TAHINGA 7
7
1Na Araha ki vi: “Bâ, o veogamu o Aroni ki page tamasi urusigo. Ngaia ki page tamasigi na tamasinga iamu tanga na maneraha, tagenana manga God ki tamasi i harana na poropete tangara na enoni. 2Go hagarongoa nga o Aroni renigi na ara ni marâ, gê bonasigo renigi, ma ngaia kani page bonasia na maneraha, hanana i hagamarumungenira na Isiraelita, ka huhura tenia i Esipito. 3Ma inê kanigê katoa na maneraha ki togeaga ma ki pe têtê viteamu, naka ma hagehita kê katogi na mena na raramoha raha, i nahuia i Esipito. 4Suria na maneraha ki usi vige tê viteamu, tahema inê kê page hagaitangia ngavê i Esipito, ma kê page bêngenira hura na Isiraelita na kariaku tenia i Esipito. 5Matena gê hagaitangia igê i Esipito ma kê bêngenira hura na Isiraelita tenia, na ai ni Esipito ka kahu aitangisiê, vi inê nga ki na Araha.” 6O Moise mo Aroni karu râ surigi na tamasinga iana na Araha tangarerua. 7Igê na matena garu tamasi tanga na maneraha i Esipito, o Moise ki tonga na harisi iana 80, ma o Aroni ki tonga na harisi iana 83.
Na vato iana o Aroni
8Na Araha ki vi tangarerua o Moise mo Aroni, ki vi: 9“Manga vi na maneraha i Esipito ma ki obania na mena, hanana vi hagatanga monari renigamurua, hoi, igo o Moise ko vi tanga o Aroni, ki kasia so i ano na vato iana i maana na maneraha. Na vato ki page voravora re na ma.” 10Hoi o Moise mo Aroni karu râ i pasina na maneraha ma karu kato manga i bani bonasirerua na Araha. O Aroni ki kasia so i ano na vato iana i maata na maneraha ma na kariana, ma na vato ki vora re na ma. 11Ma na maneraha ki unira me na mane ni hagaotonga ma na mane ni girarasiha iana, ma ngaira ka kato vikana nogata igê na anita na mangataniha. 12Ngaira ka kasigi so i ano na anita na vato ma na vato ka vora re na ma. Ma na vato iana o Aroni ki unumigi na anita. 13Henaka, ma na maneraha ki ama ni togeaga nga, manga i bani visia na Araha. Na maneraha ki usi vige tê viteaterua o Moise mo Aroni.
Na tangahuri hagaitangiha tanga i Esipito
Na ani gi tage: na gapu
14Ma hemuri na Araha ki vi tanga o Moise, ki vi: “Na maneraha i Esipito ki togeaga bâraha ma ki usi vige hagamarumungenira hura na Isiraelita. 15Hoi, gu râ vurusia nga igê na mavoraro, matena i soso tanga na ve i Nile. Go torea henigo na vato, go bani katoa noga renia na mena na ma. Go naasia i na akerena na ve. 16Go vi tanga na maneraha, ko vivi, ‘Na Araha, na God na Isiraelita ga rahesia, ngaia ki hagatorangeniê, hanana vigê nungigo, ko hagamarumungenira hura na kariana, hanana ngaira ka girara ga rahesia igê na bagamasusu raha. Ma ki mataro me i ngekê, igo ko ama ni manimanira ngavê nga. 17Hoita maneraha, na Araha ki vi, vi igo ko page aitangisia, vi o ti kani ngaia renigi na tarani i page katogi. Bâ, inê be tahurua na basina na ve renia na vato ikê, ma na ve ki page voravora re na gapu. 18Na siare igê ka page meme, ma na ve ki page mapu ngavê, ma na ai ni Esipito ka page makimaki tenia vige tono.’”
19Na Araha ki vi tanga o Moise, ki vi: “Go vi tanga o Aroni, ki tagarenia rârâ na vato iana surigi na ara ni ve, na âpavoro ma na rano hato i Esipito. Na ve hato ka page voravora re na gapu suria i Esipito hagenani ma igê nikâ na apira ma na pi na hê ni ve.”
20Hoi, o Moise mo Aroni karu kato manga i bonasirerua na Araha. I maata na maneraha ma na kariana o Aroni ki têa akê na vato iana ma ki tahurua na basina na ve, ma na ve hagenani ki vora re na gapu. 21Na siare igê ka me. Na ve ki mapu ngavê ma na ai ni Esipito ka makimaki tenia vige tono. Na ara ni ve hato i Esipito ka vora re na gapu. 22Ma na mane ni girarasiha iana na maneraha ka kato vikana nogata igê na anita na mangataniha. Na maneraha ki ama ni togeaga nga manga i nago. Ngaia ki usi vige tê viteaterua o Moise mo Aroni, manga i bani visia na Araha. 23Ngaia ki murisigererua so ma, ma ki aporo i ruma raha iana ma ki pe gagêmaga rârâ renia na tarana ngekana. 24Na ai ni Esipito hato ka oparigi na vekaru haninia na akerena na ve, hanana viga totono igê, suria na ve i Nile ki gagapugaga. 25Na hagaitangiha ngekê ki oga surigi na tangiani gi pi.
Terpilih Sekarang Ini:
TAHINGA 7: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific