रोमियां 11
11
नरीकार आपणे लौका नु ना भूली
1 #
फिलि 3:5
ऐवास्ते मैं किहे कि, “का नरीकारा ने आपणी प्रजा नु छोड़ती ङिले?” कङी वी कोनी! मैं वी तां इस्राएली छै, अब्राहम चे वंश ते बिन्यामीन चे गोत्र महु छै। 2नरीकारा ने आपणी वे प्रजा नु कोनी छोड़ले, जानु ओणे पेहले कनु ही जाणले। का तम्ही ना जाणा कि, पवित्रशास्त्र एलिय्याह चे बारे मां का किहे, ओ इस्राएल चे विरोध मां नरीकारा कनु बिनती करे? 3ओणे केहले कि, “हे प्रभु, वाणे दुधे भविष्यवक्ता नु मारती नाखले, ते दुधीया वेदीया नु ढाती नाखले, ते मैं ही हेकला बचला पला, ते वे माये प्राणा चे वी खोजी छी।” 4पर नरीकारा कनु ओचे वास्ते उत्तर मिड़ला, “मैं आपणे वास्ते इसड़े सात हजार मर्दा नु चुणती गेले जेह्णे बाल देवता चे आग़ु गोङे कोनी टेकले।”
5यूं करती ऐ समय वी अनुग्रह चे वजह चुणले आले छी कोच्छ लौक बाकि छी। 6अगर ईं अनुग्रह लारे हुले, तां बल्ति कर्मा लारे कोनी, ना तां अनुग्रह बल्ति अनुग्रह ना रेहला।
7बल्ति नतीजा का हुला? हा कि इस्राएली जाई खोज मां छी, ओ वानु कोनी मिड़ला। पर चुणला आला नु मिड़ला, ते बाकि लौक कठोर करले गेले छै। 8जिसड़े कि पवित्रशास्त्रा मां लिखले आले छै,
“नरीकारा ने वानु आज़ चे ङिओ तक भारी नीङे मां नुझाणती नाखले,
ते वानु इसड़ीया आंखी ङिलीया जको ङेख ना सग़ी ते इसड़े कान ङिले जको सोण ना सग़ी।”
9ते दाऊद किहे,
“वांचे खाणे वांचे वास्ते ही जाल ते फन्दा,
ठोकर ते ङण्ड चा वजह बणती जाये।
10वांचीया आंखीया उपर अन्धारे छात्ती जाये ताकि वे ङेख ना सग़ो,
ते तु सदा ङुखा लारे वांची कड़ झुकाली राख।”
11तां मैं किहे पला का वाणे ऐवास्ते ठोकर खाली कि ढेती पड़ो? कङी वी ना। पर वांचे ढेणे ची वजह नेरीया जातिया नु उद्धार मिड़ला, कि वानु रीस हो। 12हमा अगर वांचे ढेणे संसारा वास्ते धन्न ते वांची कमी-घटी नेरीया जातिया वास्ते सम्पत्ति ची वजह हुली, तां वांचे विश्वासा ची भरपूरी लारे पक्की ब़ोहत बङी आशीष हो सग़े।
नेरीया जातिया चा उद्धार
13मैं हमा तम्हानु ये बाता किहे पला, जको नेरीया जातिया छिवा। हमा, जबकि मैं नेरीया जातिया वास्ते प्रेरित छै, तां मैं आपणी सेवकाई मां पुरी कोशिस करे, 14ताकि कुई तरह लारे मैं आपणे कुणम्बे मां रीस पैदा करवाती कर वांचे महु कई जणा चा उद्धार करवावे। 15कांकि वांचे नकारले जाणे संसारा चे मिलाप ची वजह हुली, ते का वांचे ग्रहण करले जाणे मरला आला महु जीते हुवणे चे बराबर नी हुवी? 16जिसे बेले भेंट चा पेहला पेड़ा पवित्र ठहरला ते उसणले आले सारे आट्टे वी पवित्र छै, ते जिसे बेले ज़हड़ पवित्र ठहरली, ते लड़ीया वी इसड़ीया ही छी।
17ते अगर कोच्छ लड़ीया भान्ती कर भुकाती नाखलीया गेलीया, ते तु जंगली जैतून ओचे मां पैवन्द करला गेला ते ओ जैतून चे आच्छे ब़ूटे ची ज़हड़े ची चिकणाई चा भईवाल हुला, 18तां लड़ीया उपर घमण्ड ना करियो। ते अगर तु घमण्ड करी, ते जाणती गे कि तु ज़हड़ नु ना, पर ज़हड़ तनु सम्भालती गिहे। 19बल्ति हमा तु किहे कि, “लड़ीया ऐवास्ते भांलीया गेलीया कि, मैं वांचे मां पैवन्द करला जा सग़े।” 20हा सच्च बात छै, कि वे तां अविश्वास चे वजह भांलीया गेलीया, पर तु विश्वासा मां बणला रिही। ऐवास्ते घमण्डी ना हो, पर भय राख। 21कांकि जिसे बेले नरीकारा ने मूल लड़ीया नु कोनी छोड़ले, ते तनु वी नी छोड़ी।
22ऐवास्ते नरीकारा ची दयालुता ते सख्ताई नु ङेख। जको ढेती गेले, वांचे उपर सख्ताई, पर दुधे उपर दयालुता, अगर तु ओचे मां बणला रिहे। ना तां, तु वी बाढती कर नाखला जाये। 23ते वे अगर अविश्वास मां नी रिहे, तां पैवन्द करले जाये कांकि नरीकार वानु बल्ति कनु पैवन्द कर सग़े। 24कांकि अगर तु ओ जैतून लारे, जको सुभाव लारे जंगली छै, बाढला गेला ते सुभाव चे विरोध आच्छे जैतून मां पैवन्द करला गेला, तां ये जको सुभाविक लड़ीया छी, आपणे ही जैतून मां आसानी लारे पैवन्द कां नी करलीया जाये?
सारे इस्राएल चा उद्धार
25हे माये भऊ, कङी इसड़े ना हो, कि तम्ही आपणे नु ब़ुध्दिमान समझती गिहा, ऐवास्ते मैं ना चाहवी कि तम्ही ऐ भेद कनु अणजाण रिहा, कि जब तक नेरीया जातिया पुरी तरह मसीह मां आती ना जई, तब तक इस्राएल चा हेक हेंस्सा इसड़ा ही कठोर रिही। 26ते येही रीति लारे सारा इस्राएल उद्धार पावी, जिसड़े पवित्रशास्त्रा मां लिखले पले,
“छुड़ावणे आला सिय्योन कनु आवी,
ओ याकूब चे परिवारा कनु सारीया बुराईया नु दूर करी।
27ते वांचे लारे माया हाओ वाचा हुवी,
जबकि मैं वांचे पापा नु दूर करती ङिही।”
28वे सुसमाचार चे नजरीये लारे तां तम्चे वास्ते वे नरीकारा चे बैरी छी, पर चुणती गेहणे जाणे चे नजरीये लारे पुरखा ची वजह कनु नरीकारा चे प्यारे छी। 29कांकि नरीकार आपणे वरदाना कनु ते ब़ुलाहट कनु कङी भांसु ना हटी। 30कांकि जिंवे तम्ही नेरीया जातिया पेहले नरीकारा ची आज्ञा कोनी मनली, पर हमा, यहूदिया नु आज्ञा ना मनणे लारे तम्चे उपर दया हुली, 31यूंही वाणे वी हमा आज्ञा कोनी मनली कि तम्चे उपर जको दया हुवे। ऐचे कनु वांचे उपर वी दया हो। 32कांकि नरीकारा ने सब नु अनाज्ञाकारी चे बन्धन राखले आले छै, ताकि ओ सारा उपर दया करो।
नरीकार धन्य छै
33आहा, नरीकारा चा धन्न ते ब़ुध्दि ते ज्ञान का ही गम्भीर छै। ते ओचा न्यां किसड़ा अथाह, ते किसड़ा निराला छै ओचा काम करने चा तरीका। 34पवित्रशास्त्रा मां लिखले पले,
“प्रभु ची ब़ुध्दि नु केहणे जाणले?
जा कूण ओचे सलाहकार बणती गेले?”
35“का किह्णी नरीकारा नु कङी कोच्छ ङिले,
कि नरीकार ओनु वापिस ङियो?”
36 #
1 कुरि 8:6
कांकि ओची ओर कनु, ते ओचे ही जरिये, ते ओचे ही वास्ते सब कोच्छ छै। ओची महिमा युगानयुग हुती रिहो। आमीन।
Terpilih Sekarang Ini:
रोमियां 11: ODR
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
CC BY-NC-ND 4.0