TAHINGA 31
31
Na mane tanga ga tagarahia na ruma na gahu apuna iana na Araha
(Tahinga 35.30—36.1)
1Na Araha ki vi tanga o Moise, ki vi: 2“Inê kê bani atea o Besalele o Karena o Uri. O Virana ka no Gure. Ngaia ki na raraha iana o Juta. 3Na raramohaku ki bani angaria. Inê kê bani vatea renigi na tokoha mataha, na giraraha ma na manisingeniha ni tagarahiani na marâ ga bâkoro, 4hanana i takusigi, ki segegi ma ki tagarahigi na marâ bâkoro renigi na golo, na siliva ma na kapa higa: 5hanana i retegi na hê ga raha na meni, ki hanga renigi igê na kiruni, hanana i tahetahe ma ki tagarahigi na ani mavê na marâ ga bâkoro. 6Nikâ inê kê bani atea o Oholiaba o karena o Agisamaka tenia na raraha iana o Tane, hanana i tamania. Nikâ inê kê bani vatera na mane hato getera, ga manisingenigi na tagaraha vigana renia na giraraha, hanana ngaira ka girara ga tagarahigi na ara ni marâ hato, gê bani bonasigo, hanana vi ngaira ka tagarahigi. 7Ngaigi ka na ruma na gahu apuna iaku, na bokesi na suruheri henia na bubuhina, na ara ni marâ hato tanga na ruma na gahu apuna, 8na bea henigi na marâ hato tanga, na atohana na laiti na golo taranina henigi na marâ hato tanga, na bea ni sungiana na marâ i sigini koro, 9na bea tanga ga susu tangê igê henigi na marâ hato tanga, na maraguhu ni tananiha henia na hunana, 10na gahu bâkoro ni mane ni vogasiha tangara o Aroni mo karena, hanana ga hagesuru renigi matena ga tagara tangê mangara na mane ni vogasiha, 11na oile ni moneha ma na marâ i sigini koro tanga na kiboru apuna. Ngaira ki tuguhira viga tagarahigi maninga na marâ hato ngegana suria na bonasiha iaku tangago.”
Na tangiana ni mamaroha
12Na Araha ki bonasia o Moise, ki vivi: 13“Go tamasi tangara na Isiraelita, ko vi: ‘Mu hagahigasia na tangiana ni mamaroha, na aniku na tangiana. Ngaia ki na girarana tangagia, igamu ma inê ma na raraha iami i muri me, ki bê ki arâ, vi inê na Araha kê katogamu, kamu vora re na kariaku mareku inê ma. 14Mu hagahigasia nga na tangiana ni mamaroha, suria ngaia ki na tangiana apuna. Manga na enoni ma ki pe hagahigasia ma ki tagara igê, ngaia ka hagamesia nga. 15Na tangiani gi ono ka oga tangagamu, vigamu tagara igê, ma na pita na tangiana ngaia ki na tangiana raha ni mamaroha, na aniku na tangiana. Na anima na enoni i tagara igê na tangiana ngekana, ngaia ka hagamesia nga. 16Na Isiraelita hato ki tuguhira, viga hagahigasia na tangiana ngekana, hanana ga takusia tare na suruheri. 17Ngaia ki na girarana i berarogaka, inê ma igamu na Isiraelita, i tâ tare nga, ki bê ki arâ, suria inê na Araha kê hagavorarerua na vavearo ma na ano surigi na tangiani ge ono, ma igê na pita na tangiana kê pe tagara ma kê mamaro hete igê.”
18Matena God ki tamasi hato tanga o Moise i hungana i Sinai, ngaia ki vatea o Moise na hê aberabera gi rua, God ngaia marena ki bani segegi igê na ramata.
Terpilih Sekarang Ini:
TAHINGA 31: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific