Лука 4
4
4 къаьм
Илбис Иса къосси овал муьхотухъийо
1Илагьияб Ругьлид оцӀийо Иса Иорданлиъис кӀаьй уьᵸхона го̄йо, бета Ругьли Гьули оᵸкъолло боьчӀчӀа авлахълиъ. 2Вагьлиъ йагъойо Иса оьᵸкъонайиг водо. Илбисли гьолцос гьаьлна бикъелло. Вагьлосинаб замаллиъ сикӀаъ лукӀма мейэш. Оьᵸкъонайиг водо йеᵸкьелъ, Гьули нукойо. 3Вагьалълъо мехлаъ илбисли нисос Гьолцохъа:
– Ми Аллагьлис Оьжо зогъда, вагьалӀо кьалхъа ниса баьбалал йуьᵸхолӀо.
4Иса гьоглӀол жаваб нилӀийо:
– ТӀекликьа чахна гей: «Сид баьбалакьа боваъас инсалли гьинис оьмро».
5Бета илбисли ма̄ькьана оᵸкъонна, сид лагьзатлиъ дуниялликьа гаьгьийа̄ къацӀцӀа̄ пачалихъла йегабалло Гьолцол. 6Бета гьоклӀо нисос:
– Вагьадло къацӀцӀола пачалихъла̄с ихтиярна рецна до Дул нилӀал, судлӀо нисода гьолълъос ихтияр дӣхъа нилӀна гей, до дил атӀтӀийал вагьло ницца. 7Ми дил сужда богьда, вагьли къацӀцӀо дибо йахъца.
8Иса жаваб нилӀийо:
– ТӀекликьа чахна гей: «Сид Аллагьлилла̄ъ сужда бова̄къа, БетӀергьаллилла̄ъ ибадат бова̄къа».
9Бета илбисли Гьули Иерусалимлиъ эжена Аллагьлила билӀола кьохъкьана гонна, Гьолцохъа нисос:
– Ми Аллагьлис Оьжо зогъда, вагьалӀоъла лӀийо огицӀ! 10ТӀекликьа чахна гаьъад: «Аллагьли малаикла̄кьа амро бовас ми цӀуми овалӀо нисона». 11Бета: «Малаикла̄ каъ охна эзас кьалил дибо хаьба мехелечӀе».
12Иса жаваб бо̄йо:
– «Ми БетӀергьан, дибола Аллагьлил гьаьлбики йова̄къа» – лӀо нисона чахна ТӀекликьа.
13Гьолцол къацӀцӀо гьаьлбики йогьна лъикъолъ, илбис гьоᵸс санаъатаб мех мокъоцал боъийо Гьолцодойс.
Иса аварагли Галилеялиъ ваъза-насигьатла йовагьал уьᵸхолъийо
14Иса оᵸкъойо Галилеялиъ Илагьияб Ругьна Гьиниъ бахъна. Гьолцос ца̄ᵸ на̄назу со̄ᵸгъой гаьгьийа̄ мица̄ъ йеᵸкьейо. 15Синагогла̄ъ эᵸкьена Гьолцо ваъза-насигьатла йовагьийо, къацӀцӀола Гьолцол рец-бакъ бо̄с зукъойо.
Назаретлиъ Иса авараг къабул ойэш
16Бета Иса тарбийа-лъай нилӀийа Назарет шагьарбаъ эᵸкьейо, гьинила аьдатликьа шамат водиъ синагоглиъна эᵸдокийо. Гьоллол ТӀек хъовал минбарликьа кьодокийо. 17Ишая авараглис ТӀек нилӀийо Гьолцохъа. Вагьаддийо калима гаьгьийо мицаъ ТӀекна йеᵸгьена, хъо̄йо Гьолцо:
18-19– «Дӣъ БетӀергьаллис Ругь гей, гьолцо дил ихтияр нилӀийо Рохеллис Хабар мискилла̄хъа мейал, асирлъилаъ гаьгьийа̄ тиса ба̄гъоналӀо, боцдийа̄л канлъи йоᵸкъоналӀо, азаб-акъубалиъ гаьгьийа̄ гиса мегьналӀо. Аллагьлила раьгьматлис мех мокъоналӀо нисал эᵸгьна гей До».
20Бета Гьули ТӀекна йиᵸхъона, хъулухъчийахъана нилӀна, къе̄ эчейо. Синагоглиъ гаьгьийа̄ къацӀцӀолас гьаьй йеᵸхейо Гьолцокьа. 21Иса гьоллохъа нисал уьᵸхотохъийо:
– Жейса миже вагьалӀо калималихъа энекзи бахъцалаъ, чахийо жо тӀубази йахъийо.
22Гьолцола каламли гьоллол букъо асар бо̄йо. Исала сикӀаъкьа̄ гугьцала вагьалълъо баркатаб каламли къацӀцӀа̄ аьжаиб бовагьийо. Бета гьолло нисойо:
– Усупис оьжод гей Гьули?
23Иса нисойо гьоллохъа:
– Гьай-гьай миже Дӣхъа кицина бакъона нисас: «Ми дохтур зогъда, гьакъкъа Мизу сагъ ахълӀо. Илол Капернаумлиъ йахъийо шинаб жо тухъийо, же вагьалӀо Дибола абола ракьликьана йова!» – лӀона нисас миже Дӣхъа.
24Амма Гьогцо гьоглохъа нисойо:
– Гьаькъкъаб жо гей, гьоᵸсна авараг гьинила абола ракьликьа бикӀзи оваъас. 25Гьаькъкъаб жо нисос До мизохъа: Иляс авараглила замаллиъ лъана лӀина илъна боцо бахъийо мицакьа водо гуйчӀе къацӀцӀо дуниялликьа йукъо ракъи йоᵸкъона. 26Израиллиъна тели къоролла зувакъодана, Сидонлидой гьиᵸца гаьгьийа Царепатила сид къоролайдоййаъ эᵸйэш Аллагьли Иляс. 27Элиша авараглила замаллиъ Израиллиъна барас унтилаъ кӀовабакӀова тели аьдамла ба̄хъдана, Шамлиъис гьоᵸс НаъманлӀо нисоцас сукӀова̄ъ аᵸцолеэш гьолълъо унтилаъас.
28Вагьли тухъийоназу, синагоглиъ гаьгьийа̄ аьдамла гьалаг ба̄хъийо. 29Баьгъбаъна гьолло Гьули шагьарбаъаш гисана эжена бачилӀ тӀотӀаллӀо нисона, гьидес шагьар бо̄йо бизола раьъалликьа акъос зукъойо. 30Амма Иса халкъилаъас алӀос оьчона оъийо.
Капернаумлиъ Иса аварагли йегабалла̄ караматла
1. Чикейо зиннал гиса боцӀийо
31Бета Галилеялила КапернаумлӀо нисоцала шагьарбаъна эᵸкьена, гьоллол шамат водла̄ъ Аллагьлис калам биджи бовал уьᵸхолъийо. 32Гьолцола ваъзала̄кьа аьдамла аьжаиб ба̄хъна зувакъойо. Гьолцо нисоцас жо нисос зукъойо Гьиниъ гьаьлкӀолъи гаьгьийаъцой.
33Синагоглиъ зукъона гей зинналла̄ охийо гьоᵸс сукӀо.
34– ЭццакӀа! Сийод дул илоъкьа̄ йатӀна, Назаретлиъис Иса! – лӀо нисона йукъо илӀела̄л уьᵸхолъийо гьули сукӀо. – Иле пасад бовалди оᵸкъона Ми! Дил икъеш Ми Аллагьлис Илагьияб СукӀо ахъцаслъи!
35Иса гьокӀ йоъиллийо гьолълъос:
– ГьокӀ йоъла, болъо Ми гьолцола магъоъос!
Синагоглиъ алӀлӀода гьули сукӀона къе̄ икьена, гьоьшшона зарал бойчӀе гьолцола магъоъос зиннал гисакийо. 36КъацӀцӀа̄ гьайран бахъийо. Гьолло̄л сидхъа гьоᵸсо бикълабашал муьхобалъийо:
– Сийо йаьжед гьули, гьинила къуватлидна къудратлидна амро богьцас зинналла̄л; гьолълъогъа муьгъатта̄ гьолло̄лна инсаллила магъоъос гисабакцас, – лӀо нисона.
37На̄назу со̄ᵸгъой гаьгьийа̄ мица̄ъ митемекьейо Исас хабар.
2. Петерлис йукъо ийо кӀокӀо̄ йахъилло
38Бета аьгъиъна, синагоглиъисна гисакна, Иса СимонлӀо нисоцала сукӀодой билӀогъа эᵸкьеш. Симонис йукъо ийо йаьчӀ-йиххала унтилаъ йилӀа кӀокӀона йиᵸхъос. Гьоло йахълалӀо нисона гьарзи йо̄с Гьолцохъа. 39КӀокӀовадой гьиᵸцана эᵸкьена, йаьжена нисона, гьолълъоъос унти болъолца. Вагьаллиъисзу йаьгъиъна, гьоллол кен-оᵸх гулал йуьᵸхолъча гьоло.
3. КӀовакӀова̄на ба̄хъилло, зинналлана аьдамла̄ъаш йовацӀийо
40Бохъ тӀикейа анталаъ тели кӀовакӀова̄ аьдамлана ба̄къона мокъойо Гьолцодой. Исана шибаблил ко̄ йеᵸхенна гьолло̄л ба̄хъилло. 41Лади аьдамла̄ъаш зинналла йовацӀийо.
– Ми Аллагьлис Оьжо гей! – лӀо нисона илӀелабас зувакъойо гьолло̄л йоьвачошлаъ.
Амма жу Масигь гаьгьийолъи зинналла̄л икъелъ, Иса гьоллос гьокӀа йоваъиллис зукъойо.
42Бета хиса водо хишейоназу гисакна Гьули боьчӀчӀа авлахълиъ эᵸкьейо. Халкъила Гьули иᵸзийо. Иᵸхъона муьгъатта̄, гьидедойс на̄на эᵸкьа̄къалӀо нисона гьардизи ба̄хъийо. 43Амма Иса гьоллохъа нисойо:
– Аллагьлис Парчагьлъи йоᵸкъоцалас Рохеллис Хабар нисал До бадло шагьарба̄ъна эᵸкьал нуцӀос, вагьалълъол э̄ᵸйо гей До.
44Вагьла̄ Ягьудиялила синагогла̄ъ эᵸкьена, Гьолцо ваъза-насигьатла йовагьийо.
လက္ရွိေရြးခ်ယ္ထားမွု
Лука 4: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)