Chivkeeb 43
43
Yauxej Cov Tijlaug Coj Npeeyamees Moog Huv Tebchaws Iziv
1Huv tebchaws Kana-aas muaj kev tshaib nqhes nyaav zujzug ntxiv, 2thaus kws Yakhauj tsev tuabneeg noj tej mov kws puab yuav huv tebchaws Iziv lug taag lawm, Yakhauj has rua nwg cov tub has tas, “Mej cale rovqaab moog yuav mivntsiv mov lug rua peb.”
3Yudas has rua Yakhauj has tas, “Tug nom kws tswj tebchaws Iziv yeej has tu lug nrho rua peb tas yog peb tseem tsi coj peb tug kwv moog rua nwg, mas kuas peb tsi xob moog tshwm ntsejmuag rua nwg pum ib zag le lawm. 4Yog koj tso peb tug kwvntxawg nrug peb moog, mas peb txhaj yuav kaam moog yuav nplej lug rua koj. 5Tabsis yog koj tsi kaam tso nwg moog, peb yuav tsi kaam moog, ruaqhov tug nom nraag yeej has rua peb tas, yog peb tsi coj peb tug kwvntxawg nrug peb moog, tes peb tsi xob moog tshwm ntsejmuag rua nwg pum ib zag ntxiv le lawm.”
6Yakhauj has tas, “Vim lecaag mej yuav ua rua kuv tau kev nyuajsab ualuaj? Uacaag mej tseem yuav qha rua nwg paub tas mej tshuav ib tug kwv hab nua?”
7Puab teb tas, “Tug nom nraag yeej nug txug peb hab peb tsev tuabneeg huv tuabsi has tas, ‘Mej txiv puas tseem muaj sa nyob? Mej puas tshuav kwvtij hab?’ Peb txhaj yuavtsum tau teb nwg tej lug nug ntawd. Peb yuav ua lecaag paub tas nwg yuav kuas peb coj peb tug kwvntxawg nrug peb moog rua nraag nua maj?”
8Yudas has rua nwg txiv has tas, “Tso tug hluas nrug kuv moog, peb yuav rawm sawvkev moog taamsim nuav, peb suavdlawg txhaj yuav tsi tuag tshaib. 9Kuv txaussab hlo muab kuv txujsa pauv nwg, thov koj tso nwg rua kuv ua tug tsomkwm. Yog kuv coj tsi tau nwg rovqaab lug rua koj, tes kuv yuav ua tug ris lub txim nuav moog ibtxhis le. 10Yog peb tsi xob pheej taabkaum le nuav, tes ntshe peb tub rov moog tau ob lwm lawm.”
11Puab txiv has rua puab tas, “Yogle ntawd, ca peb ua le nuav: muab tej khoom zoo tshaajplawg kws peb muaj nyob huv tebchaws nuav xwsle: muab mivntsiv tshuaj tswqaab, mivntsiv zib ntaab, txumlom, noob txiv pixatatshi-aus hab noob txiv ovmees ntim rua huv mej cov naab coj moog ua ib qhov khoomplig rua tug tswvxeev nraag. 12Mej cale nqaa nyaj ob npaug moog; nqaa luas cov nyaj kws zag taag nyob huv mej tej naab rov moog rua luas. Tejzag yog leejtwg ua yuamkev lawm xwb. 13Cale coj mej tug kwvntxawg nrug mej moog hab rov moog cuag tug nom nraag. 14Thov Vaajtswv tug kws muaj Fwjchim Luj Kawg Nkaus ua kuas tug nom nraag muaj sab mogmuas hab taabncuab mej, sub nwg txhaj yuav tso Npeeyamees hab mej tug tijlaug rov lug. Ntawm kuv tes, txawm yog kuv yuav nplaam kuv ob tug mivnyuas los xijpeem kuv.”
15Yogle ntawd, puab txhaj nqaa tej khoomplig, nqaa ob npaug nyaj, hab coj puab tug kwv Npeeyamees nrug puab moog. Thaus puab moog txug huv tebchaws Iziv lawm, puab txhaj moog cuag Yauxej. 16Thaus Yauxej pum Npeeyamees nrug puab tuaj txug lawm, nwg txawm has rua tug tubkhai kws saib nwg lub tsev has tas, “Coj cov tuabneeg nuav moog rua huv kuv tsev. Cale moog nteg ib tug tsaj lug tua hab npaaj kuas txhij, puab yuav nrug kuv nojsus uake.” 17Tug tubkhai ntawd moog ua lawvle Yauxej has hab coj cov kwvtij ntawd moog su huv Yauxej tsev.
18Thaus puab taabtom moog rua huv Yauxej tsev, puab ntshai kawg hab puab xaav tas, “Nwg coj peb lug rua ntawm nuav, ntshe yog tim cov nyaj kws thawjzag muab tso rov rua huv peb cov naab ntaag lau. Nwg yuav tawmtsaam peb, txeeb peb tej neegluav, hab coj peb moog ua nwg qhev.” 19Puab txhaj moog cuag tug tubkhai kws saib Yauxej tsev ntawm lub qhovrooj kws yuav moog rua huv tsev hab has rua nwg tas, 20“Tug tswv, yog koj txaussab, peb tub tuaj yuav mov ntawm nuav ib zag lawm. 21Thaus peb rovqaab moog tsev hab moog su tom ib tog kev, peb qheb peb cov naab nplej, uacaag peb txhua tug cov nyaj kws coj tuaj yuav nplej puavleej nyob taagnrho huv cov ncauj naab. Peb txhaj rov nqaa cov nyaj nuav huv tuabsi nrug peb tuaj. 22Peb tsi paub sov yog leejtwg muab peb cov nyaj rov moog ntsaws rua huv peb cov naab. Zag nuav los peb kuj npaaj tau mivntsiv nyaj coj tuaj yuav mov dlua hab.”
23Tug tubkhai txhaj has tas, “Mej tsi xob nyuajsab. Tsi xob ntshai. Mej tug Vaajtswv kws yog mej txiv tug Vaajtswv, yog tug muab tej nyaj ntawd ntsaws rov rua huv mej tej naab xwb. Kuv tub tau txais mej cov nyaj lawm.” Tes nwg txawm moog coj Xime-oos lug rua puab.
24Tes tug tubkhai txhaj coj cov kwvtij ntawd lug rua huv Yauxej tsev. Nwg moog nqaa dlej lug rua puab ntxuav kutaw, hab muab zaub rua puab cov neegluav noj. 25Puab npaaj puab tej khoomplig kuas txhij ca tog txug thaus taavsu Yauxej lug txug es puab yuav muab rua nwg, ruaqhov muaj tuabneeg tub qha rua puab lawm tas puab yuav nrug Yauxej nojsus uake.
26Thaus Yauxej lug txug, puab txhaj moog nqaa puab tej khoomplig lug rua nwg huv tsev hab nyo ntshis rua huv aav ntawm nwg xubndlag. 27Yauxej nug puab txug kev nojqaab nyobzoo hab has tas, “Mej tub yeej qha kuv has tas mej txiv laug heev lawm, yogle ntawd, nwgnuav nwg nyob lecaag lawm? Nwg puas tseem muaj sa nyob hab puas nojqaab nyobzoo?”
28Puab teb tas, “Peb txiv kws yog koj tug tubkhai, nwg nojqaab nyobzoo hab tseem muaj sa nyob.” Tes puab rov txhuscaug pe Yauxej dlua ib zag ntxiv.
29Thaus Yauxej pum nwg tug kwvntxawg Npeeyamees, kws yog nrug nwg koom ib leejnam yug, nwg txhaj nug has tas, “Tug nuav yog mej tug kwvntxawg kws mej qha rua kuv puas yog? Mivtub 'e, thov Vaajtswv foom koobmoov rua koj nawb.” 30Tes Yauxej txawm tawm plawg moog lawm, ruaqhov nwg pum nwg tug kwvntxawg tes nwg lub sab quaj dlhi ua rua nwg tauv tsi taug nwg lub kuamuag, nwg txhaj tawm moog quaj tuabywv huv nwg ib chaav tsev. 31Tomqaab kws nwg ntxuav muag taag, nwg maam tawm lug, hab ua tag tswj nwg tugkheej; nwg txhaj xaaj kuas cov tubkhai rau mov rua puab noj.
32Puab rau ib rooj mov rua Yauxej ib leeg noj, hab rau dlua ib rooj rua Yauxej cov kwvtij noj. Puab rau dlua ib rooj rua cov tuabneeg Iziv kws tuaj nrug puab noj mov ntawd noj, ruaqhov cov tuabneeg Iziv tsi kaam nrug cov tuabneeg Henplais noj mov uake; puab suav has tas yuav ua rua puab poob ntsejmuag. 33Puab coj Yauxej cov kwvtij moog nyob ncig lub rooj tig xubndlag tuaj rua ntawm Yauxej lawvle puab tej noobnyoog, pib quaszug ntawm tug hlub moog txug tug ntxawg. Thaus puab pum tas puab lug nyob tau le ntawd, puab ib leeg tig saib ib leeg hab xaav tsi thoob le. 34Cov tubkhai dlaus zaub dlaus mov ntawm Yauxej lub rooj lug rua puab noj, tabsis puab dlaus rua Npeeyamees tshaaj lwmtug tsib npaug. Puab txhaj nrug Yauxej noj hab haus moog txug thaus puab noj tsau haus qaug.
လက္ရွိေရြးခ်ယ္ထားမွု
Chivkeeb 43: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.