प्रेरित 27
27
पोलुसो रोम ओ हखा चरच़ि
1अपेहल फेस्तुस राज्यपालो दोरच़ी दि फेंसला शुई, कि ञेंतिंङ जहाज़ो दोरच़ी इतालिया देशो हखा इबि तोह, दोहपल दोच़ी पोलुस ए ऊई बंदीतिंङ यूलियुस सुबेदारो गुह्ड़िङ सोंपेंगी च़रतिर। दुह सेनिकातु इच्च़ा झुण्डो सुबेदार तोहई अंऊ ओगुस्तुस महाराजा ओ तोहई।
2अन्द्र्मुतियुमो शहरो इच्च़ा जहाज़ा रिंङ अंऊ आसिया प्रदेशो कुंणीऊ ईलाकंङ ज़ि इच्च़ा नगरो अई नगरंङ इबिमी ताहरे, दोर हुंच़ा हेंज़ी हेंदु यात्रा शुरू लहरिन, दंङ अरिस्तखुर्स मिन्दु मकिदुनिया प्रदेशो थिस्लुनीके नगरो वासी ला हेंतेग साते तोहई।
3ऊई ध्याड़ा दू सीदोन शहर पिचे इलांई, दंङ यूलियुसे पोलुस टोईच़ी कृपा लेह दोबि दोऊ मित्रा तु कछंङ इबि रांई कि दोऊ दोरच़ी ज़रूरत चीज़ रेंज़ा हता।
4दोरच़ी ञेंहच़ी जहाज़ो दोरच़ी पूर्वो कुंणी ओ हखा यात्रा शुरू लहरिन, दंङ साइप्रस टापू नुरेच़ि अच़ा इलांई, छना कुचे पशिचम कुंणी ज़ि ञेंहतु खिलाप तेज लन्न तोहई।
5दंङ किशती रे किलिकिया प्रदेश ए पंफूलिया प्रदेशो कुंणी ऊईतार समुंद्रो ऊईतार यात्रा लहरिन, दंङ लूसिया प्रदेश ओ मूरा शहरंङ पिचे इलिन। अंऊर ञेंरे जहाज़ ओ दोरच़ी तक्सा इलिन।
6दोहर सुबेदारे ए सिकंदरिया शहरो इच्च़ा जहाज़ इतालिया देश हखा इबि खोकसिरी, दंङ दोई हेन्दिंङ दू टोईच़ी चढ़ाके केहरी।
7तेज लन्न तु वहज़ा ज़ि ञेंरे महस ध्याड़ा तचेक सूले-सूले जहाज़ो टोईच़ी यात्रा लहज़ातेंई दंङ मुशकिलारंङ साते कनिदुसो शहरो कछंङ पिच़ि इलिन। दंङ लन्न धोंण तेज शुचि इलि कि जहाज़ तुंखा माह शुई, झांह लेह ञेंहच़ी दिशा लेहक्सा च़रतिन दंङ जहाज़ क्रेते टापू रूठे अरि ठहरि पिच़ि इलि ताकि सलमोन शहरंङ पिचे तरपोंई।
8लन्न हेंतेग ला महस तोहई, दंङ दोई जहाज़ तुंखा शुहबी माह रंड्राते। दंङ ञेंरे सूले-सूले क्रेते टापू मुखारिंङ शुहचे जोज़ा लहरिन, दंङ ञेंरे जहाज़ो थल्जी इच्च़ा बन्दरगाह रिंङ पिचे ईलांई, अंऊर च़ि लसया शहर कछंङ तोहई।
पोलुसो सलाह नज़रअंदाज़
9अपेहल महस ध्याड़ा बीतेगी इलि दंङ प्रायश्चित ओ त्यार ला योह्सा इलजी तोहई, एंतेग यात्रा ला खतरा रिंङ तोहई छना कुचे दि दुह ए मौसम शुह अपेहल समुन्द्र महस तूफानी शुहचे इबि। दिऊ थल्जी, झांह लेह पोलुसे दोतिंङ कंड्रिरी।
10“हे सज्जनो, गिह्बी च़ेहसा कि अगर हेंज़ि दि यात्रा ज़ारी तोईनि ता महस मुसीबत ए हानि शुहबी तरपोतो, माह सिर्फ माल ए जहाज़ो मश्त पर हेंदु प्राणो ला शुहबिमी तोह।”
11पर सुबेदारे कप्तान ए जहाज़ो मालिको गप्पा पोलुस गप्पा बे बढ़कर ञेंहरी।
12रूठे ठहरि मिन्दु बन्दरगाह सोई टेमो थल्जी रूठे माह तोहई; दिऊ थल्जी साथी यात्री तु विचार शुई, कि अगर दोरे क्रेते टापू रिंङ दक्षिणो दोरच़ी जहाज़ा बि तुंखा शिलज़ि तरपोर, दंङ छना ठ्रोह फीनिक्स बन्दरगाह पिच़ि योंई, दंङ दोर तूफानी मौसम बिताएगी तरपोंई। दि तूफानो मौसमो मुक्का बंङज़िमी थल्जी इच्च़ा रूठे ठहरि तोहई, छना कुचे दोच़ी सोई लन्न तु सामना माह लहज़ाते।
समुन्दरंङ तूफान
13अपेहल फोह-फोह लन्न लेहती, दंङ दि सोचेक्ति कि दू योजना ओ हिसाबे फीनिक्स पिचे योर। दिऊ थल्जी लंगर कुरच़ा दंङ क्रेते टापू मुखारिंङ, समुंद्रो हखा इबिमी लेहती। 14पर थोड़े टाइमो थल टापू ज़ि इच्च़ा तेज लन्न अति, अंऊ जबाब पूर्वी कहलाच़ा। 15अपेहल तेज लन्न जहाज़ंङ टक्कर लेहती दंङ जहाज़ लन्न तु तुईज़ी खड़े माह बंङज़िरी, दिऊ थल्जी ञेंहच़ी जहाज़ बि लन्न तु दोरच़ी इबि रांई, दंङ जहाज़ ध्वांए ठ्रोह बहाएक्च़ी लेहती। 16दंङ ञेंहच़ी मुशकिला रंङ साते दुह क्वाच़ी किशती अंऊ थलेच़ि छुह्सी तोहई दोबि जहाज़ो टोईच़ी शोह्की रैंज़ा हतिन, अपेहल कि ञेंरे तेज लन्न ज़ि बचेकी कौदा मिन्दु इच्च़ा कवचि टापू दक्षिणो हखा बहाएच़ी लेहतिन।
17दुह कम योह्सिमी थल जहाज़ो चलाएच़ा दोच़ी जहाज़ा बि पिला हासी बेल्ले। दि बेह्द ज़ि कि किशती महस घाहरो बिचंङ फेसेकी इबि मेस रह्शी रें ठ्रोहका शुहचे च़रतिन, दंङ दोच़ी दुह पथवार योंखा लहरिर दंङ जहाज़ लन्न ति दिशा रिंङ अच़ा योतो।
18दंङ अपेहल ञेंहच़ी आंधी ज़ि महसे धक्के हिचकोले खोकसिरी, दंङ ऊई ध्याड़ा रिंङ दोरे जहाज़ो समान छंङ ज़ि लेहतिर।
19दंङ षुमु ध्याड़ा रिंङ दोच़ी एनोह गुह्ट्र जहाज़ो लिह्ह समान ला छङें च़रतिर।
20दंङ अपेहल ञेंरे महस ध्याड़ा तचेक माह एके माह लंच़ङ तंङरिनि, दंङ इच्च़ा मोह्ड़े लन्न अपि लेहकी तोहई, दंङ थल मुखंङ ञेंहतु देरच़ी हुंच़िमी भत्ते उम्मीद सूले-सूले योहसी लेहती।
21अपेहल दोरे महस ध्याड़ा तचेक योंई बंङज़िरे, दंङ पोलुसे दोतु बिचंङ खड़े शुहचे कुतोह, हे मीहरे, रूठे ता दि शुचंङ कि केरे गिऊ गप्पा मनेके, क्रेते टापू बे तुंखा ए माह शुचंङ दंङ माह दि मुसीबत अंजा दंङ माह दि नुकसान शुचंङ।
22पर हेंतेग गेह केतिंङ समझाएच़ातग कि याहब लंहि, छना कुचे केहतु बिचंङ अतुला जहानो नुकसान माह शोतो, पर सिर्फ जहाज़ो नुकसान शोतो।
23छना कुचे अतु गेह शुगाह, दंङ अतु अराधना गेह लहज़ातग, परमेश्वरो स्वर्गदूते एरेग रातारिंङ गिऊ कछंङ अंज़े कुतोह,
24हे पोलुसा, था वेऊ! कनिंङ महाराजा कैसरो तुईज़ी खड़े शुहबी ज़रूरी तोह। दंङ परमेश्वरे भत्तेतिंङ अंऊ करंङ साते यात्रा लहज़ी लेहकी तोतोर, भत्ते तिंङ मोह्ड़े दाह ए जीवनदान रांहषी ततो।
25झांह लेह, हे सज्जनो, याहब लंहि; छना कुचे गेह परमेश्वरो टोईच़ी विशवास लहज़ातग, कि छना गेरंङ साते कुहषी तोह, ध्वांए शोतो।
26पर लन्न ज़ि हेंदु जहाज़ा बि धक्का रें च़रपोतो दंङ हेंदिंङ अंऊ आ टापूरिंङ टक्कराएपोतो दंङ जहाज़ नाश शुचि योतो।
जहाज़ो रेहशी
27अपेहल सपि रात ला शुचि इलि, दंङ लन्न ज़ि लगातार ञेंरे अद्रिया समुन्द्रो हखा धक्का रंड्री लेहकी तोहई, दोहपल आधा रातो मुक्का जहाज़ो कम लहज़ा दोच़ी हिसाब लगाएतिर कि हेनरे अंऊ आ देशो कछंङ पिचे अंदंई।
28दोच़ी तिऊ गहराई पाक्च़ी लेहतिर अंऊ पि निन्ज़ा गुहड़ो बराबर तोहई। थोड़े अरे तुंखा शुहचे यह्च़ा तिऊ गहराई पाक्च़ी लेहतिर दंङ दू षुमु निन्ज़ा गुहड़ तोहई।
29दोहथर जहाज़ चलाएच़ा दोच़ी चेहतिर कि जहाज़ दह्पिमी तोहई दोच़ी दिबी सूले चलाच़िमी थल्जी जहाज़ो दोरच़ी पि लंगर (निह्लाम हुक्को ठ्रोह अंऊ दोबि तिऊ बिचंङ केहच़ी जहाज़ बि रोकेक्च़ी चरच़ी) जहाज़ो थलेच़ि तिऊ बिचंङ केहच़ी च़रतिर दंङ दोच़ी युरनाह मुंजे शुहबिमी थल्जी प्रार्थना लहरिर।
30अपेहल जहाज़ो कम लहज़ा दोरे जहाज़ो दोरच़ी पोक्पी तातेर, दंङ दोच़ी क्वाच़ी किशती बि समुंद्रंङ केहच़ी च़रतिर दंङ दि बहाना लहरिर कि जहाज़ो तुहई कि हिस्सा लंगर केट्री लेहकी तोतोर दङ दोच़ी जहाज़ बि सूले चलाएच़िमी थल्जी डोंगी समुंद्रों योंखा थक्शे केड़ि।
31दंङ पोलुसे सुबेदारे ए सेनिका तु हखा कुई, “अगर नाविक जहाज़ो टोईच़ी माह बंङज़ोर, दंङ केरे ला बचेकी माहरपोंई।”
32दोहथल सेनिका ज़ि किशतीऊ राह्शी ट्रिके च़रतिर ताकि दोरे बहाएक्च़ा इबि जूंस।
33अपेहल मुंजे शुहबिमी तोहई, दंङ पोलुसे दि कुचे, भत्ते तिंङ बगत ज़ेइमी विनती लहरी, “तोग सपि ध्याड़ा शुहचे इलि दंङ केरे चिंद लहज़ा-लहज़ा योंई बङज़िनि, दंङ छल्ले बगत माह ज़हरिर।”
34दिऊ थल्जी केतिंङ गेह सलाह रंड्रातग कि छा ज़े च़रतुंई, छना कुचे हेंदु बिचंङ अरिला माह सिओतो माह घायल शोतो।
35दंङ दि कुचे दोई रोटी लेह्पचे भत्तेतु तुईज़ी परमेश्वरो धन्यवाद लहरी दंङ थक्शे ज़े लेहती।
36दोहथल दोरे भत्ते खुश शुहचे इलिर दंङ भत्ते ज़ि बगत ज़ै लेहतिर।
37ञेंरे भत्ते रे जहाज़ो टोईच़ी झुह्ट राओ टोईच़ी षुमु निह्ज सत्रुई मीहरे तोईनी।
38अपेहल दोरे बगत ज़े कहशी इलिर, दंङ अंऊ छ्वाह बोरी जहाज़ंङ तोईरे समुंद्रंङ छङें जहाज़ लंङे लहज़ी लेहतिर।
39अपेहल ध्याड़ा शुई दंङ दोच़ी दू देश माह सेहतिर, पर इच्च़ा दलदल अंऊर शिर ज़ड़े ठहरि तंङरिर अतु कुंणी चोरस तोहई, दंङ विचार लहरिर कि अगर शुहचे तरपोतो ता देहर ए जहाज़ टिकापोंई।
40दंङ दोच़ी लंगर युप्शे समुन्द्र केचे च़रति दंङ दोहपल ए पतवारो राह्शी ला युह्पशे च़रतिर, दंङ लन्नो तुईज़ी ऊई पाल चढ़ाके मुखो हखा जोज़ि लेहतिर।
41पर जहाज़ दलदलो ए शिर ज़डे ठहरि फसेकी इलि दंङ दोऊ तुहई कि हिस्सा फसेकी इलि, दंङ त्रुलज़े मरति, पर थलेकी हिस्सा छ्वली तु वहज़ाज़ि टुकड़ा रिंङ दक्शे इलि।
42दंङ सेनिकातु दिह विचार शुई कि कैदीतिंङ सचे केओनि; झांह शुहबी मेस कि अच़िया देहर च़ि पोक्शे योर।
43पर सुबेदारे पोलुस बचाच़िमी हिटी रें दोबि दि विचारो थल्जी रुमज़ी लहरी दंङ दि कुई, कि तुहई छवाह रंड्रा कुंणीरिंङ अच्च़ा ईला।
44दंङ ओई दोरे रेह पटड़ो टोईच़ी, दंङ रेह जहाज़ो ऊई चीज़ा तु सहारे हुंच़ा इलांई, झांह ठ्रोह भत्ते यात्री धरतीऊ टोईच़ी रूठे रंङ पिच़ि इलिर।
Terpilih Sekarang Ini:
प्रेरित 27: LBFNT
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.