Ansa 7
7
Tsuɓari adama a vuka vu tsugbani
1Maku ma̱ va̱, tono kadanshi ka̱ va̱,
ka̱ta̱ kpamu vu zuwa kaꞋa a̱ ka̱ɗu ka̱ nu.
2Tono kadanshi ka̱ va̱,
vi ta̱ a̱ kuciya̱ wuma,
vu la̱na̱ kuyotsongusu ku va̱
an maku ma̱ ka̱shi ka̱ nu.
3Vu shiya le a̱ a̱jivu a̱ nu tsu nkawani,
makyan dem o yongo punu a̱ ka̱ɗu ma̱ nu.
4Dana cicoꞋo <<Avu ɗa vutaku vu va̱,>>
ka̱ta̱ vu ɗeke kuyeve kumaci ku nu,
5i ta̱ a ku ere wu u vuka vu tsugbani,
a̱ ubuta̱ u vuka vu na vi m ma̱riki ba,
n kadanshi ka̱ una̱ wu uyoꞋo u ni.
6Maku ma̱ va̱, kanna ko yoku n la̱nuki
n katusu ka̱ kunu ku va̱,
7ɗa me enei a̱ ka̱tsuma̱ ka̱ ka̱mici,
ɗa n zukai a̱ ka̱tsuma̱ ko olobo,
ka̱ɗa̱nga̱ni ko yoku ka na ki n ugboji ba.
8A nwalu a uye ugbayin ɗevu n ubuta̱ wi ida̱shi i ni,
a nwalu a ukambu u ɗevu n kpaꞋa ku ni,
9n kulivi, kanna ɗe a̱ kuyikpa̱
makyan ma na ubuta̱ wi a̱ kuyimba̱na̱.
10Ɗa vuka vu uta̱i adama a na u gasa n a̱yi,
u lapulai ka̱ci ka̱ ni tsu kashakanlai
ufoɓushi tsu na u kuya̱nsa̱ yi.
11Vuza vu utonu ɗa n ugbamiwasuvu,
ene a̱ ni a tsu shamgba kpaꞋa ba,
12vu cinai na, vu cinai na ɗe
an vuza na u takumai kuneꞋe ku mesheꞋe
a̱ ka̱ka̱ra̱sa̱ a̱ ubuta̱ u na ngon mi dem,
13ana wene ni ɗa wo oɓongi ni,
ɗa u comoi ni n a̱shi a ucigi, u danai.
14<<N neke ta̱ alyuka a ida̱shi i ma̱ta̱na̱ a kpaꞋa,
anana n shatangu ta̱ akucina a n yaꞋin,
15ɗaɗa i zuwai mu uta̱i n gasa n avu,
n la̱nsa̱ wu ta̱ kpamu n ciya̱ wu ta̱.
16N pala ta̱ ivaꞋamkpatsu i va̱
n arikinla o tsuzogu tsa aza a Masar.
17M bufangu ta̱ ili i ma̱gula̱ni a ivaꞋamkpatsu i va̱,
m muru vu ma̱gula̱ni, n alosu koɓolo n sinamon.
18Ta̱wa̱, tsu pana uyoꞋo ali a kubana usana,
yaꞋan tsu pana uyoꞋo u tsu a maciganai.
19Vali vu va̱ wi punu a kpaꞋa ba,
u yaꞋan ta̱ nwalu n daꞋin.
20U ɗika ta̱ kajika ka̱ ni n ikebe ya̱ a̱bunda̱i,
wi a kubono a kpaꞋa ba,
sai wotoi u pece.>>
21Ɗa u kparasa ni n kadanshi ku uyoꞋo,
u pura̱i ugboji u ni n una̱ wu uyoꞋo.
22GogoꞋo lo ɗa u tonoi ni
tsu kanaka ka na a kubanka a̱ ubuta̱ u kukiɗa,
tsu mesheun ma na mi a ka ɗikpangusu a kubana a maza,
23ali a̱ ubuta̱ u na kayaꞋa ko sovoi ni a asuvu a̱ ni,
tsu manunu ma na mi o moloko a kubana a maza,
u yeve a na wuma u ni u ɗa nannai ba.
24Gogo na muku n va̱, panakai mu,
zuwai atsuvu i pana ili i na mi a kudansa.
25Ka̱ta̱ i ka̱sukpa̱ vicuꞋu vu vuka vu nanlo u pura̱ ɗa̱ ugboji ba,
i katsukpa yi,
26u zuwai uma n a̱bunda̱i a̱ ta̱ɗa̱tsa̱i,
uma a na wu unai i kukece ba.
27KpaꞋa ku ni uye u gbayin u ɗa
a kubana a kasaun,
o kurono uma a̱ kugida̱la̱
a kubana a̱ ubuta̱ wa̱ a̱kpisa̱.
©️2025 Language Development and Translation Initiative (LDTI)