HAGONEGAHANI 41
41
O Josepo ki visigi na girarani na maruteha iana na maneraha
1Matena o Josepo ki hato huria na harisi gi rua i ruma ni hagaitangiha, na maneraha i Esipito ki marute. Ngaia ki marute, vi ura i na akerena na ve i Nile. 2Ngaia ki bâsira na puruka hehene gi pi, ga hura akê me tenia na ve. Ngaira ka binibinikaga ma ka bâkoro ngavê, ma ka haganega ka ngêngê na go. 3Ma hemuri ka hura akê me nikâ na puruka hehene gi pi. Ngaira ka rataga ma ki bera na apeta. Ngaira ka râ ura henira na ani ga bani akê me, ma ka ura i na akerena na ve. 4Na ani ga rataga ka ngêra ka unumira na ani ga binibinikaga. Ma na maneraha ki rite.
5Na matena i mêru so aporo, ngaia ki marute nikâ. Ngaia ki marute, vi rigia na apena gi tage na koni i hungu renigi na guani gi pi, ga agêguruga ma ka mata. 6Ma hemuri ka hungu me nikâ na guani gi pi, ga pe agêguruga, ma ka garoro renia na roga mahana i râ me tenia na bagabena raha. 7Na ani ga garoro ka ngê unumigi na ani i agêguruga. Ma na maneraha ki rite ma ki girara, vi ngaia ki marute.
8I tangi me, ma ngaia ki anumanuma. Vikê ngaia ki unira me na ara ni mane hato ni girarasiha ma na mane ni takoha mataha. Ngaia ki hagarongora renigi na maruteha iana, ma ki mareha rârâ ta na hitangita ge girara, vige ramatenigi na girarani tanga.
9Hoi, ma na mane ni karakara vaini ki vi tanga na maneraha, ki vi: “I ngekê inê kê tangahuriê, suria gê pe bani hagarongogo renia ta na marâ. 10I nago, matena go mangariaga tangagamirua na mane ni hahinga ni bereti menê, igo ki kasigamirua i ruma ni hagaitangiha i pasina na araha iata na mane ni me ga anumasigo. 11I ta na bungiana na ara ni hitangimirua ki marute. Na girarani ka tora hegitigi. 12Na Hebereo na mane na gapu haoru ki oga i ngekana henigamiru. Ngaia ki na kare vurivuri iana na araha iata na mane ni me ni anumasiha. Igamirua kamuru hagarongoa renigi na maruteha iamirua, ma ngaia ki ramatenigi na girarani tangagamirua hegetigi. 13Na girarani i visigi ka vora me mave. Igo ko nakê aporo igê na bani tagaraha iaku, ma ko nahuia ko kuharenia na mane ni hahinga ni bereti.”
14Na maneraha ki unia me o Josepo. Ga torea hura me ototo râ tenia na ruma ni hagaitangiha. Ngaia ki hegoro ma ki hagesuru bâkoro, ma ki râ i pasina na maneraha. 15Na maneraha ki vi tanga, ki vi: “Inê kê marute, ma ki mareha rârâ ta na enoni ge girara, vige ramatenigi me na girarani. Inê kê rongoa, vi igo ko girara, go ramatenigi.”
16O Josepo ki arami, ki vi: “Maneraha, inê ki mareha. God ma kani girara ma ki page visigi vê na girarani, ga page hagakoro obamu.”
17Na maneraha ki vi: “Inê kê marute, vi gê ura i na akerena na ve i Nile. 18Inê kê bâsira igê na puruka hehene gi pi, ga hurakê me tenia na ve. Ngaira ka binibinikage ma ka bâkoro ngavê, ma ka haganega ka ngêngê na go. 19Ma hemuri ka hurakê me nikâ na puruka hehene gi pi. Ngaira ka rataga ma ki bera na apeta. I Esipito hagenani inê kê pe bâsira rârâ igê vi na puruka ge rataga ma ke bera vigana. 20Na puruka ga rataga ka ngê unumira na ani ga binibinikaga. 21Henaka, i manga ngekana, ma ki asa vige bâsigi i apeta. Ngaira ka ama ni rataga nga ma ka ama ni bera nga, manga i nago. Ma inê kê rite. 22Inê kê marute nikâ, vigê rigia na apena gi tage na koni, i hungu na guani gi pi ga agêguruga ma ka mata. 23Ma hemuri ka hungu me nikâ na guani gi pi, ga pe agêguruga ma ka garoro renia na roga mahana i râ me tenia na bagabena raha. 24Na ani ga garoro ka ngê unumigi na ani ga agêguruga. Inê kê visigi na maruteha iaku tangara na mane ni girarasiha, ma ki mareha rârâ ta na hitangita, vige ramatenigi me na girarani.”
25O Josepo ki vi tanga na maneraha, ki vi: “Na giraraterua na maruteha ki tagenani ma. God ki hagarongogo renigi na tarani i page katogi. 26Na puruka binibinikage gi pi ki vi, vi na harisi gi pi. Na guani gi pi na ani ga agêguruga ki vi, vi na harisi gi pi me nikâ. Na girarani ki tagetora ma. 27Na puruka gi pi ga rataga ma ka hurakê me hemuri ma na guani gi pi na koni ga pe agêguruga ma ka garoro renia na roga mahana, ki vi, vi na harisi gi pi ni magêha. 28Oi, inê kê bani visia tangago: God ki hagagirarago renia na katoha iana. 29Surigi na harisi gi pi na ngêra ka page aharêsia ngavê i Esipito hagenani. 30I murina ngekana ka page arâ me na harisi gi pi ni magêha raha. Na enoni ka page bonotenigi na harisi, ga aharêsira igê na ngauha, suria na magêha raha ki page nahuia ngavê i Esipito hagenani. 31Na enoni ka page hitenia ngavê na matena i aharêsira igê na ngauha, suria na magêha i page arâ me i muri ki page erataga ngavê. 32Na maruteha hagerua iamu ki vi, vi God ki asa vige urusia na katoha iana. Ngaia ki sugia ma vige hagamonaria na katoha iana.
33Hoi, go atea ta na enoni i tako mataha ma ki hagakitagi maninga na marâ ma ko naka ki ononosuria na agua iamu hagenani. 34Go atera nga nikâ na kariana, ma ko bêbagi râ nanê na pita na apanini na ngauha surigi na harisi gi pi, ga rakorako igê na ngauha. 35Go bonasira nga na enoni, igo bani atera ngegana, hanana ga bêbagi râ nanê na pita na apanini na ngauha hato ngegana surigi na harisi ni ngauha, ga sugi arâ me. Go haganahunira nga renia na ramoha, hanana ga tavotavo na ngêra tenira na enoni ma ka nakanaka igê na ruma ni ngêra surigi na hinua ma ka anumasigi. 36Na ngêra ngegana ka gâga tanga na enoni nanêgi na harisi gi pi ni magêha, ga page tarahua i Esipito. Igê na tarana ngekana na enoni ki asa vige page mesi magêha.”
Na maneraha ki kasia o Josepo ki onosuria i Esipito
37Na maneraha ma na mane ni hagaotonga iana ka aganaria na katoha ngekê. 38Na maneraha ki vi tangara, ki vi: “I bara tangagia vige tarahua na mane ge koro manga o Josepo, suria God ki mavesia na aitangihana.” 39Na maneraha ki vi tanga o Josepo, ki vi: “Suria God ki hagagirarago renigi na marâ hato ngegê, tahema ki mave, vi igo ko tako mataha ma ko hagakitagi maninga na marâ teharira na enoni hato getera. 40Inê be kasigo ku onosuria na agua gê marungia ma na kariaku hato ka page têtê viteamu. Igo ka na ruata me tangê go nahunia na ramoha i ruguhaku. 41Hoi, i ngekê inê kê kasigo ko onosuria i Esipito haganani.”
42Na maneraha ki tarasia râ na ringi i kakêna ma ki tarasia i kakêna o Josepo. Na ringi ngekê ki segea igê na girarana na maneraha. Ngaia ki aruha renia na gahu siki ma ki hagahaga renia na seni na golo. 43Ngaia ki katoa ki tagiria na ruata na ani koro ngavê na kati iana, ma na mane ni anumasiha iana ka nanago tarana ma ka ngerengere ka vivi: “Gava tarana! Gava tarana!” Igê na tarana ngekana o Josepo ki vora re na mane i onosuria i Esipito hagenani. 44Na maneraha ki vi tanga, ki vi: “Inê nga ka na maneraha, ma na ara ni marâ ga katogi na ai ni Esipito ki tuguhira vi ga hagarongogo hagenago.” 45-46Ngaia ki hêtana o Josepo renia na ata i Esipito, i vi Sapenata Paneaga, ma ki atengenia ka Asenata tanga. Ngaia kini ka karena o Potipera na mane ni hagarahenga i hinua i Heliopolisi.
O Josepo ki tonga na tangahuru gi oru na harisi iana, matena i haganega ki tagara tanga na maneraha i Esipito. Ngaia ki pania na ruma iana na maneraha ma ki râhia i Esipito hagenani. 47Surigi na harisi gi pi ni ngauha na mu ka ganora ngavê. 48O Josepo ki tavo râ na pita na apanini na ngauha ma ki nakagi i ruma ni ngauha surigi na hinua. Ngaia ki bêbagi nanê na ngauha igê na ara ni hinua, na ngauha tenigi na mu hagarangigi hegitigi. 49Na koni ki rako teha ngavê mangagi na one i one. Tahema o Josepo i bara tanga vige hagararingenigi.
50I nago tarani na harisi ni magêha o Josepo ma ka Asenata karu aparerua na kare mane gi rua. 51O Josepo ki vi: “God ki katoê, kê pe takusigi na mamasiaganiha hato iaku ma na ruma iana o vaemaku.” Tahema ngaia ki hêtana o karena hagenago vi o Manase i vi ‘Hagahite.’ 52Ma ngaia ki vi nikâ: “God ki haganahuniê renirerua na kare igê na agua ni mamasiaganiha iaku.” Tahema ngaia ki hêtana na ruata o karena vi o Eparaimi i vi ‘Votokare.’
53Matena ga bani hato na harisi gi pi ni ngauha i Esipito, 54ka haganega na harisi gi pi ni magêha, manga i bani visia o Josepo. Na magêha ki tarahugi na agua getigi nikâ, ma ki nga noga ma i Esipito ki oga igê na ngauha. 55Matena na ai ni Esipito ka hatamia na magêha, ngaira ka hagagege tanga na maneraha. Vikê ngaia ki bonasira ka râ i pasina o Josepo ma ka arâ surigi na marâ i visigi. 56Na magêha ki ama ni akê raha nga me ma ki tarahua i Esipito hagenani. Tahema o Josepo ki tangahigi na ara ni ruma ni ngauha hato ma ki hagavuri na koni tangara na ai ni Esipito. 57Na enoni i maveta hagenani ka arâ i Esipito ka vurivuri na koni tenia o Josepo, suria na magêha ki ramo suria na maveta hagenani.
Terpilih Sekarang Ini:
HAGONEGAHANI 41: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific