Chivkeeb 44
44
Lub Khob Nyaj Pluj Lawm
1Yauxej has rua nwg tug tubkhai kws saib nwg lub tsev has tas, “Koj muab nplej ntim rua huv cov tuabneeg nuav tej naab kuas ntau txaus nkaus puab thauj moog, hab muab puab tej nyaj ntsaws rov rua huv puab lub ncauj naab. 2Koj muab kuv lub khob nyaj ntsaws rua huv tug kwvntxawg lub ncauj naab, hab muab nwg cov nyaj kws coj tuaj yuav nplej ntsaws rua huv hab.” Tug tubkhai moog ua lawv nraim le Yauxej has. 3Taagkig kaajntug kag xwb, nwg txawm tso cov kwvtij caab puab tej neegluav sawvkev rovqaab moog tsev lawm.
4Puab nyavnyuas moog tau tsi dleb ntawm ntug nroog xwb, Yauxej has rua tug tubkhai kws saib nwg lub tsev has tas, “Koj cale maajnroog moog caum cov tuabneeg ntawd. Thaus koj caum cuag puab lawm, koj nug puab has tas, ‘Vim lecaag mej txhajle ua qhov phem pauj qhov zoo? 5Vim lecaag mej nyag kuv tug tswv lub khob nyaj?#44:5: Ib phoo ntawv qub-qub thaus u sau has tas Vim lecaag mej nyag kuv tug tswv lub khob nyaj?; phoo lug Henplais tsi muaj cov lug nuav. Lub khob ntawd yog lub kws nwg siv lug haus dlej hab siv lug saib txug yaav tomntej. Mej muaj le nuav mas txhum luj heev lawm lau!’ ”
6Thaus tug tubkhai moog caum cuag puab, nwg txawm has tej lug nuav rua puab. 7Puab teb nwg has tas, “Tug tswv, koj has le ko, yog has txug dlaabtsi? Peb yeej tsi tau ua le ko ib zag le! 8Koj tub paub lawm has tas tej nyaj kws peb tshawb tau huv peb tej naab nplej peg tebchaws Kana-aas, peb tub nqaa rov tuaj rua mej huv tuabsi lawm. Vim lecaag peb ho tseem yuav nyag nyaj lossis kub huv koj tug tswv lub tsev? 9Tug tswv, yog peb cov nuav ib tug twg tau nyag lub khob ntawd lawm, tes muab nwg tua kuas tuag, dlua le tes ca peb moog ua koj qhev xwb.”
10Nwg teb tas, “Ua le mej has ko; leejtwg kws muaj lub khob nyob huv nwg yuavtsum ua kuv qhev xwb; dlua le cov, yuav tsi muaj txim dlaabtsi hab cale moog tsev tau.” 11Yogle ntawd, puab txhaj maajnroog tsaws puab tej nraa rua huv aav, hab puab nyag dlaws nyag lub ncauj naab. 12Yauxej tug tubkhai ua tuabzoo tshawb, pib ntawm tug tijlaug hlub lub naab lug xaus rua ntawm tug kwvntxawg lub naab, txhaj tshawb tau lub khob nyob huv Npeeyamees lub naab. 13Cov tijlaug txhaj dlua rhe puab tej tsho povtseg tusab heev, puab tsaws nraa rua puab tej neegluav thauj hab rovqaab moog rua tom nroog.
14Thaus Yudas hab nwg cov kwvtij rov lug txug huv Yauxej tsev, Yauxej tseem nyob huv. Puab txhuscaug ndlua rua huv aav pe nwg. 15Yauxej has rua puab tas, “Mej ua dlaabtsi le ko? Mej tsi paub tas tug tuabneeg kws zoole kuv nuav txawj saib txug yaav tomntej nua lov?”
16Yudas teb tas, “Tug tswv, peb yuav has tau lecaag rua koj? Peb yuav caam tau lecaag? Peb yuav ua lecaag has tau tas peb tsi muaj txim? Vaajtswv tub muab peb tej kev txhum nthuav tawm lawm. Zagnua tes tsi yog tug kws luas tshawb tau koj lub khob huv nwg lub naab txhaj ua koj qhev xwb, tabsis taagnrho peb suavdlawg puavleej ua koj qhev.”
17Yauxej teb tas, “Tsi yog le ntawd! Kuv tsi ua le mej has ko! Tsuas yog tug kws muab kuv lub khob lawm txhaj yuav tau ua kuv qhev xwb. Dlua le cov tes mej cale rov moog tsev hab moog cuag mej txiv ntawm txuj kev kaajsab lug.”
Yudas Thov Kuas Tso Npeeyamees
18Yudas txawm txaav zog moog cuag Yauxej hab thov has tas, “Tug tswv, thov ca kuv nrug koj thaam ob-peb lus. Txawm yog koj yeej zoo ib yaam le Falaus lawm los thov koj tsi xob chim rua kuv. 19Tug tswv, koj tau nug peb has tas, ‘Mej puas muaj txiv lossis muaj kwvtij lawm hab?’ 20Peb tau teb koj has tas, ‘Peb muaj ib leejtxiv, nwg tub laug-laug le lawm, hab peb tshuav ib tug kwvntxawg kws yug rua thaus peb txiv tub laug-laug lawm. Tug tub nuav tug tijlaug tuag lawm, hab nwg nam tshuav tuabtug tub ntawd txhaj tseem ua neej nyob xwb, mas nwg txiv hlub nwg heev.’ 21Tug tswv, koj tau has kuas peb coj nwg tuaj ntawm nuav, ruaqhov koj xaav pum nwg. 22Peb tau teb rua koj has tas tug tub ntawd txiv tso tsi taug nwg tseg le, yog nwg tseem tsotseg hab tes nwg txiv yeej kawg tuag xwb. 23Tabsis koj has tas, ‘Yog mej tsi coj mej tug kwvntxawg nrug mej tuaj, tes mej tsi xob rov tshwm ntsejmuag rua kuv pum ib zag le lawm.’
24“Thaus peb rovqaab moog txug peb txiv, peb tau qha tej kws koj has ntawd huv tuabsi rua nwg noog. 25Tomqaab ntawd nwg kuas peb rov tuaj hab yuav mivntsiv mov moog noj. 26Peb txhaj teb nwg has tas, ‘Peb tsi kaam moog lawm, yog peb tsi coj peb tug kwvntxawg nrug peb moog, peb yuav tsi muaj cuabkaav moog tshwm ntsejmuag rua tug nom nraag pum peb ntxiv lawm. Yog peb tug kwvntxawg nrug peb moog mas peb txhaj kaam rov moog.’ 27Peb txiv has rua peb tas, ‘Mej yeej paub lawm has tas Laxees kws yog kuv tug quaspuj, nwg tsuas yug tau ob tug tub rua kuv xwb. 28Ob tug tub nuav muaj ib tug tub ncaim kuv lawm. Tsaj nyaum tub muab nwg tum hab dlua ua tej dlwb dlaig taag lawm, txij thaus ntawd lug tes kuv yeej tsi pum nwg le lawm. 29Yog zagnua mej tseem coj tug nuav ncaim kuv moog, hab yog tas tseem muaj xwm lug raug nwg hab, tes yog laug le kuv nuav lawm tes ntshe kuv yuav cale txhawm chim tuag le lau.’ ”
30Yudas has ntxiv tas, “Tug tswv, yog kuv tsi coj tug tub nuav nrug kuv rovqaab moog cuag kuv txiv, thaus kuv moog txug, yog nwg tsi pum tug tub nuav nrug kuv rovqaab, tes nwg yeej yuav kawg tuag, vim nwg muab nwg txujsa cog nkaus rua nwg tug tub nuav xwb. 31Nwg tub laug heev lawm, tes nyobtsaam tej kev quajntsuag kws peb ua rua nwg nuav yuav txuv nwg txujsa. 32Tshaaj qhov ntawd ntxiv hab, kuv tseem tau coglug muab kuv txujsa pauv tug tub nuav rua kuv txiv hab. Kuv coglug rua nwg lawm, yog tas kuv tseem tsi coj tug tub nuav rov moog rua nwg, tes kuv ua tug ris lub txim nuav moog taag kuv simneej. 33Tug tswv, thov koj tso tug tub nuav nrug nwg cov tijlaug rov moog tsev, es ca kuv nrug koj nyob ua koj qhev hloov nwg chaw. 34Ruaqhov yog tas tug tub nuav tsi nrug kuv rov moog, kuv yuav ua lecaag muaj cuabkaav rov moog cuag tau kuv txiv? Kuv tsi xaav pum txuj kev puamtsuaj nuav lug raug kuv txiv le.”
လက္ရွိေရြးခ်ယ္ထားမွု
Chivkeeb 44: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.