Lomɛ́ŋ 12
12
Kusɔ́t kuukɔs
1Yaánúfáan kɔk insúŋɛ paandimán, ɛ́ niɛ́n ɔsúkɛ ní Támbák, ɛ́ núpíeki panɔ́ muɛ́t pifunɔ́ pítiányípá pikúén, pifúúmak indɛ́ndɛ́nɛ ó pusíó pú Támbák: Púkapá kɔk kisay kíánɔ́ kí kiliínditíe. 2Nutiɔŋɔ́n ɛ́ kuɛl kú kúúsí ekue, maná anupá penúkésí ne kiséndie kí insiŋí yaanɔ́, ɛ́ɛ́ númenyi kilɔ́ɔ́ŋɛ́t kí Támbák: Epú púnyɛɛ́ peseé, epú púpɔtɔkɔninɛ́ wɔ́, púnyɛɛ́ tɛ kipalalá. 3Ɛ́ kisiɛ́n kí kiandá kí peseé pámímfá, yɔɔ́kɔɔyɔn sikɛ mɔɔndɛ; nutipímékétesi ké etényi nutíányípá nueken á wɔ, ánupá pepíselésí ɛ́ɛ́ nutiambá pútiányípá káánɔ́ ké etényí, sikɛ mɔɔndɛ á kuátap Támbák meékí wɔ. 4Á kiákí ɛ́ɛ́ yá aná tupianɛ́ malááŋ kutek ɔ́ nuɔ́l númoómí, malááŋ kɔk makáánɛ́ tipá mɔ́kɔtɔ puandá púmoómí, 5anakáánɛ́ tunyɛɛ́ táásɛ, tunyɛ nuɔ́l númoómí é Kilíis, pasɔ́ peem kɔk tunyɛ malááŋ papílatá pasúɛ na pasúɛ, sikɛ mɔɔnd ɛ́ kíɛ́yɛ́ kiáyí. 6Sikɛ mɔɔnd áápian núɛ́yɛ́ nupoo nyáŋúnɛ é peseé pámaátúfá. Nupoo nú kuémenyi mekélíe nú á? Kɔtɔ́ na nɔ ekelú omoómí na kuátap. 7Olotí áápian nupoo nú pusɔ́m á? Wɛ́ɛlɛ masɔm. Olotí nupoo nú kuónyonyi á? Woónyonyi. 8Olotí é kuekenyi insúŋɛ á? Úsúŋa. Ewú weekenyée wéékenyi tɛ kuanɔn, ewú weendesíé wɛɛlɛ na kutáám, ewú wɛɛlɛnɛ́ niɛ́n ɔsúkɛ, wɛɛlɛ na anyamɔ́. 9Iŋɔyɔ yaanɔ́ pá kémuémue. Ɔ́nupínɔɔ́nínɔ́n kilɔk, ánupíkútíkán é peseé. 10Iŋɔyɔ yaanɔ́ núlata panúɛ na panúɛ; É nukum, nuákinan ɔ́ niɔlɔ́. 11Na kutáám tɛ métukíe, ne kiliínditíe kiiŋɛnyɔ́, ɔ́nukɔtɔ́n Ɔkɔ́n. 12Ánupían ipali ó pipíóndínyí ɔtɛ́m, nupílimbe é muyu, nuésepenyi kí imbísókólí. 13Ánupá iŋɔnɔkɔn é púúpú púsémenené peétépí, ɔ́nukɔ́lɔ́n peseé epé póóloné kuanɔ́. 14Énupínúúné epé pénúséésenyée; Énupínúúné nutinyɔmɔ. 15Ánuyayápá ne péépé pɛ́nyɛɛ́ kí ipali, núpaŋa ne péépé pápaŋanɛ́ɛ. 16Ánupá ekelú omoómí: Nutiambá maandá mɔɔkɔ́n, maná ánuambá puuselésí. Nutipíkɔ́lɔ́n ɛlɛɛ́ pɛɛnd pí insiŋí. 17Nutiondínyí mɔɔnd kilɔk ɔ́ kilɔk: Ánuambá kuɛlɛ peseé ó pusíó pú mɔɔnd kitikit. 18Kipán kɔk, aká punyɛɛ́ kupá káánɔ́, ɔ́nusɔ́tɔ́n é kiyeéwe na mɔɔnd kitikit. 19Paandimán páámɛ pí iŋɔyɔ, índɛ mɔɔnd siɛnúɛl kilɔk nutipíóndi, maná anuyapá ilópi í Támbák ɛ́ɛ́lɛ puólí púɛ́yɛ́, á kiákí ɛ́ɛ́ púnyɛ puɔ́ŋɔ́n ɛ́ɛ́; Niŋɔ inyɛɛ́ no kipíóndio, niŋɔ yoónyóondinyonyée, niŋúɛ Ɔkúnɛ́ɛ. 20Maná índɛ okóyikoyi waawɔ insaná áánúma wɔ, ekí wɔ púkunya, índɛ niíta áánúma wɔ ekí wɔ púkupúwa, aká ɛɛlɛnɛ́ anakáánɛ́, áákúman wɔ́ kikɔnyi kí yiik kɛ́ɛ́yɛ́ kɛ́ ɛtɔ. 21Atipíyapá ɛ́ɛ́ kilɔk kunyɛ́ɛn, maná píányɛ́n kilɔk é peseé.
Terpilih Sekarang Ini:
Lomɛ́ŋ 12: yav
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2026, CABTAL