Chivkeeb 45
45
Yauxej Qha Nwg Rua Cov Kwvtij Paub
1Yauxej tauv tsi taug nwg lub kuamuag taabmeeg nwg cov tubkhai le lawm, nwg txhaj xaaj kuas cov tubkhai ntawd tawm moog. Thaus ntawd tsi muaj leejtwg nrug puab nyob ntawd lawm, Yauxej txhaj qha rua nwg cov kwvtij has tas nwg yog leejtwg tag. #Tegnum 7:13 2Yauxej tsaa suab hlo quaj nrov-nrov, ua rua cov tuabneeg Iziv puavleej nov, txhaj muaj tuabneeg moog pav zaaj nuav qha rua huv Falaus lub loog.
3Yauxej has rua nwg cov kwvtij has tas, “Kuv yog Yauxej ntaag. Kuv txiv puas tseem muaj sa nyob?” Thaus nwg cov kwvtij nov nwg has le ntawd, puab ntshai heev ua rua puab teb tsi taug ib lus le.
4Yauxej has rua puab tas, “Mej cale txaav lug ze-ze kuv.” Puab txhaj txaav zog lug rua ntawm nwg, hab nwg has rua puab tas, “Kuv yog mej tug kwv Yauxej kws mej muab muag rua huv tebchaws Iziv. 5Nwgnuav mej tsi xob txhawj lossis chim rua mej tugkheej txug qhov kws mej muab kuv muag lug rua ntawm nuav. Yeej yog Vaajtswv khaiv kuv ua mej ntej lug, txhaj cawm tau tuabneeg txujsa. 6Tej kev tshaib nqhes nuav, xyoo nuav nyavnyuas yog xyoo thib ob xwb, tseem tshuav tsib xyoos tomntej nuav ntxiv, mas yuav tsi muaj leejtwg cog hab sau tau qoobloo hlo le. 7Vaajtswv khaiv kuv ua mej ntej yog lug paab cawm mej ua ib tsaav tuabneeg nyob rua huv lub nplajteb nuav, sub txhaj yuav ceev tau mej hab mej le caajceg kuas muaj sa nyob. 8Mej tsi yog cov kws xaa kuv lug rua ntawm nuav, tabsis Vaajtswv yog tug kws xaa kuv lug! Nwg yog tug tsaa kuv ua Falaus ib tug nom kws luj tshaajplawg. Kuv yog tug kws saib taagnrho Falaus tej vaajtse hab kaav taagnrho lub tebchaws Iziv nuav.
9“Zagnua mej cale maajnroog rovqaab moog cuag kuv txiv hab qha rua nwg has tas, ‘Yauxej kws yog koj tug tub has le nuav: Vaajtswv tsaa kuv ua tug kaav taagnrho lub tebchaws Iziv lawm; koj cale lug nrug kuv nyob sai le sai tau. 10Coj koj tugkheej, coj taagnrho koj cov mivnyuas, cov xeebntxwv, mej tej yaaj, tej tshis, tej nyuj hab txhua yaam kws mej muaj lug nyob rua huv cheebtsaam Nkausees, qhov chaw kws nyob ze kuv. 11Yog koj lug nyob huv Nkausees, mas kuv txhaj yuav paab tau koj. Kev tshaib nqhes tseem tshuav tsib xyoos tomntej nuav ntxiv, mas kuv tsi xaav kuas koj, koj tsev tuabneeg, hab koj tej tsajtxhu tuag tshaib le.’ ” #Tegnum 7:14
12Yauxej has ntxiv tas, “Zagnua mej txhua tug, hab kwv Npeeyamees, puavleej pum tas kuv yog Yauxej tag. 13Mej cale qha rua kuv txiv paub tas kuv muaj fwjchim luj npaum lecaag nyob huv tebchaws Iziv nuav, hab qha txhua yaam kws mej tau pum lawm rua nwg noog, hab cale maajnroog coj nwg lug nyob ntawm nuav.”
14Yauxej puag nkaus nwg tug kwv Npeeyamees hab quaj; Npeeyamees los kuj puag nkaus Yauxej hab sisqawg quaj. 15Yauxej ibke quaj ibke moog puag cov tijlaug hab nwj puab ib tug rua ib tug. Tomqaab ntawd nwg cov tijlaug maam pib nrug nwg thaam.
16Thaus muaj tuabneeg moog qha zaaj nuav rua huv Falaus lub loog has tas Yauxej cov tijlaug tuaj txug lawm, Falaus hab nwg cov numtswv zoosab kawg le. 17Falaus has rua Yauxej has tas, “Has rua koj cov tijlaug kuas tsaws nraa rua puab tej tsaj thauj rovqaab moog lawm peg tebchaws Kana-aas. 18Kuas puab moog coj puab txiv hab tej quaspuj mivnyuas es rovqaab lug cuag kuv ntawm nuav. Kuv yuav muab thaaj aav kws zoo kawg nkaus huv tebchaws Iziv nuav rua puab, puab txhaj yuav muaj noj muaj haus nplua-mag.
19“Has kuas puab coj tsheb neeg huv tebchaws Iziv nuav moog tog puab tej quaspuj mivnyuas hab koj txiv lug nyob huv tebchaws Iziv nuav. 20Kuas puab tsi xob khauvxwm txug puab tej cuabyeej toomtxeem kws yuav muab tsotseg; ruaqhov tej kws zoo tshaajplawg huv tebchaws Iziv nuav yuav yog puab tug huvsi.”
21Yakhauj cov tub ua lawvle tej lug kws has rua puab lawm. Yauxej muab tau ntau lub tsheb neeg rua puab lawvle Falaus tau xaaj tseg, hab muab zaub-mov rua puab coj moog tau noj taug kev. 22Yauxej muab tau ib leeg ib cev tsoogtsho tshab rua nwg cov tijlaug, tabsis nwg muab tau 300 lub txajnyag hab tsib ce tsoogtsho rua Npeeyamees. 23Nwg muab tau kaum tug neegluav thauj tej khoom kws zoo tshaajplawg huv tebchaws Iziv moog rua nwg txiv, hab muab dlua kaum tug neegluav thauj nplej, ncuav hab lwmyaam zaub-mov rua puab tau noj taug kev. 24Nwg txhaj xaa nwg cov kwvtij rovqaab. Hab thaus puab sawvkev moog, nwg has rua puab tas, “Mej tsi xob siscaav sistshe tom tej tog kev nawb.”
25Puab tawm huv tebchaws Iziv rovqaab moog tsev, moog cuag puab txiv Yakhauj kws nyob rua peg tebchaws Kana-aas. 26Puab has rua Yakhauj has tas, “Yauxej tseem muaj sa nyob! Nwg yog tug kws kaav taagnrho tebchaws Iziv!” Yakhauj cale yoob taag hab tsi ntseeg tej lug kws puab has ntawd.
27Tabsis thaus puab pav txhua yaam kws Yauxej has rua Yakhauj noog taag, hab thaus nwg pum cov tsheb kws Yauxej xaa tuaj tog nwg moog nyob rua huv tebchaws Iziv, nwg txhaj rov zoosab. 28Nwg has tas, “Tseeb tag lau! Kuv tug tub Yauxej tseem muaj sa nyob! Kuv yuavtsum moog pum nwg uantej kuv tuag.”
လက္ရွိေရြးခ်ယ္ထားမွု
Chivkeeb 45: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.