ܩܘܗܠܬ 2
2
ܒܘܼܣܵܡܹ̈ܐ ܣܪܝܼܩܘܼܬܵܐ ܝܢܵܐ
1ܐ݇ܡܝܼܪܝܼ ܐܵܢܵܐ ܒܠܸܒܝܼ، ”ܬܵܐ، ܫܒ݂ܘܿܩ ܓ̰ܲܪܒܸܢܘܼܟ݂ ܓܵܘ ܒܘܼܣܵܡܵܐ، ܘܚܙܝܼ ܟܡܵܐ ܨܦܵܝܝܼ ܝܠܹܗ.“ ܘܗܵܐ، ܐܘܼܦ ܗ̇ܝ ܣܪܝܼܩܘܼܬܵܐ ܝܠܵܗ̇. 2ܠܓܚܵܟܬܵܐ ܐ݇ܡܝܼܪܝܼ، ”ܫܹܐܕܵܢܘܼܬܵܐ ܝܠܵܗ̇،“ ܘܠܚܲܕܘܼܬܵܐ، ”ܡܘܿܕܝܼ ܝܠܹܗ ܦܠܵܛܘܼܗ̇؟“ 3ܬܘܼܚܡܸܢܝܼ ܒܠܸܒܝܼ ܠܡܲܒܣܘܼܡܹܐ ܒܚܲܡܪܵܐ ܦܲܓ݂ܪܝܼ، ܟܲܕ ܡܗܲܕܘܼܝܹܗ ܠܸܒܝܼ ܒܚܸܟ݂ܡܬܵܐ، ܘܠܸܕܒ݂ܵܩܵܐ ܒܣܲܟ݂ܠܘܼܬܵܐ، ܗܲܠ ܕܚܵܙܹܝܢ ܡܘܿܕܝܼ ܝܠܹܗ ܨܦܵܝܝܼ ܩܵܐ ܒܢܲܝ̈ ܐ݇ܢܵܫܵܐ ܕܥܵܒ݂ܕܝܼ ܬܚܘܿܬ ܫܡܲܝܵܐ ܒܡܸܢܝܵܢܵܐ ܕܝܵܘܡܵܢܹ̈ܐ ܕܚܲܝܲܝ̈ܗܝ. 4ܓܘܼܪܘܸܣ ܠܝܼ ܠܦܘܼܠܚܵܢܝܼ̈، ܒܢܹܐ ܠܝܼ ܩܵܐ ܓܵܢܝܼ ܒܵܬܹ̈ܐ، ܢܨܝܼܒ݂ ܠܝܼ ܐܸܠܝܼ ܟܲܪ̈ܡܵܢܹܐ، 5ܥܒ݂ܝܼܕ ܠܝܼ ܩܵܐ ܓܵܢܝܼ ܓܲܢܹ̈ܐ ܘܦܲܪ̈ܕܲܝܣܹܐ، ܘܢܨܝܼܒ݂ ܠܝܼ ܓܵܘܲܝܗܝ ܐܝܼܠܵܢܹ̈ܐ ܕܟܠ ܛܥܘܼܢܬܵܐ، 6ܥܒ݂ܝܼܕ ܠܝܼ ܐܸܠܝܼ ܒܸܪ̈ܟܹܐ ܕܡ̈ܝܼܵܐ، ܠܡܲܫܬܘܼܝܹܐ ܡܸܢܲܝܗܝ ܡܲܝܫܵܐ ܡܲܓ̰ܝܸܢܵܢܬܵܐ ܕܐܝܼܠܵܢܹ̈ܐ. 7ܩܢܹܐ ܠܝܼ ܪܹ̈ܓܵܘܵܬܹܐ ܘܚܹܕܲܡܝܵܬܹ̈ܐ، ܘܒܢܲܝ̈ ܒܲܝܬܵܐ، ܘܗܘܹܐ ܠܵܗ̇ ܠܝܼ ܐܘܼܦ ܩܢܵܝܬܵܐ ܕܒܸܩܪ̈ܵܬܹܐ ܘܦܸܣܩܹ̈ܐ، ܒܘܼܫ ܙܵܘܕܵܐ ܗܘܹܐ ܠܵܗ̇ ܠܝܼ ܡ̣ܢ ܟܠ ܕܗܘܹܐ ܠܗܘܿܢ ܡ̣ܢ ܩܵܕ݇ܡ ܕܝܼܝܼ ܓܵܘ ܐܘܿܪܸܫܠܸܡ. 8ܓ̰ܘܼܡܸܥ ܠܝܼ ܩܵܐ ܓܵܢܝܼ ܐܘܼܦ ܣܹܐܡܵܐ ܘܕܲܗܒ݂ܵܐ ܘܣܝܼܡܵܬܹ̈ܐ ܕܡܲܠܟܹ̈ܐ ܘܕܡܕܝܼܢܵܬܹ̈ܐ، ܫܩܝܼܠ ܠܝܼ ܩܵܐ ܓܵܢܝܼ ܙܲܡܵܪܹ̈ܐ ܘܙܲܡܵܪ̈ܝܵܬܹܐ، ܘܛܲܥܡܵܬܹ̈ܐ ܕܒܢܲܝ̈ܢܵܫܵܐ، ܘܕܪ̈ܘܼܟ݂ܝܵܬܹܐ ܦܸܪ̈ܝܹܐ. 9ܘܓܘܼܪܘܸܣ ܠܝܼ ܘܡܘܼܙܝܸܕ ܠܝܼ ܡ̣ܢ ܟܠ ܕܗܘܹܐ ܠܹܗ ܡ̣ܢ ܩܵܕ݇ܡ ܕܝܼܝܼ ܓܵܘ ܐܘܿܪܸܫܠܸܡ، ܐܘܼܦ ܚܸܟ݂ܡܬܝܼ ܦܝܼܫ ܠܵܗ̇ ܠܟܸܣ ܠܝܼ. 10ܘܟܠ ܕܛܠܝܼܒ ܠܗܘܿܢ ܥܲܝܢܝܼ̈ ܠܵܐ ܚܣܝܼܟ݂ ܠܝܼ ܡܸܢܲܝܗܝ، ܠܵܐ ܡܘܼܟܠܹܐ ܠܝܼ ܠܸܒܝܼ ܡ̣ܢ ܟܠ ܚܲܕܘܼܬܵܐ، ܣܵܒܵܒ ܠܸܒܝܼ ܚܕܹܐ ܠܹܗ ܒܟܠܹܗ ܥܲܡܠܝܼ، ܘܐܵܗܵܐ ܗܘܹܐ ܠܹܗ ܣܵܗܡܝܼ ܡ̣ܢ ܟܠܹܗ ܥܲܡܠܝܼ. 11ܗ̇ܝܓܵܗ ܦܘܼܟܸܪܝܼ ܐܵܢܵܐ ܒܟܠܲܝܗܝ ܦܘܼܠܚܵܢܹ̈ܐ ܕܐܝܼܕܵܬܝܼ̈، ܘܒܥܲܡܠܵܐ ܕܥܒ݂ܝܼܕ ܠܝܼ، ܘܗܵܐ، ܟܠܹܗ ܣܪܝܼܩܘܼܬܵܐ ܝܠܹܗ ܘܩܦܵܝܬܵܐ ܕܦܵܘܚܵܐ، ܘܠܲܝܬ ܝܘܼܬܪܵܢܵܐ ܬܚܘܿܬ ܫܸܡܫܵܐ.
ܚܸܟ݂ܡܬܵܐ ܘܣܲܟ݂ܠܘܼܬܵܐ ܣܪܝܼܩܘܼܬܵܐ ܝܢܵܐ
12ܘܕܝܼܪܝܼ ܐܵܢܵܐ ܠܸܚܙܵܝܵܐ ܚܸܟ݂ܡܬܵܐ، ܘܫܹܐܕܵܢܘܼܬܵܐ، ܘܣܲܟ݂ܠܘܼܬܵܐ، ܣܵܒܵܒ ܡܘܿܕܝܼ ܡܵܨܹܐ ܥܵܒܹܕ ܐ݇ܢܵܫܵܐ ܕܐܵܬܹܐ ܡ̣ܢ ܒܵܬ݇ܪ ܡܲܠܟܵܐ، ܫܒ݂ܘܿܩ ܡ̣ܢ ܗ̇ܘ ܕܝܼܠܹܗ ܦܝܼܫܵܐ ܥܒ݂ܝܼܕܵܐ؟ 13ܘܚܙܹܐ ܠܝܼ ܐܵܢܵܐ ܠܚܸܟ݂ܡܬܵܐ ܒܘܼܫ ܝܲܬܝܼܪܬܵܐ ܡ̣ܢ ܣܲܟ݂ܠܘܼܬܵܐ، ܐܲܝܟ݂ ܕܒܲܗܪܵܐ ܒܘܼܫ ܝܲܬܝܼܪܵܐ ܡ̣ܢ ܚܸܫܟܵܐ. 14ܚܲܟܝܼܡܵܐ ܥܲܝܢܘܼ̈ܗܝ ܦܬܝܼܚܹܐ ܝܢܵܐ، ܐܝܼܢܵܐ ܣܲܟ݂ܠܵܐ ܒܚܸܫܟܵܐ ܟܹܐ ܚܵܕܹܪ. ܘܝ݇ܕܝܼܥ ܠܝܼ ܐܘܼܦ ܐܵܢܵܐ ܕܚܕܵܐ ܬܲܦܩܘܼ ܟܹܐ ܬܵܦܩܵܐ ܠܟܠܲܝܗܝ. 15ܘܐ݇ܡܝܼܪܝܼ ܐܵܢܵܐ ܒܠܸܒܝܼ، ”ܐܲܝܟ݂ ܬܲܦܩܘܼ ܕܣܲܟ݂ܠܵܐ، ܐܘܼܦ ܐܵܢܵܐ ܒܸܬ ܬܵܦܩܵܐ ܒܝܼܝܼ. ܒܲܣ ܡܘܿܕܝܼ ܝܗ݇ܘܵܐ ܝܘܼܬܪܵܢܵܐ ܕܚܸܟ݂ܡܬܵܐ ܩܵܬܝܼ؟“ ܘܐ݇ܡܝܼܪܝܼ ܒܠܸܒܝܼ ܕܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 16ܣܵܒܵܒ ܠܥܵܠܲܡ ܠܹܐ ܦܵܐܹܫ ܕܟ݂ܝܼܪܵܐ ܚܲܟܝܼܡܵܐ ܐܘܼܦ ܣܲܟ݂ܠܵܐ، ܣܵܒܵܒ ܒܝܵܘܡܵܢܹ̈ܐ ܕܐܵܬܝܼ ܟܠܲܝܗܝ ܒܸܬ ܦܵܝܫܝܼ ܢܸܫܝܹܐ، ܘܕܵܐܟ݂ ܡܵܐܹܬ ܚܲܟܝܼܡܵܐ ܥܲܡ ܣܲܟ݂ܠܵܐ!
ܥܲܡܠܵܐ ܣܪܝܼܩܘܼܬܵܐ ܝܠܹܗ
17ܘܣܢܹܐ ܠܝܼ ܠܚܲܝܹ̈ܐ، ܣܵܒܵܒ ܣܪܹܐ ܠܹܗ ܥܲܠܝܼ ܦܘܼܠܚܵܢܵܐ ܕܦܵܐܹܫ ܥܒ݂ܝܼܕܵܐ ܬܚܘܿܬ ܫܸܡܫܵܐ، ܣܵܒܵܒ ܟܠܹܗ ܣܪܝܼܩܘܼܬܵܐ ܝܠܹܗ ܘܩܦܵܝܬܵܐ ܕܦܵܘܚܵܐ. 18ܘܣܢܹܐ ܠܝܼ ܐܵܢܵܐ ܟܠܹܗ ܥܲܡܠܝܼ ܕܐܵܢܵܐ ܥܒ݂ܝܼܕ ܠܝܼ ܬܚܘܿܬ ܫܸܡܫܵܐ، ܣܵܒܵܒ ܒܸܬ ܫܵܒ݂ܩܹܢܹܗ ܠܐ݇ܢܵܫܵܐ ܕܗܵܘܹܐ ܡ̣ܢ ܒܵܬ݇ܪ ܕܝܼܝܼ. 19ܘܡܵܢܝܼ ܟܹܐ ܝܵܕܹܥ ܕܐܸܢ ܚܲܟܝܼܡܵܐ ܒܸܬ ܗܵܘܹܐ ܝܲܢ ܣܲܟ݂ܠܵܐ؟ ܘܒܸܬ ܗܲܟܸܡ ܒܟܠܹܗ ܥܲܡܠܝܼ ܕܥܒ݂ܝܼܕ ܠܝܼ ܒܚܸܟ݂ܡܬܵܐ ܬܚܘܿܬ ܫܸܡܫܵܐ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 20ܘܕܝܼܪܝܼ ܐܵܢܵܐ ܠܸܩܛܵܥܵܐ ܣܲܒ݂ܪܝܼ ܡ̣ܢ ܟܠ ܥܲܡܠܵܐ ܕܥܒ݂ܝܼܕ ܠܝܼ ܬܚܘܿܬ ܫܸܡܫܵܐ. 21ܣܵܒܵܒ ܐܝܼܬ ܐ݇ܢܵܫܵܐ ܕܥܒ݂ܝܼܕ ܠܹܗ ܥܲܡܠܹܗ ܒܚܸܟ݂ܡܬܵܐ، ܘܒܝ݇ܕܲܥܬܵܐ، ܘܒܟܲܫܝܼܪܘܼܬܵܐ، ܘܝܘܼܗ݇ܒ݂ܵܐ ܠܹܗ ܛܥܘܼܢܬܵܐ ܕܦܘܼܠܚܵܢܹܗ ܩܵܐ ܐ݇ܢܵܫܵܐ ܕܠܵܐ ܥܒ݂ܝܼܕ ܠܹܗ ܥܲܡܠܵܐ ܒܝܼܹܗ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܒܝܼܫܬܵܐ ܓܘܼܪܬܵܐ. 22ܣܵܒܵܒ ܡܘܿܕܝܼ ܟܹܐ ܗܵܘܹܐ ܠܒܲܪܢܵܫܵܐ ܒܟܠܹܗ ܥܲܡܠܹܗ ܘܒܒܵܥܘܼܬܵܐ ܕܠܸܒܹܗ ܕܥܵܒܹܕ ܬܚܘܿܬ ܫܸܡܫܵܐ؟ 23ܣܵܒܵܒ ܟܠܲܝܗܝ ܝܵܘܡܵܢܘܼ̈ܗܝ ܕܲܪ̈ܕܹܐ ܝܢܵܐ ܘܟܸܟ̰ܚܹܗ ܚܲܫܵܐ ܝܠܹܗ، ܐܘܼܦ ܒܠܲܝܠܹܐ ܠܹܐ ܡܲܢܝܸܚ ܠܸܒܹܗ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 24ܠܲܝܬ ܒܘܼܫ ܨܦܵܝܝܼ ܠܐ݇ܢܵܫܵܐ ܡ̣ܢ ܕܐܵܟܹܠ ܘܫܵܬܹܐ ܘܡܲܒܣܸܡ ܠܵܗ̇ ܓܵܢܹܗ ܒܥܲܡܠܹܗ. ܐܘܼܦ ܐܵܗܵܐ ܚܙܹܐ ܠܝܼ ܐܵܢܵܐ ܕܡ̣ܢ ܐܝܼܕܵܐ ܕܐܲܠܵܗܵܐ ܝܠܵܗ̇. 25ܣܵܒܵܒ ܡܵܢܝܼ ܡܵܨܹܐ ܐܵܟܹܠ ܘܡܵܢܝܼ ܡܲܒܣܸܡ ܒܠܵܐ ܕܝܼܹܗ؟ 26ܣܵܒܵܒ ܠܐ݇ܢܵܫܵܐ ܕܝܼܠܹܗ ܛܵܒ݂ܵܐ ܩܵܕ݇ܡ ܥܲܝܢܹܗ، ܐܲܠܵܗܵܐ ܟܹܐ ܝܲܗ݇ܒܸܠ ܚܸܟ݂ܡܬܵܐ، ܘܝ݇ܕܲܥܬܵܐ، ܘܚܲܕܘܼܬܵܐ، ܐܝܼܢܵܐ ܠܚܲܛܵܝܵܐ ܟܹܐ ܝܲܗ݇ܒܸܠ ܟܸܟ̰ܚܵܐ، ܠܓ̰ܲܡܘܼܥܹܐ ܘܠܟܲܦܘܼܫܹܐ، ܠܝܼܵܗ݇ܒ݂ܵܐ ܠܗ̇ܘ ܕܝܼܠܹܗ ܛܵܒ݂ܵܐ ܩܵܕ݇ܡ ܐܲܠܵܗܵܐ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܩܦܵܝܬܵܐ ܕܦܵܘܚܵܐ.
လက္ရွိေရြးခ်ယ္ထားမွု
ܩܘܗܠܬ 2: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation