Proverbs 16
16
1Iñuich sivunniuġugaluaqtut uumatiptigniñ,
aglaan God-im uqalua kaŋiuruq.
2Sunaliqaa piran iluaġnasugisuugiñ,
aglaan Atanġum isivġiġuugai pisuutivut.
3Apiqsruqługu Ataniq anniqsuqulugi sivunniuġutitin,
aasii piḷḷuataġniaqtutin taŋiġupki.
4Sunaliqaa Atanġum savaaŋa sivuniksraqaqtuq;
aasii sivuniksraŋa pigiiḷḷiqirauruam suksraunġiġñiq.
5Atanġum piḷugigaa kiñaliqaa arguaŋaruaq;
annaktitchumiñaipiagai tatavsaunmiñ.
6Iḷumutuuġlutillu ukpiġutiqaġutillu aasii God-im suliqutigiŋaiġñiaġai piḷuutitin.
Kamagilugu Ataniq aasii pigiitchuam naŋaġniaġaatin.
7Iviġakkupku Ataniq akiḷḷiitin avilaitqatiliutiniaqtut iliŋnun.
8Nakuułhaaqtuq mikiruamik akiññaktuni,
akiññakpagniġmin saglutaġluni.
9Itqanaiyaġniaġaluaqtutin,
aglaan God-im aullatiniaġaa sivuniksran.
10Umialgum uqaluŋi tuniqturut;
sivunniutiŋich iluasuŋaiññaġuurut.
11Atanġum iluaqtuagutqugaich uqumaisilaaġutipayaat
suli uuktuutipayaat nalaunŋalugich akiksraŋich.
12Umialguruat naġġugigaat killuliqiñiq,
qanukkii iksivautaŋa inillaŋaruq nalaunŋaruakun.
13Umialik tusaasuguuruq iḷumun ittuanik
tavraasii iviġaumaginiaġaich iḷumun uqaqtuat.
14Isumaturuam iñuum quviasuktinniaġniaġaa umialik;
umialik qinnaliqpan iḷaanni iñuk tuqutauviaqtuq.
15Umialgum iviġaummataa ittuq irrusiatun nuviyat sialuksratun upinġaksrami—
iñuggun ittuq tavrani.
16Iluałhaaqtuq isumattutiqaġniq
suli iḷisimmatiqaġniq kaviqsuanik naagga qatiqtuanik maniqaġniġmiñ.
17Iluaqtuakuaqtuat apqutaat piḷuktuakuayuitchuq;
tavraasii qaunakłaaġitchi sukuaqtilaavsiññik—suagguuq annaktusi.
18Kamanniraaġniq maqurrutauruq,
suli arguaŋaaġniq suksraunġiutausuuruq.
19Nakuułhaaqtuq qiñuitchuni suiḷḷiughuniḷu,
arguaŋaniġmiñ piññaguni tigligaaniñ.
20Kaŋiqsimmaġiksaakkich iḷisaurrusiatin, aasii piḷḷuatautiqaġniaqtutin;
ukpiqqutiqaġiñ Ataniġmun aasii quviasuutiqaġniaqtutin.
21Isumaturuaq, qatqiñŋaruaq iñuk iḷisimanaġuuruq kaŋiqsimmatiqaqtuaq.
Uqaluŋich iviġaumanaqtuat piyumisaałhamaaqtut.
22Isumattutiqaġniq iñuggutauruq isumaturuamun,
aglaan iḷisaurriñiq isumatuitchuanun asiñun savaaguruq.
23Puqiksuat iñuich isumalaaqqaaqhutik uqallaguurut;
tavraasii uqaluŋich ukpiġnałhaaqłutik.
24Uqalulluatat ittut honey-tun—
siiġñaaqtut suli ikayuutaurut timimun.
25 #
Pr 14.12. Apqun iluaġnasugigaluaqtan,
aglaan tuqqunmun ittuq.
26Savaktuaq aqiaġuata savakpaktitchuugaa,
qanukkii kaaŋaiġukłuni.
27Piḷuktuat iñuich ivaqłiasuurut anniaġutiksramignik allanun;
uqaluŋiunnii ikualaruatun piḷuunmi ittut.
28Uqautikłiġñiq siamitchuugaat piḷuktuat iñuich;
piunġiutausuuruq suli avilaitqatigiich maqułługich.
29Qinnał̣ł̣ayuktuat iñuich saglutaġuugaich avilaitqatiitik
aasii suksraunġiutivlugich.
30Qaunatqiġitchi iñugnun iglaġusuktuallu iriŋmigaqtuallu iliŋnun;
isummatigigaat imma piḷuktuaq.
31Qirġich qiñiyunaqtut niaquġutit;
aitchuutauruq iluaqtuakun iñuuniaqtuanun.
32Qiñuiññiq iluałhaaqtuq suaŋŋatiqpaqaġniġmiñ.
Iluałhaaqtuq ilimun aŋalallaruni aŋalatchiñiġmiñ iniqpauruanik.
33Iñuich nalautchaqtaġuugaat God-im pisuutaa
aglaan God-im kisianik sivuniŋa aŋalatkaa.
လက္ရွိေရြးခ်ယ္ထားမွု
Proverbs 16: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)