Proverbs 18
18
1Iñuich atunim iñuuniaqatiqayuitchuat allanik iñugnik inmignun kisian isummatigisuurut;
akiḷḷiqsruġniaġaat sunaliqaa kialiqaa iluaġiraŋa.
2Isumalluaġiitchuam suliqutigiŋitkaa sumik kaŋiqsiŋitkaluaqami;
kamanniraaġuksiññaqtuq qanutun puqiksilaamiñik.
3Piḷuullu kanŋunaqtuaġlu atautchikuaqtuk.
Qiksiksrautiqaġniġiñ piiqpan, kipakkutim simmausiġñiaġaa.
4Iñuum uqaluŋich isumattunmun ikayuutaurut, ititigirut taġiutun, nutaurut kuuġuluuratun.
5Iluaŋitchuq qutchiksiḷiġniq patchisauruamik
aasii patchisaitchuaq ikayuusiaqaqtinŋił̣ł̣ugu nalaunŋaruakun.
6Isumatuitchuaq qanaaqtitchigami piyuktitchuuruq.
7Isumatuitchuaq uqalugmigun inmiñuñ maqutchuuruq;
uqaluŋisa utiġvigisuugaat.
8Uqautikłiġñiq niqitun kayumiġnaqtuatun ittuq—
niġisauraġuuraptiktun.
9Iqiasuuruaq iñuk ittuq maqutchiritun.
10Atanġum atiŋa ittuq anayanaitchuatun nasiqsruġviktun,
nalaunŋaruat annaksimaaġviksraŋatun.
11Aglaan umialguruat iñuich isumasuurut umialgutigmignun annausimaniaġnasugilutik
qutchiksuatullu suaŋaruatullu katchiqpauruatun inimigni.
12Kiñaliqaa qutchiksuaġisuitkaat qiñuiñŋisuaġman;
arguaŋaruat iñuich igliqtut suksraunġiġvigmun.
13Naalaġniiñ kiusiŋaiñŋaqpich.
Naalaġniŋiññavich, isumalluaġiitchutillu kanŋunaqtutillu.
14Iñuuyummatikpich sivunmuupkaġniaġaatin naŋitkuvich,
aglaan iñuuyummataiġuvich niġiukkutaiġñiaqtutin.
15Puqiksuat iñuich iḷitchiyummaqturut.
16Kasuisukpich nuimarauruamik iñugmik?
Aitchuutiksraqaġuvich siġġaġnaiññiaqtuq.
17Sivulliq uqaqtuaq uqaqsitaaġvigmi iluamik
uqaġnasuginaqtuq akiḷḷianun apiqsruqtaġnaqsiñiŋanunaglaan.
18Malġuk piḷguruak iññuk akiḷḷiġiikpagnik uqaqsitaaġvigmi,
nalautchaġaġutik akimaruaq akimaniaqtuq.
19Ikayukkich iḷatin aasii ikayuġniaġaatin suaŋaruatun iniqpaum katchiŋatun,
aglaan atiŋitkuvsi, umŋutiniaġaatin.
20Igḷutuqtuksraġigitin aquvaaksraŋich uqalupayaaqpich.
21Uqalukpich annautillagaa iñuusiŋa iñuum naagga maqullagaa;
tavraasii igḷutuqtuksraġigitin aquvaaksraŋich uqalukpich.
22Tuvaaqatiniktuaq inmiñun ikayuqtuq;
iviġaumaginiaġaa Atanġum.
23Suiḷḷiuqtuaq uqallakkami qiñuiḷaamik pisuuruq,
aglaan umialguruaq kiusikami uqalugiitchuq.
24Iḷaanni avilaitqatigiigñiq naitchuuruq,
aglaan iḷaŋich avilaitqatauruat piŋitqataayuił̣haaqtut aniqatauruaniñ.
လက္ရွိေရြးခ်ယ္ထားမွု
Proverbs 18: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)