Lomɛ́ŋ 14
14
Otisososi waakúan
1Pínɛ́ɛ́kin waakúán utiányípá na pukaaka á kuátap, ɛtipɛn wɔ kɛ́ɛ́yɛ́ kí ímbitakitɛn. 2Túkɔ́l pulinsí ɛ́ɛ́ waakúán á kuátap ápíyaka puandá kitikit, sɔ́k oloti píyaka piányi kɔ́ɔ́m. 3Ewú unyáanɛ́ puandá kitikit tiyɛɛ́nɛ́t sɔ́k utiányípá unyáan puany, sɔ́k utiányípá unyánan puany tipɛnɛ́ sɔ́k unyáánɛ́ puany á kiákí ɛ́ɛ́ Támbák ókólosi wɔ. 4Anyɛ kiakí ɛ́ɛ́ ósósosi eŋelípuólí u sɔ́k? Tɛ kupá ɛ́ɛ́ usiapínan kúnyaánɛ unyɛ kí indɛ́ndɛ́nɛ, púóyooson ɔkɔ́n wɛɛyɛ́. Maná ukapa kí indɛ́ndɛ́nɛ, á kiákí ɛ́ɛ́ ɔkɔ́n ápian pukaaka pú kupínɛ́ɛ́kin wɔ. 5Sɔ́k omotí áasáluna mɔɔ́sí, sɔ́k omoti ɛ́kɛɛ́nɛn ɛ́ɛ́ mányɛ puandá púmoómí. Ɛnyɛɛlɛ́ siki mɔɔndɛ úpá nɔ kinɔ́k kí kiansɛ́ kɛ́ɛ́yɛ́ kí imbítáákítɛ́n. 6Sɔ́k usálunanɛ́ mɔɔ́sí ɛ́ɛ́kɛɛlɛ nɔ́ɔ ó pusíó pú Ɔkɔ́n. Ewú upíyakanɛ́ ápíyaka ó pusíó pú Ɔkɔ́n, á kiákí weélémbesi Támbákɛ́ɛ; Ewú utiányípá upíyaka punyɛ ó pusíó pú Ɔkɔ́n utiányípá upíyaka, weékeekenyi Támbákɛ́ɛ nuúmu. 7Ɛ́ kuɛn tɛ mɔɔnd utipá usɔ́tɔn kɛ́ɛ́yɛ́ ó pusíó, tɛ mɔɔnd utipá ukúen kɛ́ɛ́yɛ́ ó pusíó. 8Indɛ tuɔ́sɔ́tɔn, tuɔ́sɔ́tɔn ó pusíó pú Ɔkɔ́n, indɛ tuékúen, tuékúen ó pusíó pú Ɔkɔ́n. Tɛ kúpá ɛ́ɛ́ tuɔ́sɔ́tɔn, tɛ kúpá ɛ́ɛ́ tuékúen tuɔ́kɔɔ́pinɔn Ɔkɔ́n. 9Á kiákí ɛ́ɛ́ Kilíis mekú woond wɔɔsɔ́t ɛ́ɛ́ úpá Ɔkɔ́n u piku nɔ pɔɔkɔ́si. 10Aŋúɛ kiákí osósosíé andimán ááwɔ? Aŋúɛ kiákí ɛyɛɛnɛnɛ́ waakúán? Á kiákí ɛ́ɛ́ tuényítélimit pasɔ́ peem kí ikata í Támbák. 11Punyɛ puɔ́ŋɔ́n ɛ́ɛ́: Inyɛ ɔ́ kusɔ́t Ɔkɔ́n wɔɔyɔɔnɛ́ɛ anakáánɛ́, tunúúnú kitikit éényísuke káámɛ ó pusíó, á toukál tuum pɛɛnd éényéekenyi Támbákɛ́ɛ nuúmu. 12Akáánɛ́ mɔɔnd kitikit ɔ́nyɔ́ɔ́yɔn Támbákɛ́ɛ puandá umɛɛ́lɛ́. 13Tutipísóósósí pasúɛ na pasúɛ: Túsɔ́mb ɛ́ɛ́ tutiɛlɛ́ puandá pú kusésitenyi waakúás kúnyaánɛ pú kukuusi wɔ. 14Yeémenyen yoond imbítááka ɛ́ɛ́: Ɛ́ kisiɛ́n kí Ɔkɔ́n Yésus tɛ puandá pú kilɔk tipá. Púnyɛ kilɔk ɔ́ sɔ́k ewú waátapanɛ́ ɛ́ɛ́ púnyɛ kilɔk. 15Índɛ ó pusíó pú pukunyá anyáanɛ́ɛ, andimán ááwɔ nyɛ kí insíkíl á pɔ, atikaand kuɛndɛɛtiɛ́ aná niɔy óówonée: Ɛ́ kisiɛ́n kí púkunya, ɔtiɔ́n ewú Kilíis meékú kɛ́ɛ́yɛ́ ó pusíó. 16Ɛ́nyɛɛlɛ́ kilɔ́ɔ́ŋɛ́t kíáwɔ tiɛlɛ́ ɛtɔ ú puónyi pú insikɛ́. 17Á kiákí puŋaaŋa pú Támbák tipá kupiyak kúnyaánɛ kupuwa, maná púnyɛ indɛ́ndɛ́nɛ, kiyeéwe, iyayɔ́, kuólin ké enfúnukufúúmɛ. 18Ewú ukɔtinɔnɛ́ Kilíise á nunamá nukáánɛ́, nyɛ peseé ku Támbák. Wɛkɛnikɛnɛk peseé ó pusíó pu pɛɛnd. 19Akáánɛ́ ɛniɛlɛ tuamba epú puakanɛ kiyeéwe ne epú puwakanɛ káásɔ́ ɛ́ kikɛtɛ́kɛtɛ́ɛ ɛ́ɛ́ tusuŋuna á kuátap. 20O pusíó pu pukunia ɔtilɔkɔ puólí pu Támbák. E kémuémue puandá kitikit tipá kitɔk: Maná puni kilɔk á mɔɔndɛ kisikɛl upiyakanɛ wɛ́ɛ́yɛ́ nipupen ni pɔsɔ́k. 21Púnyɛ peseé ɛ́ɛ́ atinia puany kúnyaánɛ kupuwa makɛp, ápísɔmb kilɔ́ɔ́ŋɛ́t é púúpú puniɛ kúɛ́yɛ́ kiany á waakúánɔ́ utiányípá na pukaaka. 22Kuatap apiananɛ́ɛ nɛkɛ ku kááwɔ ó pusíó ké eŋís yá Támbák. Pesée ne ewú utianipa upipɛnɛn á puandá watapanɛ. 23Maná ewu uniɛ ni infɛl á puandá unianɛ kani ɛpɛnɛn, á kiákí ɛ́ɛ́ utipa wɛlɛ pu na kuátap, puandá kitikit putianipa na kuátap kaani kifal.
Terpilih Sekarang Ini:
Lomɛ́ŋ 14: yav
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2026, CABTAL