रोमियां 1
1
अभिवादन
1हा चिठ्ठी रोमियां ची कलीसिया वास्ते लिखली गेली पौलुस चे तरफु जको ईशु मसीह चा दास छै ते प्रेरित हुवणे चे वास्ते हकारला गेला ते नरीकारा चे ओ सुसमाचार वास्ते अलग़ करला गेला छै। 2जाई नरीकारा ने पेहले कनु ही आपणे भविष्यवक्ता चे जरिये पवित्रशास्त्रा मां, 3आपणे पूता अम्चे प्रभु ईशु मसीह चे बारे मां प्रतिज्ञा करली हुती, ओ शरीरा चे तौरा पे तां दाऊद चे वंश महु पैदा हुला, 4ते पवित्रता ची आत्मा चे तौरा पे मरला आला महु जीते हुवणे ची वजह सामर्थ चे लारे नरीकारा चा पूत ठहरला। 5ओचे जरिये अम्हानु अनुग्रह ते प्रेरिताई मिड़ली कि ओचे नांवा ची वजह सब नेरीया जातिया चे लौक विश्वास करती कर ओची मनो। 6ओचे मां तम्ही वी ईशु मसीह चे हुवणे वास्ते हकारले गेले छिवा। 7वां सारा चे नांवे जको रोम मां नरीकारा चे प्यारे ते पवित्र हुवणे वास्ते हकारले गेले।
अम्चा ब़ा नरीकार ते प्रभु ईशु मसीह ची ओर कनु तम्हानु अनुग्रह ते शान्ति मिलती रिहो।
धन्यवाद ची प्राथना
8पेहले मैं तम्चे सब चे वास्ते ईशु मसीह चे जरिये आपणे नरीकारा चा धन्यवाद करे पला, कांकि तम्चे विश्वास ची चर्चा पुरे संसारा मां हुवे पली। 9नरीकार, जाई सेवा मैं आपणी आत्मा लारे ओचे पूता चे सुसमाचार चे बारे मां करे, ओही माया ग़वाह छै कि, मैं किवें आपणी प्राथना मां लगातार तम्हानु याद करता रिहे। 10आपणी प्राथना मां लगातार ते विनती करता रिहे, कि किसी रीति लारे हमा वी तम्चे गोढु आणे कनु, माया सफर नरीकारा ची इच्छा लारे सफल हो। 11मैं तम्चे लारे मिलणे ची इच्छा राखे, कि मैं तम्हानु कुई आत्मिक वरदान ङिये, जाये कनु तम्ही मजबूत हुती जावा, 12कि तम्ही ते मैं आपस मां हेके ङुजे विश्वास चे जरिये तसल्ली गिहुं।
13 #
प्रेरि 19:21
ते हे माये भऊ, मैं ना चाहवी कि तम्ही ऐचे कनु अणजाण रिहा कि मैं कई वारी तम्चे गोढु आणे चाह्ले कि, जिंवे मनु होर नेरीया जातिया कनु फल मिड़ला, यूहीं तम्चे महु वी मिलो, पर मैं हमा तक मजबूरी मां रुकला रेहला। 14मैं यूनानिया नु ते नेरीया भाषा चे लौका नु ते समझदारा नु ते मूर्खा नु ते सब नु सुसमाचार सुणावणे वास्ते खौद्द ची जिम्मेवारी समझे। 15ऐवास्ते मैं तम्हानु वी जको रोम मां रेहणे आला छिवा, सुसमाचार सुणावणे वास्ते उब़ाहला छै।
धर्मी विश्वासा लारे जिंवे
16 #
मरकु 8:38
मैं सुसमाचार वास्ते शर्मिन्दा कोनी, कांकि हा सुसमाचार नरीकारा ची सामर्थ छै, जको विश्वास करने आला वास्ते, पेहले तां यहूदी, बल्ति नेरीया जातिया वास्ते, उद्धार चा मार्ग़ छै। 17कांकि ओचे मां नरीकार ची धार्मिकता विश्वास लारे ते विश्वास चे वास्ते प्रकट हुवे, जिंवे पवित्रशास्त्रा मां लिखले पले, “धर्मी जन विश्वास लारे जीते रिही।”
सब ने पाप करला
18नरीकारा चा गुस्सा तां वा लौका ची सब पाप ते बुराई उपर स्वर्ग़ा कनु प्रकट हुवे, जको सच्चाई नु बुराई लारे दब़ाली राखी। 19ऐवास्ते नरीकारा चे बारे चा ज्ञान वांचे मना मां प्रकट छै, कांकि खौद्द नरीकारा ने वांचे उपर प्रकट करले।
20जिसे बेले कनु संसारा ची रचना हुली, नरीकारा चे अणङेखले गोण, ते हमेशा ची शक्ति, ते नरीकारा चा सुभाव, साफ-साफ ङिसे ते सृष्टि चे जरिये नरीकारा नु जाणले वी जाये। ऐवास्ते लौका कनु कुई बहाना कोनी।
21 #
इफि 4:17,18 ऐ वजह कनु कि नरीकारा नु जाणने उपर वी वाणे नरीकारा चे लायक बढ़ाई ते धन्यवाद कोनी करला, पर गलत सोच-विचार करु लाग़ले, इठे तक कि वांचे मूर्ख मन मां अन्धारे हुती गेले। 22वे आपणे-आप नु समझदार समझी पर वे मूर्ख छी। 23कांकि वाणे अविनाशी नरीकारा ची महिमा नु नाशवान इन्सान, ते पखीयां, ते ढौरा ते ढिड्डा भराणे चलणे आले जींया ची मूर्ति ची समानता बदलती ङिले।
24ऐ वजह कनु नरीकारा ने वानु वांचे मना ची बुरी इच्छा वास्ते सोंपती ङिले कि, वे आपस मां वे हेके ङुजे शरीरा चा अनादर करो। 25कांकि वाणे नरीकारा ची सच्चाई नु बदलती कर कूड़े बणाती नाखले, ते सृष्टि ची उपासना ते सेवा करली, ना कि ओ रचने आले नरीकारा ची, जको सदा धन्न छै। आमीन।
26ऐवास्ते नरीकारा ने वानु नीच कामना चे वशा मां छोड़ती ङिले। इठे तक कि वांचीया असतरीया वी सुभाविक यौन सम्बन्धा नु छोड़ती कर असुभाविक यौन सम्बन्ध करु लाग़लीया। 27यूंही मर्दा ने वी असतरीया लारे सुभाविक यौन सम्बन्ध छोड़ती कर आपस मां कामातुर ची वासना मां ब़लु लाग़ती गेले। ते मर्दा ने वी हेके ङुजे लारे गन्दे काम करती कर आपणे भ्रम चा ठीक फल पाला।
28ते जिसे बेले वाणे नरीकारा नु सुजाणने ची कीमत ही ना जाणली, ऐवास्ते नरीकारा ने वी वानु वांचे निक्कमे मना उपर छोड़ती ङिले, कि अनुचित काम करो। 29वे हर-तरहा चे अधर्म, ते दुष्टता, ते लोभ, ते बुराई, ते हत्या, ते झग़ड़े, ते छल, ते ईर्ष्या लारे भरीती गेले, ते चुग़लखौर, 30गन्दिया बाता करने आले, नरीकारा कनु नफरत करने आले, हिंसक, अभिमानी, डींगमार, गन्दिया-गन्दिया बाता बणावणे आले, आई-ब़ा ची आज्ञा नु ना मनणे आले, 31निर्ब़ुध्दी, विश्वासघाती, प्रेम ते दया चा अभाव कम छै ते निर्दयी हुती गेले। 32वे तां नरीकारा ची ये विधि नु जाणी कि इसड़े-इसड़े काम करने आले मौत चे ङण्ड चे लायक छी, पर खौद्द वी करी ते इसड़े काम करने आला चे लारे सहमत वी हुवी।
Terpilih Sekarang Ini:
रोमियां 1: ODR
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
CC BY-NC-ND 4.0