मत्ती 4
4
ईशु ची परीक्षा
(मरकुस 1:12,13; लूका 4:1–13)
1 #
इब्रा 2:18; 4:15 तब पवित्र आत्मा ईशु नु बरब्याना मां गेहती गेला कि शैतान ओची परीक्षा गिहो। 2ईशु चालीस ङिओ, ते चालीस रात, उपवास करला, आखिर मां ओनु भोक्क लाग़ली। 3बल्ति परखणे आले शैतान ने गोढु आती कर केहले, “अगर तु नरीकारा चा पूत छी, तां केहती ङे, कि ये पत्थर रोटीया बणती जाओ।”
4पर ईशु ने ओनु उत्तर ङिला, “पवित्रशास्त्र मां लिखले आले छै, ‘बन्दे सेर्फ रोटी लारे ही कोनी, पर नरीकारा चे मुँहा कनु निकड़ले आले हर हेक वचना लारे जीते रिही।’ ”
5बल्ति शैतान ओनु पवित्र शहर यरुशलेम मां गेहती गेला ते मन्दरा चे कंगूरे उपर खड़े करले, 6ते शैतान ने ओनु केहले, “अगर तु नरीकारा चा पूत छी, तां आपणे आप नु तले ढाती नाख, कांकि लिखले आले छै, ‘ओ दुधे बारे मां आपणे स्वर्ग़दूता नु हा आज्ञा ङी, ते वे तनु हाथो हाथ चती गिहे, कङी इसड़े ना हो कि दुधे पग़्ग़ा नु पत्थरा लारे ठोकर लाग़ो।’ ” 7ईशु ने उत्तर ङिला, “ईं वी पवित्रशास्त्रा मां लिखले पले, ‘तु प्रभु आपणे नरीकारा ची परीक्षा ना कर।’ ”
8बल्ति शैतान ओनु हेक ब़ोहत बङे पहाड़ा उपर गेहती गेला ते सारे जग़त चे राज़ ते वांची शोहरत ङिखाणती कर, 9ओनु केहले, “अगर तु माये आग़ु ढेती कर प्रणाम करी, तां मैं ईं सब कोच्छ तनु ङिती ङी।”
10बल्ति ईशु ने केहले, “शैतान, दूर हुती जा! कांकि पवित्रशास्त्रा मां लिखले पले, ‘तु प्रभु आपणे नरीकारा नु प्रणाम कर, ते सेर्फ ओची ही उपासना कर।’ ”
11बल्ति शैतान ओनु छोड़ती कर चाह्ला गेला, ते ङेखा, स्वर्ग़दूत आती कर ओची सेवा करु लाग़ले।
ईशु चे उपदेश ची शुरुआत
(मरकुस 1:14,15; लूका 4:14,15)
12 #
मत्ती 14:3; मरकु 6:17; लूक 3:19,20 ईशु ने जिसे बेले सुणले कि यूहन्ना पकड़ीती चुकला ते ओ गलील प्रदेस सनु चाह्ला गेला। 13#यूह 2:12पर ओ नासरत मां कोनी रुकला ते जती कर कफरनहूम शहरा मां, जको जबूलून ते नप्ताली क्षेत्र मां गलील ची झील चे गोढु हुता, रिहुं लाग़ला। 14ईं ऐवास्ते हुले कि नरीकारा ने भविष्यवक्ता यशायाह चे जरिये जको केहले हुते, ऊं पुरे हो। 15कि “जबूलून ते नप्ताली चे देश, झील चे मार्ग़ कनु यरदन नदी चे पक्षिम मां, नेरीया जातिया चे देश गलील मां। 16जको लौक अन्धारे मां जई पलते वाणे हेक बङे सोज़ले ङेखले। ते जको लौक मौत कनु ङरती कर जीवी पलते, वांचे उपर, बङे सोज़ले पड़ले।”
17 #
मत्ती 3:2
ओ समय कनु ईशु ने सुसमाचार चा प्रचार करना ते ईं केहणे शुरु करले, “आपणे पापा कनु मन फिरावा कांकि स्वर्ग़ चा राज़ गोढु छै।”
मछुवारे चे हकारले जाणे
(मरकुस 1:16–20; लूका 5:1–11)
18ईशु ने गलील ची झील चे किनारे फिरते हुले ङुंहु भावां नु यानि शमौन नु जको पतरस किहवावे, ते ओचे भऊ अन्द्रियास नु झील मां जाल नाखते ङेखले, कांकि वे मछुवारे हुते। 19ईशु ने वानु केहले, “माये भांसु चाह्ले आवा, तां मैं तम्हानु नरीकारा चे गोढु लौका नु गेहती आणने आले इन्सान बणावी।” 20वाणे तुरन्त आपणे-आपणे जाला नु छोड़ती कर ओचे भांसु टुरती पले।
21ते उठु उग़ते बधती कर, ओणे नेरे ङुंहु भावां यानि जबदी चा पूत याकूब ते ओचा भऊ यूहन्ना नु आपणे ब़ा जबदी चे लारे ब़ेड़ी मां ब़ेसती कर आपणे जाल सुधारते ङेखले, ते वानु वी हकारले। 22ते वे हेकदम ब़ेड़ी ते आपणे ब़ा नु छोड़ती कर ओचे भांसु टुरती पले।
ईशु ने लौका नु ठीक करले
(लूका 6:17–19)
23 #
मत्ती 9:35; मरकु 1:39 ईशु सारे गलील प्रदेस मां फिरता हुला वांचे प्राथनाघरा मां उपदेश करता, ते नरीकारा चे राज़ चा सुसमाचार प्रचार करता, ते लौका ची हर-प्रकार ची बिमारी ते कमजोरी नु दूर करता रेहला। 24सारे सीरिया देशा मां ओचा समाचार फैलती गेला ते लौक सारा बिमारा नु, जको हर तरह चीया बिमारीया मां ते ङुखा मां जकड़ले आले हुते, ते जाये मां दुष्टात्मा हुतीया, ते मिर्गी आले, ते लकवे चे मारले आले हुते, ओचे गोढु गेहती आले, ते ओणे वानु ठीक करले। 25गलील ते दिकापुलिस#4:25 दिकापुलिस, यानि ये ङस शहर छी , यरुशलेम ते यहूदिया ते यरदन नदी चे पार कनु भीड़ ची भीड़ ओचे भांसु टुरती पली।
Terpilih Sekarang Ini:
मत्ती 4: ODR
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
CC BY-NC-ND 4.0
