Proverbs 17
17
1Iluałhaaqtuq punniqtuġniq pannaqłuŋaruamik tutqiksuaġuni
niqinaqiniġmiñ iñugiaktuani qaniġviḷuktuani.
2Isumaturuaq kivgaq qaunaksriġuġniaqtuq umialgum miqłiqtuanun kanŋunaqtuamun
aasii kiŋuvaannaguni miqłiqtuŋisun.
3Maniich kaviqsuallu qatiqtuallu uuktuqtausuurut ignikun,
aasii iñuum uummataa uuktuqtausuuruq Ataniptigun.
4Piḷuktuat iñuich naalaġnisuurut piḷuktuanik isummatinik,
suli sagluturuat naalaġnisuummiut sagluuġutinik.
5Kipagigupkich suiḷḷiuqtuat iñuich, tavra pisaaŋagiñ God savaŋaruaq iliŋiññik.
Tatavsaqtauniaqtutin quviasaaġutigigupku allam iluiḷḷiuġniŋa.
6Ataataaguruat kamatchautigisuugaich tutaaluutik,
tainnaptaup miqłiqtut kamatchautigimmatun aŋayuqaatik.
7Qiksignaqtuat iñuich sagluuyuitchut,
aasiiḷi isumalluaġiitchuat nipaisaaġumik iluałhaaqtut.
8Iḷaŋich iñuich isumasuurut akiḷiun saglutautikun savallanasugilugu aanġuatun;
ukpiġigaat sunigliqaa piḷḷanasugilugu.
9Iñugnun nakuaġitquguvich, suliqutigiŋaikkich aŋalamaqłuutiŋich iliŋnun.
Itqaumaniq killukuaqtautinik maqurrutausuuruq availatqatigiiksuanun.
10Puqiksuaq iñuk iḷitchiłhaaġuuruq atausimiñ suagunmiñ
isumalluaġiitchuam iḷiññiŋaniñ iñugiaktuani anaullaqługu tallimakipiatun (100x) iḷisautigaluaqtilluni.
11Pigiitchualiqirit ivaqłiġuurut paaqłaŋŋanmik Ataniġmun;
tavraasii kiliksiri tuqqunmun tilirauniaqtuq paaqłiutauluni.
12Anayanaił̣haaqtuq kasuqsiñiq akłamik piayaamiñik tammairuamik
kasuqsiñiġmiñ isumalluaġiitchuamik aptatiqaqtuamik piuŋiḷamik.
13Utiqtitchivigigupku iluaqtuaq piḷuktuamik,
piiġumiñaitkiñ pigiitchuaq iglugniñ.
14Isagutipkaiñiq qanaaġniġmun arriqaqtuq maqipkaisaqpaalluktuatun sapukutaligmik imaġmun;
nutqaqtirruŋ ayuuŋaiñŋaan.
15Suksraunġiqsauniq patchisaitchuamun naagga pigiiḷḷiqiruamun suliqutigiŋaiqsiñiq—
iluqaaktun Atanġum uumigigaik.
16Ikayuutauŋitchuq maniksuġniq iḷisaqtitchaġlugu isumalluaġiitchuaq,
qanukkii iluaqtuamik isumaitchuq.
17Avilaitqatauruat nakuaqqutiktik qiñiqtitchuugaat.
Nanmiñiq iḷat suuvat iluiḷḷiuġutinik ikayuutauŋitpata avanmun?
18Isumatuitchuaq kisimi unniqsuqłiiñiaqtuq
piginiaġniḷugich allam iñuum akiiḷaŋich.
19Nakuuqsraġniq piḷuktuamik ittuq iluiḷḷiuġusiuqtuatun.
Kamanirraaġuuguvich ataramik, iluiḷḷiuġutisiuqtutin.
20Kiñaliqaa isumaqaqtuaq naagga uqaluqaqtuaq pigiitchuanik
paqitchiyuminaitchuq nakuuruamik—pimaqłuunmik kisian.
21Allamik piitchuq
aglaan ipiqtusuunmiglu isumaaġunmiglu
aŋayuqaaguruagnun miqłiqtuŋi isumalluaġiitchuanik pimmata.
22Quvianġutuniġum timin iluaqtinniaġaa.
Tuquniugautauruq ipiqtususuŋaiññaġniq.
23Pigiiḷḷiqiruat isivġiqsit akuqtuġuugai akiḷiutit saglutautikun,
taimmaasii iluaqtuamik isivġiutaił̣ł̣uni.
24Isumaturuaq iñuk iluaqtuakun savaguuruq,
aglaan isumatuitchuaq isagutisuuruq avigaaŋavluni.
25Isumalluaġiitchuat miqłiqtut isumaaluutiqaqtitchuugaich aapatik
suli nagliksaaqtiłługich aakatik.
26Iluaŋitchuq akiḷiipkaqtuni patchisaitchuaq iñuk;
isivġiiñiq piḷuktuq iluakkuaqtuat iñuich tatavsaqtaukpata.
27Iñuich avigaaŋaŋitchuat uqqaqtuitchut.
Iñuich piłłaktautaitchuat kaŋiqsimmatiqaqtut.
28Amiami, isumalluaġiitchuat unnii isummatauyumiñaqtut isumatuniḷugiḷḷu
puqigñiḷugiḷḷu nipaisaaqpata.
လက္ရွိေရြးခ်ယ္ထားမွု
Proverbs 17: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)