Къанун 5
5
АнцӀго амру
(Тархъ. 20:1-17)
1Мусаца тӀолабго халкъ бакӀарана ва абуна:
«ГӀенекке, ГӀизраилил халкъ, жакъа дица нужее цӀалулел ругел къануназухъги амрабазухъги. Лъазаре гьел ва мухӀканго тӀуразаре! 2Хоривалда рукӀаго БЕТӀЕРГЬАН Аллагьас нилъергун КъотӀи гьабуна. 3БЕТӀЕРГЬАНАС гьаб КъотӀи цохӀо нилъер умумузулгун гьабичӀо, амма нилъгун – киналго гьанир эхетун ругел чӀагоялщиназулгун гьабуна. 4БЕТӀЕРГЬАН кӀалъана нужеда магӀардаса, цӀадулъан, бадиса бадиве. 5Дун нужедаги БЕТӀЕРГЬАНАСДАГИ гьоркьов чӀана ва Досул амраби нужеда рицана, щайгурелъул нуж, цӀадукьа хӀинкъун, магӀарде рахинчӀелъул. Дос абуна:
6„Дун вуго дур БЕТӀЕРГЬАН, лагълъун мун вукӀараб ракьалдаса, ай Мисриялдаса, мун къватӀиве вачарав дур Аллагь.
7Дун тун батӀиял аллагьзаби дур рукӀине бегьуларо.
8Дуего ханлъи-лагълъиялъе гьересиаллагь гьабуге – тӀад зобалазда бугелъул яги гӀодоб ракьалда бугелъул, ралъдалъ яги ракьулъ бугелъул кинабгӀаги сипат-сурат гьабуге. 9Гьезие суждагун тӀагӀат-гӀибадат гьабуге; Дун дур БЕТӀЕРГЬАН Аллагьлъидал – хилиплъи хӀехьоларев#5:9 Хилиплъи хӀехьоларев – жугьутӀ мацӀалда «канна». «Канна» абураб рагӀул магӀна буго БетӀергьанасе инсан рухӀгӀанги хирияв вугин ва ракӀ-ракӀалъго, тӀолабго къуват-жаналдалъун инсан Жиндие мутӀигӀлъи тӀалаб гьабулин Аллагьас ва Гьес хилиплъи хӀехьоларин абураб., умумузул мунагьазе гӀоло, лъабабилеб ва ункъабилеб наслуялде щвезегӀанги гьезул лъималазул лъималазеги, Дун риханщиназе жаза гьабулев, 10амма Дун вокьулезул ва Дир амраби тӀуразарулезул наслабазе, гьезул азарабилел гӀелазде гӀунтӀунги, рахӀматал рикьулев.
11БЕТӀЕРГЬАНАСУЛ, Дурго Аллагьасул, цӀар бахъуге гӀадада кӀвар гьечӀого#5:11 Гьаб амруялъул хадусеб магӀна буго: Аллагьасул цӀарги бахъун гьересияб гьа гьедуге ва Гьесул цӀар ккарабги ккечӀебги бакӀалда абуге., кӀвар гьечӀого Жиндир цӀар бахъулев чиясе БЕТӀЕРГЬАНАС жаза гьабичӀого толарелъул.
12Шаматкъоялъул адаб гьабе – БЕТӀЕРГЬАН Аллагьасул амруялда рекъон, гьеб хирияб къолъун цӀуне. 13Анлъго къоялъ хӀалтӀе ва тӀолалго дурго ишал тӀуразаре, 14амма анкьабилеб къо – гьеб ккола БЕТӀЕРГЬАН Аллагьасе батӀа гьабураб шаматкъо. Гьеб къоялъ дуца кинаб бугониги хӀалтӀи гьабуге – я дуца, я дур васас яги ясалъ, я дур лагъас яги лагъалъ, я дур хӀайваналъ, я дур шагьаралда чӀел гьабурав къватӀиса вачӀарав чияс. Биччанте дуцаго гӀадин хӀалхьи гьабизе дур лагъасги гъаравашалъги. 15КӀочонге мунгоги Мисриялъул ракьалда лагълъун вукӀараблъи ва БЕТӀЕРГЬАН Аллагьас Жиндирго къудраталдалъун ва хӀалкӀолъиялдалъун мун гьениса нахъе вачараблъи. Гьединлъидал БЕТӀЕРГЬАН Аллагьас амру гьабулеб буго шаматкъоялъул къимат гьабеян.
16Дурго инсулги эбелалъулги адаб-хъатир гьабе, БЕТӀЕРГЬАН Аллагьас дуе кьураб ракьалда дурго гӀумру халатаб ва баракатаб букӀине.
17Чи чӀваге.
18Зина гьабуге.
19ЦӀогь гьабуге.
20ГьересинугӀлъи гьабуге.
21Чияр лъадуде хьул лъоге, чияр рукъалде хьул лъоге, гьесул лагъасде яги лагъалде, чияр оцалде ялъуни хӀамиде – щибгӀаги чияр жоялде хьул лъоге“.
Халкъалъул жаваб
(Тархъ. 20:18-21)
22БЕТӀЕРГЬАНАС гьал Амраби кьуна тӀолабго нужер жамагӀаталъе цӀадукьан, накӀкӀукьан ва лахӀчӀегӀераб бецӀлъуда гьоркьосан кӀудияб гьаркьидалъунги кӀалъан. Гьал рагӀабазда тӀаде Гьес тӀокӀалъ щибго жубачӀо. Хадуб Гьес гьел хъвана кӀиго ганчӀил къоноялда тӀад ва дихъе кьуна.
23БецӀаб накӀкӀукьан гьаракь рагӀидал ва цӀадулъ босараб мегӀер бихьидал, нужер къавмазул бутӀрулги нужер кӀудиялги рачӀана дихъе. 24Гьез дида абуна: „БЕТӀЕРГЬАН Аллагьас Жиндирго реццги кӀодолъиги бихьизабуна нижеда, цӀадулъан кӀалъалеб Гьесул гьаракьги рагӀана. Жакъа нижеда лъана, Аллагьасул гьаракь рагӀаниги, инсан чӀаго хутӀизе бегьулевлъи. 25Щайха ниж хвезе кколел? Цодагьабги доб гьаркьихъ ниж гӀенеккани, доб гӀасияб цӀаялъ нижер рахъу лъугьинабила ва ниж хвела. 26Киданиги букӀараб жо бугищ гьаб – нижеда гӀадин ХӀакъав Аллагьасул гьаракьги рагӀун хадуб инсан чӀаго хутӀараб! 27Мунго а БЕТӀЕРГЬАН Аллагьасухъе, Гьес абулебщиналъухъ гӀенекке ва хадуб гьеб нижеда бице. Ниж духъ гӀенеккила ва кинабго тӀубазабила“.
28БЕТӀЕРГЬАНАСДА рагӀана нужеца дида бицараб рагӀи ва Гьес дида абуна: „Гьеб халкъалъ бицунеб жо Дида рагӀана. БитӀун абулеб буго гьез. 29Унго-унголъунги гьел кидаго хӀинкъулелани Дикьан, Дир амрабиги гьез тӀуразарулелани, гьезиеги гьезул лъималазеги миркалъго лъикӀ букӀинаан!
30Вилълъа, жидерго чадразухъе руссаян абе гьезда. 31Мунин абуни, гьанив Дунгун вукӀа. Дица дуда рицина киналго дуца гьезда малъизе кколел къануналги, амрабиги, хӀукмабиги. Биччанте Дица гьезие кьураб ракьалда гьез гьеб кинабго тӀубазабизе“.
32Нужеца тӀадчӀун тӀуразаре БЕТӀЕРГЬАН Аллагьас нужее кьурал амраби, я кваранаб, я квегӀаб рахъалде кьуричӀого. 33Нужерго БЕТӀЕРГЬАН Аллагьас нужеда бихьизабураб нухккун хьваде. Гьебмехалъ нужер гӀумруги халалъила, баракатги букӀина нужее щвезе бугеб ракьалда.
Terpilih Sekarang Ini:
Къанун 5: АварАК
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Институт перевода Библии, 2005-2023