ܩܘܗܠܬ 1
1
ܡܵܘܕܥܵܢܘܼܬܵܐ
1ܗܹܡܸܙܡܵܢܹ̈ܐ ܕܟܵܪܘܿܙܵܐ، ܒܪܘܿܢܵܐ ܕܕܵܘܝܼܕ، ܡܲܠܟܵܐ ܒܐܘܿܪܸܫܠܸܡ.
ܟܠܹܗ ܣܪܝܼܩܘܼܬܵܐ ܝܠܹܗ
2”ܣܪܝܼܩܘܼܬܵܐ ܕܣܪ̈ܝܼܩܘܼܝܵܬܹܐ،“ ܒܹܐܡܵܪܵܐ ܝܠܹܗ ܟܵܪܘܿܙܵܐ، ”ܣܪܝܼܩܘܼܬܵܐ ܕܣܪ̈ܝܼܩܘܼܝܵܬܹܐ. ܟܠ ܡܸܢܕܝܼ ܣܪܝܼܩܘܼܬܵܐ ܝܠܹܗ.“
3ܡܘܿܕܝܼ ܝܘܼܬܪܵܢܵܐ ܐܝܼܬ ܠܒܲܪܢܵܫܵܐ ܒܟܠܹܗ ܥܲܡܠܹܗ ܕܟܹܐ ܥܵܒܹܕ ܬܚܘܿܬ ܫܸܡܫܵܐ؟ 4ܕܵܘܪܵܐ ܟܹܐ ܐܵܙܹܠ، ܘܕܵܘܪܵܐ ܟܹܐ ܐܵܬܹܐ، ܐܝܼܢܵܐ ܐܲܪܥܵܐ ܠܥܵܠܲܡ ܡܩܵܘܝܵܢܬܵܐ ܝܠܵܗ̇. 5ܘܟܹܐ ܙܵܪܹܩ ܫܸܡܫܵܐ، ܘܟܹܐ ܓܵܢܹܐ ܫܸܡܫܵܐ، ܘܟܹܐ ܡܲܠܝܸܙ ܠܕܘܼܟܬܹܗ ܐܲܝܟܵܐ ܕܟܹܐ ܙܵܪܹܩ. 6ܟܹܐ ܐܵܙܹܠ ܦܵܘܚܵܐ ܠܬܲܝܡܢܵܐ ܘܟܹܐ ܚܵܕܹܪ ܠܓܲܪܒܝܵܐ، ܒܸܚܕܵܪܵܐ، ܒܸܚܕܵܪܵܐ، ܟܹܐ ܐܵܙܹܠ ܦܵܘܚܵܐ، ܘܟܹܐ ܕܵܐܹܪ ܠܓܸܓ݂ܠܵܐ ܕܚܕܵܪ̈ܘܼܗܝ. 7ܟܹܐ ܓ̰ܵܪܝܼ ܟܠܲܝܗܝ ܢܲܗܪ̈ܵܘܵܬܹܐ ܠܝܵܡܵܐ، ܐܝܼܢܵܐ ܝܵܡܵܐ ܠܹܐ ܝܠܵܗ̇ ܡܠܝܼܬܵܐ. ܟܹܐ ܕܵܝܪܝܼ ܡ̈ܝܼܵܐ ܕܢܲܗܪ̈ܵܘܵܬܹܐ ܠܕܘܼܟܬܵܐ ܕܓ̰ܪܹܐ ܠܗܘܿܢ، ܘܡܸܢܕܪܸܫ ܟܹܐ ܓ̰ܵܪܝܼ. 8ܟܠܲܝܗܝ ܡܸܢܕܝܼܵܢܹ̈ܐ ܡܲܓ̰ܗܝܼܵܢܹ̈ܐ ܝܢܵܐ، ܠܹܐ ܡܵܨܹܐ ܐ݇ܢܵܫܵܐ ܠܗܲܡܙܘܼܡܹܐ ܒܘܼܬ ܕܝܼܲܝܗܝ، ܠܹܐ ܣܵܒ݂ܥܵܐ ܥܲܝܢܵܐ ܡ̣ܢ ܠܸܚܙܵܝܵܐ، ܘܠܹܐ ܡܵܠܝܵܐ ܢܵܬܵܐ ܡ̣ܢ ܠܸܫܡܵܥܵܐ. 9ܡܸܢܕܝܼ ܕܗܘܹܐ ܠܹܗ ܗ̇ܘ ܝܼܠܹܗ ܕܒܸܬ ܗܵܘܹܐ، ܘܡܸܢܕܝܼ ܕܦܝܼܫ ܠܹܗ ܥܒ݂ܝܼܕܵܐ ܗ̇ܘ ܝܼܠܹܗ ܕܒܸܬ ܦܵܐܹܫ ܥܒ݂ܝܼܕܵܐ، ܘܠܲܝܬ ܡܸܢܕܝܼ ܚܵܕ݇ܬܵܐ ܬܚܘܿܬ ܫܸܡܫܵܐ. 10ܐܝܼܬ ܡܸܢܕܝܼ ܕܦܵܐܹܫ ܐ݇ܡܝܼܪܵܐ، ”ܚܙܝܼ ܐܵܗܵܐ، ܚܵܕ݇ܬܵܐ ܝܠܹܗ“؟ ܠܵܐ، ܡ̣ܢ ܓ̰ܲܠܕܹܐ ܗܘܝܼܵܐ ܝܠܹܗ، ܡ̣ܢ ܕܵܘܪܹ̈ܐ ܕܗܘܹܐ ܠܗܘܿܢ ܡ̣ܢ ܩܵܕ݇ܡ ܕܝܼܲܢ. 11ܠܲܝܬ ܕܟ݂ܵܪܵܐ ܠܩܲܕ݇ܡܵܝܹ̈ܐ، ܘܐܘܼܦ ܠܵܐ ܠܐ݇ܚܵܪ̈ܵܝܹܐ ܕܒܸܬ ܗܵܘܝܼ، ܠܹܐ ܗܵܘܹܐ ܐܸܠܲܝܗܝ ܕܟ݂ܵܪܵܐ ܠܟܸܣ ܐܵܢܝܼ ܕܗܵܘܝܼ ܒܵܬ݇ܪ ܗܵܕܵܐ.
ܚܸܟ݂ܡܬܵܐ ܣܪܝܼܩܘܼܬܵܐ ܝܠܵܗ̇
12ܐܵܢܵܐ، ܟܵܪܘܿܙܵܐ، ܗܘܹܐ ܠܝܼ ܡܲܠܟܵܐ ܥܲܠ ܝܼܣܪܵܝܹܠ ܒܐܘܿܪܸܫܠܸܡ. 13ܘܡܘܼܬܸܒ݂ ܠܝܼ ܠܸܒܝܼ ܠܸܛܥܵܝܵܐ ܘܠܨܲܚܨܘܼܝܹܐ ܒܚܸܟ݂ܡܬܵܐ ܥܲܠ ܟܠ ܕܦܝܼܫ ܠܹܗ ܥܒ݂ܝܼܕܵܐ ܬܚܘܿܬ ܫܡܲܝܵܐ، ܗ̇ܘ ܟܸܟ̰ܚܵܐ ܩܸܫܝܵܐ ܕܝܘܼܗ݇ܒܸܠ ܠܹܗ ܐܲܠܵܗܵܐ ܠܒܢܲܝ̈ܢܵܫܵܐ ܠܸܟܟ̰ܵܚܵܐ ܒܝܼܹܗ. 14ܚܙܹܐ ܠܝܼ ܠܟܠܲܝܗܝ ܥܒ݂ܵܕܹ̈ܐ ܕܦܝܼܫ ܠܗܘܿܢ ܥܒ݂ܝܼܕܹܐ ܬܚܘܿܬ ܫܸܡܫܵܐ، ܘܗܵܐ، ܟܠܹܗ ܣܪܝܼܩܘܼܬܵܐ ܝܠܹܗ ܘܩܦܵܝܬܵܐ ܕܦܵܘܚܵܐ. 15ܡܸܢܕܝܼ ܦܟ̰ܝܼܠܵܐ ܠܹܐ ܡܵܨܹܐ ܠܸܬܪܵܨܵܐ، ܘܡܸܢܕܝܼ ܚܣܝܼܪܵܐ ܠܹܐ ܡܵܨܹܐ ܕܦܵܐܹܫ ܚܘܼܫܒܸܢܵܐ.
16ܗܘܼܡܙܸܡ ܠܝܼ ܐܵܢܵܐ ܥܲܡ ܠܸܒܝܼ، ܒܹܐܡܵܪܵܐ، ”ܐܵܢܵܐ، ܗܵܐ، ܓܘܼܪܘܸܣ ܠܝܼ ܘܡܘܼܙܝܸܕ ܠܝܼ ܚܸܟ݂ܡܬܵܐ ܒܘܼܫ ܡ̣ܢ ܟܠ ܕܗܘܹܐ ܠܹܗ ܡܲܠܟܵܐ ܥܲܠ ܐܘܿܪܸܫܠܸܡ ܡܩܵܕ݇ܡ ܕܝܼܝܼ، ܘܠܸܒܝܼ ܚܙܹܐ ܠܹܗ ܦܸܪܝܘܼܬܵܐ ܕܚܸܟ݂ܡܬܵܐ ܘܝ݇ܕܲܥܬܵܐ.“ 17ܘܡܘܼܬܸܒ݂ ܠܝܼ ܠܸܒܝܼ ܠܝܼܕܵܥܵܐ ܚܸܟ݂ܡܬܵܐ ܘܝ݇ܕܲܥܬܵܐ، ܘܐܘܼܦ ܫܹܐܕܵܢܘܼܬܵܐ ܘܣܲܟ݂ܠܘܼܬܵܐ. ܘܝ݇ܕܝܼܥ ܠܝܼ ܕܐܘܼܦ ܐܵܗܵܐ ܩܦܵܝܬܵܐ ܕܦܵܘܚܵܐ ܝܠܵܗ̇. 18ܣܵܒܵܒ ܒܦܸܪܝܘܼܬܵܐ ܕܚܸܟ݂ܡܬܵܐ ܐܝܼܬ ܪܵܒܵܐ ܚܲܫܵܐ، ܘܡܲܙܝܸܕܵܢܵܐ ܕܝ݇ܕܲܥܬܵܐ ܟܹܐ ܡܲܙܝܸܕ ܟܹܐܒ݂ܵܐ.
လက္ရွိေရြးခ်ယ္ထားမွု
ܩܘܗܠܬ 1: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation