Proverbs 14
14
1Aimaaġviich savaagurut isumattutaagun aġnam,
aglaan isumalluaġiitchuam siqumitchuugaa argagmiñik.
2Iḷumutuuġiñ aasii qiñiqtitkiñ qiksiksrautin Ataniġmun,
iḷumutuuŋiññavich iḷisimanaqtuq qiksiksrautaitchuatin.
3Isumalluaġiitchuam uqaluŋisa maqutchuugaa arguaŋŋataata;
uqaluŋisa isumaturuat ikayuġuugaich.
4Qimuktaitkuvich nauriaqaġniaŋitchutin,
aglaan qimuktiqaġuvich nauriaqaġniaqtutin.
5Iḷumutuuqtuaq sagluuyuitchuq,
aglaan iḷumutuuŋitchuaq sagluturuq.
6Inmiñun qutchigiruaq isumatusiyumiñaitchuq,
aglaan puqiksuaq iḷitchiyaruq.
7Piqatiginagich isumatuitchuat;
sumik iḷisautiyumiñaitkaatin.
8Summan puqiksuaq isumatuva? Qanukkii iḷisimaruq suruksrautilaamiñik.
Summan isumalluaġiitchuaq isumatuitpa? Qanukkii isumałhiñamiñi iḷisimanasugiruq.
9Isumalluaġiitchuat sugiŋitkaat piḷuusiqigumik,
aglaan iñulluatat suliqutigiŋaiġunmik apiqsrisuurut.
10Quviasuutigiran ilvich pigigiñ; uumiḷuġruutin ilvich pigigiñ.
Allam iñuum iḷisimayumiñaitkaa.
11Iluaqtuakun iñuuruam igluŋa makitaniaqtuq,
piḷuusiqiruam igluŋa siqumitauganikpan.
12 #
Pr 16.25. Apqun iluaġnasugigaluaqtan,
aglaan tuqqunmun ittuq.
13Iglaqhaqtaġniġum matullagaa ipiqtusuun.
Quviasugniq nuŋumman ipiqtusuunsuli ittuq.
14Nalaiñ iñuuŋitchuat piññagniaqtut nalliġiramignik.
Iluatun iñuuruat akiññagniaqtut savaamikkun.
15Isumalluaġiitchuam ukpiġiniaġaa sunaliqaa;
isumaturuat iñuich qaunakłaaġuurut.
16Isumaturuat iñuich pimaqłutchaiḷisuurut,
aglaan isumatuitchuat isumalaaġaluaġatik pisuurut.
17Iñuich piavsayaruat pimaqłuktaġuurut;
isumaturuat pił̣ł̣aktayuitchut.
18Naluruat iñuich piññaguurut isumatuisilaamiktun,
aglaan puqiksuat aitchuusiaqaġuurut iḷisimmanmik.
19Piḷuktuat iñuich punniaqtut nalaunŋarualiqiruamun suli ikayuqtisiuġvigilugu.
20Kia unnii nakuaġiŋitkaa suiḷḷiuqtuaq, siḷalliŋisa unnii,
aglaan suiḷḷiuŋitchuaq avilaitqataukkaqtuq.
21Quviasugukkuvich, nagligikkich suiḷḷiuqtuat,
piḷuutauruq uumisuutiqaqtuni kimulliqaa.
22Ukpiġiniaġaatillu qiksiginiaġaatillu savakkuvich nakuuruamun;
savakkuvich piḷuktuamun, killukuaqtutin.
23Savaaqaġiñ aasii sunnagniaqtutin;
aqupiksuaqsiññaġuvich uqaqsiññaġutin suiḷḷiuġniaqtutin.
24Isumaturuat iñuich suġallisuurut,
aglaan isumatuitchuat qiñiqtitkaat isumatuiññini.
25Iḷisimarauruat annautisuugaich iñuusiŋich iñuich iḷumun uqaġamik;
sagluuġami, aitchuutigisuugaich iñuich.
26Qiksiksrautiqaġniq Ataniġmun nalupqisuutairrutiqaqtitkaaŋa suli tuniqsimmatiqaqtitkaalu iñuk iḷaniḷu.
27Tuqusuŋitpich?
Qiksiksrautiqaġnik Ataniġmun iñuggutauruq.
28Umialgum suaŋaniŋa tunŋaruq qanutun iñugiaktilaaŋiññik iñuich aŋalattaŋi;
piitpata ilaa suuŋitchuq.
29Piavsautaitkuvich, isumaturutin,
aglaan piavsayaguvich, qiñiqtittutin qanutun isumatuisilaaġnik.
30Tutqiksuam isumam timi iluaqtitkaa,
aglaan saŋiaktuni naŋirrutiġruatun ittuq.
31Aŋalamaqłukkupkich iḷiappauruat iñuich, kipagigiñ God savaŋaruaq iliŋiññik;
aglaan aŋalalluataiñiq iliappauruanun nanġairuatun ittuq.
32Pigiiḷḷiqirauruat iñuich inmignun maqutchuurut piḷuktualiqigamik,
aglaan nakuuruat iñuich anayanniuŋitchut ilumutuuġuuvłutik.
33Isumattun ittuq isumapayaaŋani puqiksuam iñuum;
isumalluaġiitchuat nalurut isumattunmik.
34Iluaqtuakuaġniġum suammatiqaqtitchuugaa nunaqpak;
piḷuusiqiniq kanŋusautauruq nunaqpagmun.
35Umialgich iviġaumagigaich isumaturuat atanaurat,
aglaan tatavsaġuugaich piḷḷuataŋitchuat.
လက္ရွိေရြးခ်ယ္ထားမွု
Proverbs 14: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)