इफिसियां 4
4
मसीह चे शरीरा मां एकता
1ऐवास्ते मैं पौलुस जको प्रभु ची सेवा करने ची वजह कनु कैद मां छै, तम्हा कनु बिनती करे पला कि जिसी बुलाहट कनु नरीकारा ने तम्हानु हकारले, ओचे अनुसार जीवन बितावा। 2#कुलु 3:12,13यानिकि सारी दीनता ते नरमाई समेत, ते सब्र करती कर प्रेम मां हेके ङुजे ची सेहती गिहा। 3ते मेल-मिलाप चे रिश्ते मां आत्मा मां हेक हुवणे ची कोशिस करते रिहा। 4हेक ही शरीर छै, हेक ही आत्मा छै ते हेक ही आस छै जिसे वास्ते तम्हानु हकारले, 5हेक ही प्रभु छै, हेक ही विश्वास छै, ते हेक ही बपतिस्मा छै। 6ते सब चा हेक ही नरीकार ते ब़ा छै, जको सब चे उपर ते सब चे बीच, सब मां छै।
7पर अम्हा महु हर हेक नु नरीकारा ची दया लारे अनुग्रह चा दान ङिला गेला जको मसीह चे खुड़ले दिला चे अनुसार छै। 8पवित्रशास्त्र मां लिखले पले।
ओ ऊंचे उपर चढ़ला
ते कैदीया नु ब़ांहती गेहती गेला,
ते ओणे लौका नु वरदान ङिला।
9हमा ङेखा जिसे बेले ओ किहे, “ओ ऊंचे उपर चढ़ला,” ओचा का मतलब छै? सेर्फ ईं कि ओ अधोलोक मां वी उतरला हुता। 10ते जको उतरला हा ओही छै जको आसमाना कनु उपर चढ़ती वी गेला कि सारे काम पुरे करती ङियो। 11ओणे कईयां नु प्रेरित, ते कईयां नु भविष्यवक्ता, ते कईयां नु सुसमाचार प्रचारक, ते कईयां नु रखवाले, ते कईयां नु विश्वास करने आला चे उपदेशक हुवणे चा वरदान ङिला। 12ओणे इसड़े करले कि नरीकारा चे पवित्र लौक सेवा करने चे लायक बणो ताकि मसीह ची देह जको कलीसिया छै विनु मजबूत करो। 13जब तक कि अम्ही सब चे सब लौका विश्वास ते नरीकारा चे पूता चे पुरे ज्ञान मां हेक ना हुती जऊं, ते हेक सेद्ध बन्दे ना बणती जऊं ते मसीह ची पुरी महिमा ची ऊचाई तक पुज़ती ना जऊं। 14अम्ही इसड़ी ब़ाले बणली ना रिहुं कि हवाई लारे उछलती ना जऊं बन्दी जको ठग़्ग़ विधिया नु बधावी, भ्रम चे लारे भरले आले व्यवहार कनु, ते इसड़े ढोंगीपणे कनु इंगे-ऊंगे भटकाती ङी 15बल्कि प्रेम मां सच्चाई लारे चलते हुले सारीया बाता मां ओचे मां जको ठोङ छै, यानि मसीह मां बढ़ते जावा। 16#कुलु 2:19जाये मां सारी देह, हर-हेक जोड़ा ची सहायता लारे हेक लारे मिलती कर ते हेक लारे ग़ठती कर ओ प्रभाव चे अनुसार जको हर-हेक अंग चे ठीक-ठीक काम करने चे जरिये ओचे मां हुवे, आपणे आप नु बधावे कि वा प्रेम मां बढ़ोतरी करती जाओ।
मसीह मां नवां जीवन
17ऐवास्ते मैं किहे पला ते प्रभु नु ग़वाह बणाती कर तम्हानु चिताती कर किहे पला कि जिंवे नेरीया जातिया चे लौक आपणे मना ची बेकार रीति उपर चली यूंही तम्ही ना चला। 18जको बेकार ची बाता करी वांचे दिमाका उपर अन्धकार छै वांचे मूर्खता ते मना ची कठोरता चे वजह वे नरीकारा कनु मिलणे आले जीवन कनु दूर छी। 19वे सोन्न हुती कर गन्दे कामा मां लाग़ती गेले, सारे गन्दे काम आपणी मर्जी चे लारे करने वास्ते तियार रिही।
20पर तम्हानु मसीह ची इसड़ी शिक्षा कोनी मिड़ली। 21बल्कि तम्ही सच्चमां ओची सुणली ते जिसड़ी ईशु मां सच्चाई छै, ओचे मां सिखाले वी गेले, 22#कुलु 3:9कि तम्ही पेहले चाल-चलन चे पुराणे सुभाव नु जको भरमाणे आली लालसा चे अनुसार भ्रष्ट हुता जाये, उतारती नाखा। 23ते आपणे मना चे आत्मिक सुभाव मां नवें बणते जावा। 24#कुलु 3:10ते नवें सुभाव नु घालती गिहा, जको नरीकारा चे प्रति सच्च ची धार्मिकता ते पवित्रता मां सृजला गेला।
25ऐवास्ते कूड़ मारणे छोड़ती ङिया ते पड़ोसीया लारे सच्च ब़ोला कांकि अम्ही हेके शरीरा चे अंग छिऊं। 26गुस्सा तां करा लेकिन पाप ना करा, ङिओ थोवणे कनु पेहले तम्चा गुस्सा ठाडा हुती जाओ। 27ते शैताना नु आपणे उपर पाप करने चा मौका ना ङिया। 28चोरी करने आले बल्ति चोरी ना करो ते आपणे हाथा लारे आच्छे काम करा ते जानु ङेणे चाही छै ओनु ङिया। 29कोच्छ गन्दी बात ना ब़ोला जको ब़ोला आच्छे ब़ोला ते जको नेरा वास्ते आशीष ची वजह हो। 30ते नरीकारा ची पवित्र आत्मा नु ङुखी ना करा, जाये कनु तम्चे उपर छुटकारे चे ङिओ वास्ते छाप ङिली गेली छै, 31सब तरह ची कड़वाहट, ते प्रकोप ते क्रोध, ते क्लेश, ते निन्दा, सब बैरभाव समेत तम्चे कनु दूर करले जाओ। 32#कुलु 3:13हेके-ङुजे उपर दया ते कृपा करा ते जिंवे नरीकारा ने मसीह मां तम्चे सारे पाप माफ करले, यूंही तम्ही हेके-ङुजे चे पाप माफ करा।
Terpilih Sekarang Ini:
इफिसियां 4: ODR
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
CC BY-NC-ND 4.0