TAHINGA 4
4
1Ma o Moise ki aramia na Araha, ki vi: “Manga vi na Isiraelita ma ka pe tongesuriê ma ka pe têtê viteaku, na ta kê page visia tangara? Na ta kê page katoa, manga vi ngaira ma ka hagaigago, vi igo ko pe vora tangê?” 2Vikê na Araha ki hagatea o Moise, ki vi: “Na ta ko taua i rimamu?” O Moise ki arami, ki vi: “Na vato.”
3Na Araha ki vi: “Gu kasia so i ano.” Matena o Moise ki kasia so i ano na vato, ma na vato ki vora re na ma, ma ngaia ki gavatenia. 4Ma na Araha ki vi tanga o Moise, ki vi: “Gu tagara so ma ku here i kerena.” Vikê o Moise ki tagara so ma ki tavoa, ma ngaia ki vora aporo renia na vato. 5Na Araha ki vi: “Go katoa vikana, ko hagatanga monari tangara na Isiraelita, vi inê na Araha, na God na êvarita ga rahesiê, na God o Abarahamo, o Isako ma o Jakobo ga rahesiê kanigê vora tangago.”
6Na Araha ki vi nikâ tanga o Moise, ki vi: “Gu tarahenia banu na rimamu igê na tuguni iamu.” O Moise ki kato vikana. Ma na matena i okea hura na rimana, na rimana ki asiahu, ki orerega siki ahuru. 7Ma na Araha ki vi: “Gu tarahenia aporo banu na rimamu igê na tuguni iamu.” O Moise ki kato vikana nikâ, ma na matena i okea hura aporo, na rimana ki komaga aporo manga bani hanana. 8Na Araha ki vi: “Manga vi ngaira ma ka pe tongesurigo, se na ani gi tage na mena ki pe hagatanga monari tangara, hoi, na ruata na mena ki page hagatanga monari tangara. 9Naka ma na mena gi rua ngegana, ma ngaira ka ama ni usisi nga, vige tongesurigo ma ki asa vige tê viteamu, hoi, go apea na ve i Nile ma ko karangia so i ano. Na ve ki page voravora re na gapu.”
10Ma o Moise ki vi: “Araha, siana ko hagatorangeniê. Inê kê pe girara, ve tamasi bâkoro rârâ. Ma i ngekê nikâ, matena go tamasi tangê, ki tagenana ma tangê. I bara ngavê vi ve tamasi. Inê kê tamasi haritagi ma kê raparapa.”
11Na Araha ki vi tanga o Moise, ki vi: “Ti kani vatea na enoni renia na harana? Ti kani katoa na enoni ki pungupungu na karingana ma ki bibi? Ti kani katoa na enoni, ki bâbâ se i guruguru na maana? Inênga na Araha ngekana. 12Hoita, gu râ! Inê kê page tamanigo ko tamasi. Inê kê page hagagirarago, manga hanana go tamasi.”
13Ma o Moise ki arami, ki vi: “Araha, siana! Gu hagatorangenia nga hete ta na enoni getea.” 14Matena na Araha ki rongo vikana, ngaia ki mangariaga tanga o Moise, ma ki vi: “Ma ki hega o goamu o Aroni na Levita? Inê kê bani girara, vi ngaia ki girara i tamasi bâkoro era. Ngaia ki arâ me i tara, hanana i bâsigo. Ngaia ki page vagevage, matena i bâsigo. 15Go metamasi, ma ko hagarongoa renia na marâ, i tuguhia vi tamasia. Inê kê page hagagiraragamurua, manga hanana muru tamasi. Inê kê page hagagiraragamurua renia na tarana muru page katoa. 16Ngaia ki page tamasi urusigo ma ki page tamasi tangara na enoni urusigo. Vikana igo ko page maratorana God, suria go hagagirara, manga hanana i tamasi. 17Go torea na vato ikê henigo, suria ngaia igo ko page katogi na mena.”
O Moise ki aporo tanga i Esipito
18Hemuri o Moise ki aporo i pasina o Jetero o hungâna, ma ki vi tanga, ki vi: “Gu nakê nga, be aporo i Esipito, be bâsira na goaku, manga vi ngaira ma ka tahitahi mêngara, se i mareha.” O Jetero ki hagamarumu ma ki vi: “Go arâ ma ko mauru koro.”
19Matena i gâga mênga O Moise i Mitiani, na Araha ki vi tanga igê, ki vi: “Gu aporo i Esipito, suria ngaira ga obania viga nahuigo ko meme, ngaira ka bani me hato.” 20Vikana o Moise ki hagatagirira kaniana ma o karena igê na tonki ma ki merarâ tanga i Esipito. Ngaia ki torea na vato, God ki bani bonasia renia vi torea.
21Na Araha ki tamasi nikâ tanga o Moise, ki vi: “I ngekê igo ko oga ni râha tanga i Esipito. Go takusia, hanana go katogi i maana na maneraha i Esipito na ara ni mena hato, gê bani haganahunigo renia na ramoha, hanana vigo katogi. Ma inê kê page katoa na maneraha ki togeaga ngavê, hanana i manimanira na enoni, siana ka huhura. 22Vikana go vi tanga nga, vi inê nga na Araha, kê vi vikê: Na Isiraelita ka na bêbê ni kare iaku. 23Inê kê bani vi tangago, hanana vigo hagamarumungenira na kareku ke huhura, hanana vi ngaira ke rahesiê. Ma igo ko usi. Tahema inê kê page hagamesia o karemu na bêbê ni kare.”
24Matena o Moise ki râ tanga i Esipito ma ki mêru so i gupuna na tara, na Araha ki râ ki uhungia vi nahuia o Moise ki meme. 25-26Ma ka Sipora kaniana ki tavoa na hê na gira ma ki retea râ na gavona na varana o karena ma ki purugenia râ igê na mamêrina o Moise. Vikê na Araha ki pe hagamesia o Moise. Ma ka Sipora ki vi tanga o Moise, ki vi: “Suria na gapu ni reteha igo nga ka no vaniaku mênga.”
27Igê na matena ngekana na Araha ki bani tamasi tanga o Aroni, ki vi: “Go arâ ige na bagamasusu raha vurusia o Moise. “Vikê ngaia ki râ vurusia i na agua hagarangia na hungana apuna. Matena i tarahua, ngaia ki siginia. 28Ma o Moise ki hagarongoa o Aroni renigi na ara ni marâ hato, na Araha ki bani visigi tanga, matena i bonasia ki aporo tanga i Esipito. Ngaia ki hagarongoa nikâ renigi na mena, na Araha ki bani bonasia renigi, hanana vi katogi. 29Vikê o Moise mo Aroni karu râ tanga i Esipito ma karu hagahakura na ara ni enoni raha iata na Isiraelita. 30O Aroni ki hagarongora renigi na ara ni marâ hato, God ki bani visigi tanga o Moise, ma hemuri o Moise ki katogi na mena hato i maata na enoni. 31Ngaira ka tongesurirerua, ma na matena ga rongo, vi na Araha ki bani vatugira ma ki bani bâsigi na mamasiaganiha raha iata, ngaira ka susure ma ka bêtuhia.
Terpilih Sekarang Ini:
TAHINGA 4: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific