Лука 5
5
5 къаьм
Иса авараглис а̄ьᵸйдда̄ш асгьабла
1Аллагьлис калам тухъал батӀийа̄ аьдамла̄ со̄ᵸгъой къацӀобакна гаьгьийа мехлаъ, Гьули зукъойо ГеннисаретлӀо нисоцала ралъадбадой. 2Ралъадбаъ къона гама бегас Исал. Биса̄хъла, гамалиъис гисана гугьна, гьидеш биса̄ йовахцас къӣла низабас зувакъойо гьулиъ. 3Иса Симонила гамалкьа кьодокийо.
– Раъалликьас даьгьаб ралъадбаъ эᵸдда̄ гама беза, – лӀо нисона гьарзи йо̄йо Гьолцо Симонхъа.
Гамалкьа къе̄на эчена Гьолцо аьдамла̄л ваъза-насигьат бо̄с зукъойо. 4Ваъза-хабар болъолъ, Симонхъа нисос:
– Ралъадбала гилъилла мицаъ гамана мокъонна, тӀутӀа дибо биса̄ йовахцас къӣ.
5Симони Гьолцол жаваб нилӀийо:
– Йа̄ НасигьатсукӀо! Гьуᵸлъ нише-хишей ла тӀутӀдана илол гьоᵸсна биса михъеэш. Амма Ми нисойо йаьже йугъолечӀе до гьаᵸкъкъаса̄за къӣ тӀутӀал.
6Вагьла̄ нисогъа тӀулӀлӀо, гьоллол тели биса михъойо. Биса̄ла йаькъкъолъилахъа къӣ йа̄ьхал йуьᵸхолъийо. 7БалӀо гамалкьа гаьгьийа̄ гьалмагъла̄хъа ишан богьна комаклил ийалӀейо. Мокъона гьоллона къацӀо комак богьна, къонана гама̄ бисалис йовацӀилло. Давлалила йаькъкъолъилахъа къонана гама̄ ралъадбаъ гъанкъизи йа̄хъал йуьᵸхоьбалъийо. 8Вагьли йегалъ, Симон-Петри Исала мицна̄дой аьᵸйда̄ суждалкьана эчена нисойо:
– Йа̄ БетӀерчӀахъаяв, олъо дидойс Ми! До гей мунагьла̄с оцӀийо сукӀо!
9Вагьла̄ нисаъасди, гьулина гьолцогъой къацӀо гаьгьийа̄на котакалда гьийабачӀена зувакъойо тели бохийо биса бегалъ. 10Вагьла̄зу, Симонил гьалмагълъилаъ гаьгьийа̄ Зебедайис оьждаь, Якъубна Иоанна, гьийабачӀейо. Бета Иса Симонхъа нисойо:
– ГьицӀа̄къа! Желагъа муьгъатта̄ ми аьдамла бисацой бовахца#5:10 Гьолълъос маъна: «Аьдамла Аллагьлилъда̄ муьвахолча»..
11Гама̄на мицакьана кьисабана, гаьлъгъа къацӀцӀо жона йечаннегьна, гьолло̄л Исагъой къацӀо мекьейо.
Барас унтилаъ кӀокӀойо сукӀо сагъ ахъилло
12Гьуна Исал, сид шагьарбаъ оᵸкъолъ, къацӀцӀо магъокьа барас унти чӀалӀейо гьоᵸс кӀокӀойо сукӀо эгас. Иса эгалъ, гьули сукӀо Гьоцодой аьᵸйда̄ мотӀо лӀийода̄ къе̄на экна гьардизи ахъал уьᵸхолъча:
– Йа̄ БетӀерчӀахъаяв! Дул адда, до Дӯхъа аᵸцонна сагъ огьна ахъца!
13КӀокӀовал ко̄на йеᵸхенна Иса нисойо:
– Дил атӀна гей: ми аᵸцо, сагъна ахъ!
Нисослаъзу чӀалӀейо жона магъокьа кьодос йекна, гьули сукӀо аᵸцона сагъ ахъийо.
14– Гьоᵸссидихъана хабар мейчӀе, эᵸкьена бегала дибо магъо кашишлил, аьдамла̄л ми ахъийолъи икъалъгъа Мусала къанонликьа къурбан муха, – лӀо нисона лъази йо̄йо Иса гьогцохъа.
15Амма Исас хабар халкъилаъ гьех митемекьейо. Гьолцохъа энекзи бахъална, унтилаъас сагъ бахъална тели аьдамла мовакъос зувакъойо. 16ГьулилӀо нисода, аьдамла гаьчӀела мицаъ эᵸкьена тӀаъатлиъ ахъца зукъойо.
Магъо хъохъойо сукӀо ахъилло
17Гьоᵸс водолалъ Иса ваъза-насигьат бо̄слаъ, Гьолцохъа энекзи бахъийа аьдамла̄ъ эᵸдо зувакъойо Галилеялила шибаб аьлӀаъашна, Ягьудиялиъисна, Иерусалимлиъисна мокъова̄ фарисейлана динияб аьлимлана. БетӀергьаллис къудратлъи зукъойо Гьолцоъ кӀовакӀова ба̄хълал. 18Гьуна гьоᵸс аьдамла̄ лӀоᵸвакьана гонна акъойо магъо хъохъойо сукӀо. КӀокӀо̄ сукӀо Исадой аьᵸйда̄ оᵸкъолална голална гьаьракат багъос зукъойо гьолло. 19Амма тели халкъ бахъийахъа, эзал гьино йиᵸхъеэш. Кьамакьас кӀараматӀина йолъонна, лӀоᵸвакьа голгъа Исадой аьᵸйда̄ алӀлӀода̄ лӀийо э̄ᵸйо. 20Гьули сукӀо акъона мокъова̄ сукӀоба̄с божи бегалъ, Иса нисойо:
– Аьдам, ми мунагьла̄ъас аᵸцойо!
21Диниябла аьлимлана фарисейлана сидхъа-гьоᵸсо бикълабашал муьхобалъийо:
– СукӀо сукӀод ахъал нуцӀос вагьди вагьаллийо инжитаб-гьаькъираб жо йекӀцас? Аллагьлихъа̄ъ инсаллис мунагьла чурзи йовагьна йа̄хъаъас, – лӀо нисойо гьогло.
22Гьоглола йакӀиъ гаьгьийо жона йикъена, Иса нисолца:
– Суд мизола йакӀиъ вагьаллийа пикрова йа̄хъийо? 23Сийод нисал пигьаяб гей: «Ми мунагьла̄ъас аᵸцойолӀод» йаги «Аьгъиъна эᵸкье-гогьлӀод»? 24Амма мизол йикъе, Аьдамлила Оьждисна ихтияр гей аьдамла̄ш мунагьла чурзи йовагьал... – Иса кӀокӀовахъа нисойо: – До дӯхъа нисос, аьгъиъна лӀоᵸна бежена билӀогъа эᵸкье!
25Вагьаллиъисзу аьгъиъна, жу акъойо лӀоᵸна бокчина, Аллагьлил рецна богьгъа, гьинила билӀогъа эᵸкьейо. 26Гьайран-гьикмат бахъийа̄ гьолло къацӀцӀола Аллагьлил рец бо̄йо. ЙилӀа гьийабачӀейахъа гьолло йекӀийо:
– Гьикматаб жо йега̄йо илол жейса, – лӀо нисона.
Иса аварагли Левий асгьаблъилаъ охца
27Гьолълъогъа муьгъатта̄ Иса билӀоъос гисакийо. Гьинолис гьаькъ бокӀолцала билӀодой Гьолцол къе̄ эчена эга̄йо Левий ца̄ᵸ гаьгьийо гьоᵸс гьаькъ бокӀолцас сукӀо.
– Дӣгъой муьгъалӀ тос, – лӀо нисос гьолцохъа Иса.
28КъацӀцӀо жона гаьлълъа̄чо йечаннегьна, аьгъиъна Гьолцогъой муьгъалӀ эᵸкьейо Левий. 29Гьинила билӀоъ мокъолъ, Левий йукъо гьоболлъи йо̄йо Исал. Гьулиъ зукъойо гьаькъ бокӀолцасана, гьула̄зу гьоллогъой къацӀо гагьийа̄ баддо̄л аьдамлана. 30Фарисейла̄на гьоглола диниябла аьлимла̄на Исала асгьабла̄хъа морлӀона нисолло:
– Суд миже гьаькъ бокӀолцала сукӀоба̄гъойна, мунагьла̄с бовацӀийа̄ аьдамла̄гъойна къацӀо бес-хулӀос?
31Иса гьоллол жаваб богьна нисос:
– КӀовакӀовалла̄ъ, сахаб сукӀоба̄л дохтурлис комак батӀаъас. 32До гогьна гей муъмилла гаьчӀел, муна̄пикъла ийабалӀал, гьолло тавба бовал балӀлӀо.
КӀаллис суал
33Гьогло нисолло Исахъа:
– Ягьяла асгьабла̄на фарисейла̄ла мутаъалимла̄на дӣсда̄с как-кӀалла йовагьцала мехлаъ, гьоддо̄л Дибо асгьабла суд бес-хулӀона ба̄хъца? – лӀо нисона.
34Иса гьоллохъа нисойо:
– Къимако шеблаъ гаьгьийа мехлаъ, гьолцо бейтелликьа ийабалӀейа аьдамла̄хъа, бес-хулӀечӀе кӀал йохна бечелӀо нисона йахъцади мизохъа? 35Къимако гьоллодойс агъойо водбо йоᵸвакъас, вагьалло водла̄ъ кӀал йохна гьолло̄нна ба̄хъас.
36Бета Иса гьоллол вагьаддийо хабар ме̄йо:
– Лъона ицӀцӀо лъицӀона йаьхенна келла лъицӀокьа гъечӀе гуцӀаъас. ИцӀцӀо лъицӀона йугъос, келла лъицӀокьа ицӀцӀо гъечӀе гуцӀийолъина кьухъаъас. 37Лъона гитӀаъас ицӀцӀо гъино йугъал йоᵸкъова тӀикӀилаъ. Бетана ицӀцӀо гъинона къе̄ мекьас, йаьхена тӀикӀина йугъас. 38ИцӀцӀо гъино гитӀал нуцӀос ицӀцӀа тӀикӀилаъ. 39Келло гъино хулӀона муьгъатта̄, лъо̄нна кьодо ицӀцӀо гъино хулӀал батӀаъас, судлӀо нисода келлозу гъино кӀетӀо гейлӀо нисос.
လက္ရွိေရြးခ်ယ္ထားမွု
Лука 5: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)