ.
9Ofu ko che dje egba wẹn na, E Teman,
ọtiọye na kohwo kohwo ro che nẹ Ugbenu rẹ Isọ rhe
ughwu ko che hwe ayen.
10Fiki rẹ ozighi wo gbe kẹ oniọvo wẹn Jekọp,
omaẹvuọ ko rhurhu we opharo,
ke che bru we kufia bẹdẹ.
11Vwẹ ẹdẹ ru wo vwo mudia tephe,
rẹ erhorha vwọ ghwẹ efe rọye kpo,
re ihwo rẹ isiorho vwọ vwẹriẹ anurhoro rọye
re ayen vwo duvwu itẹ fiki ri Jerusalẹm,
wọ da họhọ ọvo vwẹ usun rẹ ayen.
12Ẹkẹvuọvo wo gbi rhe mudia vwẹ abọ gbanoma-a
vwẹ ẹdẹ rẹ okpetu rẹ oniọvo wẹ-ẹn
vwẹ ẹdẹ rẹ uyovwi emiovwo rọye-e,
wa rha ghọghọ ihwo ri Juda
vwẹ ẹdẹ ra vwọ guọghọ ayen na-a.
13Wa rha vwẹriẹ anurhoro rẹ ihwo mẹ-ẹ
vwẹ ẹdẹ rẹ okpetu rọye na-a,
wa rha vwẹ abọ gbanoma vwẹ asan rẹ ughwu de hwe na-a
vwẹ ẹdẹ rẹ okpetu rọye,
we rhe gborho ekuakua rọye reyọ
vwẹ ẹdẹ rẹ okpetu rọye na-a.
14We rhe mudia vwẹ adaerha
wọ da nyavwẹ ighuvwu rọye re dje vabọ hwe;
wa da rha vwẹ ihwo rọye ri ghwu chekọ vwọ phia
vwẹ ẹdẹ rẹ uvwerhe rọye.
15Kidie ẹdẹ rẹ Ọrovwohwo na si kẹre ẹgborho na ejobi re.
Kirobo wo ruru, ọtiọye e ji che ru kẹ wẹ,
uruemu wẹn cha rhọma she hwe uyovwi wẹn.
16Kidie kirobo wọ dare vwẹ ugbenu ọfuanfon me na,
ẹgborho re riariẹ owẹ na ke cha da,
ayen ke da, ki gele, ke họhọ ihwo re je dia dẹvo-o.
A Cha Kpare Izrẹl Kpenu
17Ẹkẹvuọvo vwẹ Ugbenu ri Zayọn ka cha mrẹ otu re djẹ vabọ,
kọ cha dia fuanfọn,
uwevwi ri Jekọp kọye che vwo eyenre rayen.
18Uwevwi ri Jekọp kọ dia kerẹ erhanre,
uwevwi ri Jọsef kẹ ọgidi erhanre, uwevwi ri Isọ kẹ ehẹbe,
ke ayen torhẹ ayen ka ghwọrọ ayen,
ọ gbi che vwo ohwo ovuọvo ro ghwu chekọ vwẹ uwevwi rẹ Isọ-ọ.
Kidie Ọrovwohwo na ye tarọ.
19Otu rẹ obo Negẹb ki che vwo Ugbenu rẹ Isọ,
ihwo rẹ obo uphẹphe na ki vwo otọ ri Filistia;
ayen ki che vwo otọ rẹ Ifrem
kugbe otọ ri Sameria
Benjamin kọ che vwo otọ ri Gilead.
20Otu re mu kpo Halah re dia ihwo rẹ Izrẹl
keye ri che vwo Fonisha rhiri re te Zerafat;
ihwo ri Jerusalẹm re muru re obẹ Sefarad
ki che vwo irere re obẹ Negẹb.
21Ihwo re rhọre ki che kpo obo Ugbenu ri Zayọn
re sun Ugbenu rẹ Isọ;
uvie na kọ cha dia ọ rẹ Ọrovwohwo.
လက္ရွိေရြးခ်ယ္ထားမွု
Ọbe rẹ Ọmraro Ọbadaya Obadaya 1: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.