१ थेसलोनिकि 2
2
थेसलोनिके सहरहाङ पावलको काम
1ङाको राप्तो बिस्वासि होयालम, नि निङकहाङ वाङ्तोक बेलाहाङ निको यात्रा खेरो वायो नाःआक्ल त दाह्यो कुरापाय निङ लयमयइले चिःओ मुतेनय। 2#खबर १६:१९-२४नि इहाङ थेसलोनिकेताङ वाङोसय ङ्हा, फिलिप्पि सहरको मान्तालमइ निकाय ओहाङ गच्युक पेमातो दुख बयाताङ्सु, र गतहाइति निकाय बेइजत जाह्ङाताङ्सु त दाह्यो कुरामा निङइ चिःओले मुतेनय। तर ओहाङ गच्युकले निको बिरोत स्याउयाकायमा, निङकाय परमेस्वरको पेओ खबर प्रचार जाह्ङ्साको लागि परमेस्वरइ निकाय साहस बइसास्यावो मुलेना।#खबर १७:१-९ 3धइतिदाह्य्सा निइ निङकाय जाह्ङो बिन्तिखे कुनय पेमालो अथबा असुद्ध बिचारसय वाङो खेलेल, र निइ निङकाय धोका बइसा बोःङोमा खेङसुलु। 4बरु परमेस्वरइ निकाय ज्योतो ताःति पेओ खबर प्रचार जाह्ङ्साको लागि जिम्मेवारि बइसास्यावोझ्यान्ते निखे सधय परमेस्वरको इच्छ्या अनुसारले नोःनाङ्सु। निइपाय मान्तालमकाय आसताक्सा कोसिस जाह्ङ्ङसुलु, तर निको मनको बिचारकाय चिःसास्यावो परमेस्वरकायखे आसताक्सा कोसिस जाह्ङ्नाङ्सु। 5नि निङकहाङ वाङ्तोक बेलाहाङ निङकाय आसताक्साको लागि मात्र पेओ कुरा नोःआक्ङिलि त दाह्यो कुरापाय निङइ चिःओले मुतेनय। अनि निइ, निङको थेपो दोःसाको लागि निङको होया स्यावो बहाना जाह्ङोमा नाःआक्ङिलि त दाह्यो कुराको साछिखे परमेस्वर लयले खेसास्याउना। 6खेसापाय नि ख्रिस्तको खबरदुत स्यावोझ्यान्ते, निइ साःरो मःन्ति निङकसय मान-सम्मानको आसा गम्सा खाइचाङ्सु खेतो, तर निइपाय न ता निङकसय, न अरु मान्तालमकसय, सुकसयमा मान-सम्मान दोःसा कोसिस जाह्ङ्ङसुलु। 7कुनय यातचाक आमाइ लयको चोः चोःद्याङकाय स्याहार जाह्ङोलेखाले, नि निङकुस मुतोकहाङखे निङकुस नम्र स्याउतिले बेबहार जाह्ङालाङ्सु। 8निइ निङकाय माहा जोक्तो रापोझ्यान्ते, निङकाय परमेस्वरको पेओ खबर प्रचार जाह्ङ्सा मात्र खेल, निको लयको रुवाङ निङकाय बइसाको लागिमा नि तयार खेङसुतो।
9ङाको राप्तो बिस्वासि होयालम, निइ माहा जोक्तो जाह्ङो मेहेनतकायपाय निङइ पक्कामा म्हेःधाङलेतेनिलि। अनि निइ निङकाय परमेस्वरको पेओ खबर प्रचार जाह्ङ्तोकहाङ, निङ सुकायमा भार परलाम त दाह्य्ति दिन-याह्दिङ त मा दाह्य्मात निइ काम जाह्ङ्ति लयको बेबहार चलावो कुरापाय निङइ चिःओले मुतेनय। 10निङ बिस्वासिलमकुस बेबहार जाह्ङ्तोकहाङ नि पबित्र र धर्मि खेङसुतो अनि निइ दोह गल्तिमा जाह्ङो नाःआक्ङसुलु त दाह्यो कुराको साछिपाय निङ मात्र खेमात परमेस्वरमा खेसास्याउना। 11अनि आपा-आमाइ लयको चोः चोःद्याङलमकुस जाह्ङोलेखा, निइमा निङकुस ओउतले बेबहार जाह्ङो कुरापाय निङइ चिःओले मुतेनय। 12निइ निङकाय हउसला अनि सान्तवना बइनेआलाङ्सु, र परमेस्वरको मान-सम्मान स्यावो खालको रुवाङ याक्साको लागि निङकाय बिन्ति जाह्ङ्नेआलाङ्सु। धइतिदाह्य्सा परमेस्वरइ निङकाय लयको राज्य र महिमाहाङ सहभागि स्याउलाङ गोत्सास्याउधय मुना।
13निइ प्रचार जाह्ङो आखरकाय निङइ बिस्वास जाह्ङोझ्यान्ते निखे सधय परमेस्वरकाय धन्नेबाद बइसा चाहनाङ्सु। धइतिदाह्य्सा ओउ आखरखेपाय मान्तालमकसय खेलेल, तर परमेस्वरकसयले वाङो खेना। निङइ ओउकाय परमेस्वरको आखरको रुपहाङ सुइकार जाह्ङोझ्यान्ते, देङे परमेस्वरइ निङकहाङ ओउ आखर दुवाराले काम जाह्ङ्सास्याउधय मुना। 14#खबर १७:५ङाको राप्तो बिस्वासि होयालम, यहुदियाहाङ मुओ परमेस्वरको मन्दलिलम अथबा ख्रिस्त येसुको मान्तालमकाय स्यावोलेखाले निङकायमा सतावत स्यावा। ओउमय यहुदिलमकसय सतावत दोःआकाय, ओउतले निङइमा लयको मान्तालमकसयले ओउ सतावत दोःतेआकाय। 15#लुक २४:२०केहि यहुदिलमइ प्रभु येसुकाय साताकानि, र #यर २:३०; मति ५:१२; २३:२९-३४केहि यहुदिलमइखे अगमबक्तालमकाय साताकानि, अनि #खबर ९:२३,२९; १३:४५,५०; १४:२,५,१९; १७:५,१३; १८:१२ओउमयइले निकायमा सतावत जाह्ङाताङ्सु। ओउतहाइति ओउमयइ परमेस्वर झाक्मालो काम जाह्ङाकानि, र जुदा मान्तालमको बइरि स्यावाकाय। 16ओउमयइ निकाय अरु जातिको मान्तालमको लागि मुक्ति दोःओ आखर प्रचार जाह्ङ्साकाय रोकसा कोसिस जाह्ङ्धय मुनय, र एतहाइति ओउमयइ झन्-झन् नाःतो पापलम जाह्ङो मुनय। अनि परमेस्वर ओउमयकुस रिस वाङ्सास्यावोझ्यान्ते, अन्तिमहाङ द्याहखे रेह्न्तोले परमेस्वरइ ओउमयकाय दन्द बइसास्याउलेना।
पावलइ थेसलोनिकेको बिस्वासिलमकाय फेरिले क्रुस्सा इच्छ्या जाह्ङो
17ङाको राप्तो बिस्वासि होयालम, निपाय केहि समयको लागि निङकसय वेङ्सा परआलाङ्सु, तर निङकाय मिकइ च्यउसा दोःमायाकायमा, निको मनहाङखे निङकाय सम्झतिले मुनाङ्सु। निइखे निङकाय क्रुस्सा झाको निको मनको इच्छ्या पुरा जाह्ङ्साको लागि खाइच्युकसम्मले कोसिस जाह्ङो मुनाङ्सु। 18निपाय फेरिले निङकताङ द्याह्न्ति वाङ्सा चाहओ खेङसुतो। अनि ङा पावलखेपाय झन् नाःतो पल्तले वाङ्सा चाहओ खेङतो, तर सय्तानइ निकाय वाङ्साले बइताङ्सुलु। 19धइतिदाह्य्सा निइ गमो आसा र नि चोङाइसाखेओको कारनखे निङले खेतेनय, र निको प्रभु येसु द्याह्न्ति वाङ्सास्याउतोक बेलाहाङखे निङको कारनइले निइ जाह्ङो कामहाङ नि ङाःसा खाइनाङ्सु। 20मा, नि ङाःसाखेओ र चोङाइसाखेओको कारनखे निङले खेतेनय।
© 2024 (Active), Mother Tongue Translators Society and Wycliffe Bible Translators, Inc. All rights reserved.