Proverbs 15
15
1Kiurił̣ł̣aktaŋitchuam qinnaun suaŋaŋaiġuugaa,
aglaan ipiktuam uqaluum piavsaisuugaa.
2Isumaturuat uqaqamik, iḷisimmatiqaġniq kipiġnaqsisuugaa,
aglaan isumatuitchuat asiñik uqaġuurut.
3Atanġum qiñiġaa sunapayaaq;
ilaan qiñiġaatigut, iluaqtuakuaġapta naagga piġiitchuakuaġapta.
4Arautauruat uqaluich ikayuutaurut iñuusiġmun,
aglaan uqamaqłuutit anniaġutaurut iḷitqusimun.
5Iluaŋitchuq suliqutigiŋitchuni aŋayuqaaguruak iḷisaurrutaak;
ikayuutauruq akuqtuaġiruni iluaqsruutaak.
6Nalaunŋaruakuaqtuat iñuich tammaisuitkaich suġallaktaatik,
aglaan pigiiḷḷiqirauruat tammaisuugaich siġġaġnaqsimman.
7Iḷisimman siamitchuugaat iñuich isumaturuat,
siamitchuitkaat isumatuitchuat.
8Ataniq iviġaguuruq iñulluatat aŋaiyyummata,
aglaan piḷugigaich aitchuutiŋich pigiiḷḷiqirauruat iñuich.
9Atanġum piḷugigaich piḷġusiŋich pigiiḷḷiqirauruat iñuich,
aglaan nakuaġigaich nalaunŋaruakuaqtuat.
10Killukuaqtaġuvich, tatavsaqtauniaqtutin;
tuquniaqtutin kamagiŋitkupkich natqiksruutitin.
11Iniŋanni tuquŋaruat unnii iriqtuġumiñaitkaich sut Ataniġmiñ;
qanuġutaasii iriqtuġumiñaqpisigik isumavut God-miñ?
12Inmiñun qutchigiruaq iñuk natqiksruqusuitchuq;
ikayuqtisiuyuitchut isumaturuamiñ.
13Iñuich quviasukkamik, iglaŋaaġuurut,
aglaan ipiqtusukkamik ilitqusiŋat siqumitausuuruq.
14Puqiksuat iñuich iḷitchivsaaġuguurut,
aglaan isumalluaġiitchuat naamaruaġisuurut inmignun.
15Iñuuniaġniq piiḷḷiuqhuni siġġaġnaqtuq,
aglaan quviasukhutik iñuuruat quviagigaat iñuusiqtik.
16Iluałhaaqtuq suiḷḷiuqtuni suli qiksigivlugu Ataniq
umialguniġmiḷḷu isumaaluutiqpaqaġniġmiḷḷu.
17Iluałhaaqtuq niġiqaqtiqaqtuni naammaktuamik piqpakun inman
niġiñigmiñ niqilluatamik uumikkutiqaqtuami.
18Uumitchałłaktaġniġum qanaaġun ititchuugaa,
aglaan qiñuirrutim tutqiun ititchuugaa.
19Iqiasuutuguvich siġġaġniuġniaqtutin sumiḷiqaa,
aglaan iḷumutuuġuvich siġġaqiniaŋitchutin.
20Isumaturuat miqłiqtut aapatik quviasuktitchuugaich.
Isumalluaġiitchuat uumigigaich aakatik.
21Isumalluaġiitchuat quviagigaat asiḷiqqutiktik,
aglaan isumaturuat siatqiksuakuaġuurut.
22Ikayuqtisiusuŋaiññaġitchi siḷġiqsuiriniñ, aasii piḷḷuataġniaqtusi;
tainna piŋitkuvsi piḷḷuataġniaŋitchusi.
23Qanutun quyanaqtigiva iluapiaġataqtuamik uqalugmik qaitchiruni!
24Isumaturuat iñuich tuvraġaat qunmun apqun iñuusiġmun,
apqutauruaŋiḷaamun anmun tuqqunmun.
25Atanġum siquminniaġaich aimaaġviŋich arguaŋaaqtuat iñuich,
aglaan qaunaginiaġaa uiḷgaŋaruam suġauttaŋa.
26Atanġum uumigigaich pigiitchuat isumat,
aglaan iviġaumagigaich uqalulluatat.
27Saglutautikun sunnagniaġuvich siġġaġniuliqsinniaġitin aimaaġviqatiitin.
Akuqtuġnagich akiḷiutit saglutautikun aasii iñuuqpagutin.
28Iluaqtuakun iñuuruat isumalaaġutigisuugaat kiggutiksraqtik.
Pigiitchuat iñuich akkupauraq kiurisuurut, aglaan siġġaġniuġutausuuruq.
29Iluaqtuakun iñuuruat aŋaiyyummata Ataniq naalaġnisuuruq,
aglaan naalaġnisuitkaich pigiitchuat.
30Iglaŋaaqtuat quviasaaġuugaatin,
suli tusaayugaaġiksuat quviatchaisuugaatin.
31Naalaġnisuuguvich iluaqsruġmatin iñuich isumaturutin.
32Naalaġniŋitkuvich iliŋnun anniaqtutin.
Iluaqsruutiŋich iñuich akuqtuġupkich isumatusiñiaqtutin.
33Qiksikkutiqaġniq Ataniġmun iḷisaurutausuuruq isumattunmun.
Qiñuiqtuksraurutin akuqtuusiaqaġniaġuvich nanġautinik.
လက္ရွိေရြးခ်ယ္ထားမွု
Proverbs 15: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)