Лука 6
6
6 къаьм
Шамат водо
1Шамат водиъ хъибола майдалла̄ъкьа̄ мекьал нуцӀойо Исана Гьолцос асгьаблана. Асгьабла̄ хъибос кьоᵸва̄ ко̄ъна йуьвашинна мугьла йуьᵸвахъча зувакъойо. 2Садло фарисейла̄ гьодлохъа нисолло:
– Шамат водла̄ъ йовал йахъаъцас жо суд миже йо̄с? – лӀо.
3Иса гьоллол жаваб нилӀийо:
– Хъойэшди миже, жуна къацӀо гаьгьийа̄на нувабакона гьихбалъолъ, Давуди йо̄ва жойлас? 4Аллагьлила билӀоъна эᵸдокна Давуди бокчина гей Аллагьлил бакъойо, кашишла̄йаъ муьхъал бахъаъцас баьба. Гьинина муьхъна гей, къацӀо гаьгьийа̄нна нилӀна гей.
5Бетана нисойо гьоглохъа:
– Шамат водис ихтияр Аьдамлила Оьждихъа гей!
Шамат водиъ ко̄ хъохъойо сукӀо ахъилло
6БалӀосола шамат водиъ Иса ваъза-насигьатлил синагоглиъ эᵸкьал нуцӀойо. Гьулиъ зукъона гей кӀетӀакьас ко̄ хъохъойо гьоᵸс сукӀо. 7Диниябла аьлимлана, фарисейлана Гьолцохъа гуцӀобахъна бечена зукъойо сагъ овалла̄лӀона, шамат водиъ вагьли кӀокӀо̄ ахъинналӀо нисона Исакьа аьйиб мокъолалъгъа. 8Амма гьоглола йакӀиъ гаьгьийо жона йикъена, Иса ко̄ хъохъова сукӀохъа нисойо:
– Аьгъиъна алӀлӀода̄ эче! – лӀо.
Гьуги аьгъиъна алӀлӀода̄ эᵸкьейо. 9Бета Иса гьоллохъа нисойо:
– До мизохъа гьоᵸс жо нисолал: шамат водиъ сийод йовал йахъца – кӀетӀолъид йаги кешлъид? Аьдам ахълалди йаги угъолалди нуцӀос?
10Гьогло къацӀцӀолахъана говацӀона, Иса гьолцо сукӀохъа нисойо:
– Ко̄ йаᵸкъойцӀола, – лӀо.
Иса нисогъа йо̄йо гьолцо сукӀо. Хъохъойо ко̄ сагъ йахъийо. 11Гьогго̄л йилӀа гьалаг ба̄хъийо, Исал сийоди йовал нуцӀослӀо нисона сидхъа-гьоᵸсо дандибази йовал муьхобалъийо.
АцӀона къона чапар гьакӀийо
12Вагьалло водла̄ъ Иса гьари-доьъалил сид ма̄ькьана эᵸкьена нише-хишей Аллагьлил тӀаъат богьна эчейо. 13Хискьа Иса Гьинис асгьаблана ийалӀена, гьоллоъ эᵸдос ацӀона къона сукӀона гьакӀна, гьоллокьа чапарлалӀо нисона ца̄ᵸда гувалло. Гьолло̄нна зувакъойо: 14ПетерлӀо#6:14 Петер – шедлӀо нисойо маъна гей. нисона тӀокӀца̄ᵸ гаьгьийо Симон, гьолцос ис Андрей; Якъуб, Иоанн, Филипп, Бартоломей; 15Маттей, Тома, Алфайлис оьжо Якъуб, Зелот#6:15 Зелот – Римлил данде бегъцас зукъова̄ къокъалис сукӀо. ца̄ᵸ гаьгьийо Симон, 16Якъубис оьжо Ягьуда ва бета Исал хиянат ахъийо Ягьуда Искариот#6:16 Искариот (ИшкӀерийот) – вагьалъос маъна зогъал бахъца «КӀерийот шагьарлис сукӀо» – лӀо нисойо..
Майдалликьа Иса букъо ваъза-насигьат бо̄йо
17Гьинила асгьабла̄гъой къацӀо Иса, ма̄ькьаш лӀийона гогьна, авлахълиъ эчеш. Гьулиъ мокъос Гьолцос тели асгьаблана, къацӀцӀо Ягьудиялиъисна, Иерусалимлиъисна, гьула̄зу ралъадбадой шеблаъ гаьгьийа̄ Тирна Сидонна шагьарба̄ъаш букъо аьламна. 18Гьулиъ мокъойо Исала ваъза-насигьатлихъа энекзи бахъална, гьула̄зу унтилаъас ба̄хълаллакьа йакӀо йоᵸкъова̄на, чикейа зинналла̄ азаб ниццаса аьдамлана; гьолло̄л Иса сагъ бовагьийо. 19КъацӀцӀола халкъилал йатӀна зукъойо Исалъ ко̄ йеᵸхелал, судлӀо нисода Гьолцоъкьа̄ гугьцала букъа къудратлихъа къацӀцӀа̄ ба̄хъца зувакъойо.
20Бета асгьабла̄хъа гьаьйна йеᵸхенна Иса нисос:
– Гьардарабла гей миже мискин-пакъирла,
Аллагьлис Парчагьлъи мизол йиᵸхъолъ.
21Гьардарабла гей миже, же нуко-аᵸхъаба̄,
Аллагьли мизос оᵸха йовацӀлас.
Гьардарабла гей миже, же бийабацаса,
бета миже лъоᵸваба̄с.
22Гьардарабла гей миже, аьдамла̄л ба̄тӀеэса,
гьогло атаба̄кӀийа, мизокьа цӀокьдаба̄йа,
мизос чикейа ца̄ᵸда гейлӀо нисона
гиса тӀуватӀас мизос ца̄ᵸда,
Аьдамлила Оьждидда̄ла.
23Рази ба̄хъ, рази ба̄хъна богба̄цӀ миже,
судлӀо нисода гьаᵸсаъ мизол
букъо шапаъат гей.
Вагьалла̄зу гьоглола наслола̄ла
абола̄на аварагла̄л йо̄йо.
24Амма балагь-азаб мизол
бечедлъилаъ гаьгьийа̄л,
кӀетӀо оьмро же мизол нилӀийо.
25Балагь-азаб мизол,
же оᵸх йовацӀна гаьгьийа̄л,
бета миже нувабакас.
Балагь-азаб мизол, же лъоᵸваба̄йал,
бета миже бийабана макъо йагъас.
26Балагь-азаб мизол,
кӀетӀа̄ аьдамла гейлӀо нисона
сикӀалъ къацӀцӀола ба̄гъова̄л.
Гьоллола умумаллина вагьалла̄
йилӀа рец-бакъ бова̄гьийо
аьйдла̄ гьересиаварагла̄л.
Рокьилас амро
27Дӣхъа энекзи бахъцала мизохъа нисоцас гей: мизос тушмалла ба̄тӀ, миже ба̄тӀаъцала̄л кӀетӀослъи йова. 28Мизол наьъана богьцала̄л баркат гулала, миже нуькучӀ бовагьийа̄ доьъалиъ ба̄гъа. 29Дул гога̄кьа баькьеллал, бадона гога̄ гуцӀола; дӯхъас чохъа-гужгат йагъовал, кьодос мухунна йагъона нилӀа. 30Шибабли гьарзи йо̄вал гьарзи йо̄йо жо нилӀа, нилӀийахъасна кьа̄ь йокӀа̄къа. 31Бадло дул йовакъо̄йо жо ми гьоллонна йова. 32Миже ба̄ццала̄л мизол ба̄тӀийа̄с нӣйо кирид бахъал? Мунагьла̄д бовацӀийа̄лна ба̄цца жуво̄л ба̄ццаса аьдамла. 33Мизол кӀетӀослъи йо̄вал кьа̄ь йоцӀона йо̄ва кӀетӀослъилас нӣйо кирид бахъал? Мунагьла̄д бовацӀийа̄на вагьлизу жо йо̄с. 34Кьа̄ь нилӀаллакьа кул бахъна боцӀи сукӀол къарзалаъ нилӀийа сукӀол нӣйо кирид бахъал? Мунагьла̄д бовацӀийа̄на сидил гьоᵸсо ницца йоцӀол, кьа̄ь кьодос камийойчӀе, йоᵸкъаллакьа йакӀона йоᵸкъонна. 35Амма мизол мизосзу тушмалла ба̄тӀ ва садакъа̄ йовагьа; йоцӀол нилӀийакьа кьа̄ь йоᵸкъаллакьа кул бова̄къа; бета мизол тели кири бахъца, бета миже Кьодда̄ла Аллагьлис къовалъилаъ ба̄хъца. Баркалла нилӀаъцала̄нна, кешлъи йо̄вална цӀоб гулцас гаьлълъо Гьуги. 36Мизос Аболъийозу гургьел-раьгьмо гаьгьийа ба̄хъ мижена.
Гьицаса какзи бова̄къа
37Миже сукӀокьа аьйиб бова̄къа, Аллагьли мизокьана боваъас; миже аьдам какзи ова̄къа, мижена какзи боваъас; миже кьодос тилӀбак, мизокьасна тилӀбакас. 38Мижена нилӀа – мизонна нилӀас. ЙилӀа лахлӀо-къуькъона гъоьдо богьна боцӀийо моьгьоре ницца мизол. Нӣйа моьгьорейад мизол масадана, вагьаллийа моьгьорейад мизонна масас.
39Вагьаддийона мисал бакъойо Иса гьоллол:
– Боцдийа сукӀохъа бадисо боцдийо сукӀо эжеллина ахъцади? Гьолло̄л къонана хъарандийаъ бейакассаъди?
40Гьинила муалимлигъа лъай кьодда̄с ахъаъас мутаъалим. Амма жузу, къацӀцӀо жо йикъенна, камиллъилаъ оᵸкъода, шибаб мутаъалим муалимлъийо ахъца.
41Суд дибола гьаьъ гаьгьийо михъо бегайчӀе истӀила гьаьъ гаьгьийо цӀих йегас? 42Йана дӯхъа дибола истӀихъа нигъад нисона йахъца: Верейа ис, дибола гьаьъаш цӀих йагъоллаъче дӣд. Дибола гьаьъаш михъо бега̄ъас. Йе къона мотӀо гаьгьийо инсан, гьакъкъа ми дибола гьаьъаш михъо болъола, бета йагъал йахъца истӀила гьаьъаш цӀих.
43КӀетӀа хоьхкьа нӣйоди пихъ гуцӀаъас, бахъеэшла хоьхкьа кьодо кӀетӀо пихъна гуцӀаъас. 44Шибаб хоьхо бикъеш пихълихъа гуцӀобахъна, судлӀо нисода тӀитӀакьа легъи йахъаъас, зазликьас кӀодо бокӀолаъас. 45КӀетӀа сукӀо гьинила йакӀила кӀетӀа гъамасбаъас кӀетӀослъи гиса йагъос. ЙакӀо чикейа сукӀо гьинила йакӀила чикейа гъамасбаъас кешлъи гиса йагъос, судлӀо нисода сикӀа нисос йакӀиъ гаьгьийо жо дӣслъилъ.
Къона бигъа
46– Йа̄ БетӀерчӀахъаяв, йа̄ БетӀерчӀахъаяв! – лӀо нисона суд Дӣхъа илӀелабас, До нисогъана йойчӀе. 47Дӣгъой гугьцаса, Дӣхъа энекзи бахъцаса, Дие йаьже тӀубази йогьцаса – лъо̄лъ мелъейа̄д ба̄хъцасна нисал До мизохъа: 48гьули эᵸлъейо ахъца билӀо йогьцала сукӀолъ. Гьолцо эᵸдда̄с маьчена моьтӀона шедкьа кьодо бигъа гулло. Водбо тели гувагьлъо, эᵸхе билӀокьа йогицӀийо, гьолълъохъа гьули лахлӀонна йахъеэш, билӀо ахо кьучӀликьа йоᵸкъонна йо̄лъ. 49Дӣхъа энекзи ахъдана, До нисогъа йоваъцас сукӀо эᵸлъейо ахъца мицаъ бигъа гулечӀе билӀо йо̄ва сукӀолъ; эᵸхе йогицӀийоназу гьолцос билӀо йекна йугъос. БилӀос гьоьшшона гьихлъаъас.
လက္ရွိေရြးခ်ယ္ထားမွု
Лука 6: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)