Luka 16
16
Kv́mv́m màrvm we chø̀m øpshú kàshvbóng
1Yesuí Àng coqcv́nrì sv̀ng mvshǿl yalòng shø̀:nòe. “Mvgàm tiqpè nø chø̀m øpshú tiqgǿ vdá we, wegǿí àngkàngpè dvrèrì dvsǿmaòe, wa koò vsv̀ng vle. 2Wervt mvgàmpèí àng yv́ng wepè goò nø̀, ‘Nà dang ngàí táng bǿngà kà nø kadø íe? Nàí èø:pmò bv̀nlì shìpan dètana:tnò. Akvt kèní nà nø ngà chø̀m øpshú wáshì mvdaq,’ a:lòe.
3Wekvt chø̀m øpshúpè nø àng nøt vdòng taq, ‘Akvt nø ngà kadø wáshìlv́m? Kàngpèí ngà sv̀ng chø̀m øpshú wáshì mèdèzv́r bǿngà. Rvmá dú gø mvjòr, røtnv́m íni shvrakshø̀nge. 4Chø̀m øp bv̀nlì kèní èlàng bø̀ng kvt, vsà:ngí àngmaq chø̀mrì taq ngà sv̀ng vtolv́m rvt kadø wáshìlv́m í we sháng bǿngà,’ wae.
5Wervt àngkàngpè sv̀ng shvrv́n vjø rì tiqgǿ mèpvng tiqgǿ goò nø̀ nv̀mlat gǿ sv̀ng à:ngí, ‘Kàngpè sv̀ng shvrv́n kadv́ngte nàjø má?’ wa rø:tnòe. 6Wepèí, ‘Zanlún yøtì vshvtyá galan vjønge,’ a:lòe. Chø̀m øpshú pèí àng sv̀ng, ‘Nà shvrv́n shìpan èlùò nø̀ tiqdvshaqí vbìyá galan nàruò,’ a:lòe. 7Vrá tiqgǿ sv̀ng, ‘Nà kadv́ngte nàjøe má?’ wa rø:tnòe. Wepèí, ‘Zongshí tiqkíng dàng vjønge,’ a:lòe. Chø̀m øpshú pèí, ‘Nà shvrv́n shìpan èlùò nø̀ shvtyá nàruò,’ a:lòe.
8Kv́mv́m màrvm we chø̀m øpshú pè nø bv̀nlì wa we taq zín we sv̀ng àngkàngpèí shvgù:nòe. Kadø íe wani rvgaqtø̀m cèrì nø vdè mvrilcèrì nv̀ng vzø̀m we taq, gálòng àngcèrì mvdv̀m té zíne. 9Wervt Ngàí vla:tnìni, rvgaqtø̀m dvpø̀í vdè dvpvt rv̀mnvng èlashìnø̀ng. Rvgaq tø̀m dvpø̀ werì bevm kvt, nàmaq sv̀ng dvciqlvpat chø̀m taq nàtovtnø̀nge. 10Cv́m vtvng rì taq kv́mv́m vrvm gǿ nø mvme te rì taq gø kv́mv́m vrvme. Vrá, cv́m vtvng rì taq kv́mv́m màrvm gǿ nø mvme te rì taq gø kv́mv́m màrvm. #Luk. 19:17 11Wervtnø̀ nàmaq nø rvgaqtø̀m dvpø̀rì taq kv́mv́m mènàrvmnø̀ng nìnø, pø̀hvp mvdø̀ng rì sv̀ng kagǿí nàmaq kaq tvle daqòni má? 12Nàmaq nø dvgá vsv̀ng dvrè taq kv́mv́m mènàrvmnø̀ng nìnø, nàmaq dvrè ílv́m rì sv̀ng kagǿí èzívtnø̀ngni má? 13Vshuq tiqgǿí àngkàng vnígǿ sv̀ng dvzøm màshvla. Àng nø tiqgǿ sv̀ng shvngoshì nø̀ tiqgǿ sv̀ng shóngshì longe. Mø̀íni, tiqgǿ sv̀ng nøt wáshì nø̀ tiqgǿ sv̀ng yv́ng mvtv̀m lú:ngò. Nàmaqí nø Gvray kaq gø, gv̀msùng kaq gø dvzøm màshvla,” a:lòe. #Mat. 6:24
Dvrá nv̀ng Gvray Móngdàn
Mat. 11:12-13
14Parisirì nø gv̀msùng map rì í rvtnø̀, kà yarì shvngbe tá bǿà kvt, Yesu sv̀ng zershì nø̀ vhøòe. 15Yesuí àngmaq sv̀ng, “Nàmaq vdè nø vsv̀ng mv́rdv̀ngø døngman ra dø dètanshìnø̀nge. Íwe nàmaq nøt sv̀ng Gvrayí sháòe. Vsàngí vpǿ shvri:ngò lòng nø Gvray mv́rdv̀ngø nǿmtuq íe. #Mat. 23:27-28; Luk. 18:9-14 16Moshi Dvrá nv̀ng Kàdvtutshúrì kà nø Tìløp Yohan àngni høq wa dvsha:ngòe. Wervtø̀ kèní nø Gvray móngdàn Dvbùshv̀ngkà dvsha:ngò nø̀, shvngbebe nø wemóngdàn sv̀ng gònglv́m dvdøtshìe. 17Muqlàng nv̀ng rvgaq vlevm nìgø, Dvrá kàru tiqmvkwiqcè vlelv́m nø̀ màvl. #Mat. 5:18 18Àng chø̀mmè nv̀ng vkang nø̀ dvgá tiqmè ó shvzøngshìvm we kagǿ ínìgø, dvchap mvrà wàò we íe. Vrá, àng chø̀mpè nv̀ng vkangshaq mè ó shvzøngshì pèí gø dvchap mvrà wàò we íe.#Mat. 5:32; 19:9
Mvgàmpè nv̀ng Lazaru kàshvbóng
19Tiqkvt nø mvgàm tiqpè vle. Àng nø shvmoq laqtun nv̀ng vzi shv́nàng belaq gwashì nø̀, tiqni nø tiqni v́m aq nø̀ shøtshúcè vle. 20Vrá, mvgàmpè bv́ngkà chit yv́ng Lazaru tǿò we røtnvm vsv̀ng tiqgǿ vyà:lòe. Àng góngkøp nø zøt wa íe. 21À:ngí mvgàmpè shvbóy kèní vja we v́mpàshirì v́m lúnlv́m mvrø:tnòe. Vrá, vgirì gø di ra weí, àng zøtrì leò høq íe. 22Wemèpvng røtnvm vsv̀ng wegǿ shìá:mì nø̀, Abraham pøtpúm yv́ngsv̀ng muqlàng dvzv́rrìí vbun bǿà. Vrá, mvgàmpè gø shìá:mì nø̀ kǿm bǿà. 23Àng nø Zùpvngø dvshà mvhøt sórí, vgo ngángshì nø̀ dvjaqò nìnø, vrúm vsar yv́ngø Abraham nv̀ng àng pøtpúmø Lazaru sv̀ng yà:ngòe. 24Àng nø, ‘Vkop Abrahamé, ngà sv̀ng dvshá èzangà. Tì taq wurhàm mvsóng zønshì nø̀ ngà pvlè leq dègwitnang dø Lazaru sv̀ng dèzv́rangà. Pàwá wani svmi mv́làm yalòng taq ngà gvzà dvshànge,’ wa vkiqe.
25Íwe Abrahamí, ‘Ngàcèá, nà ècúnshì dvgvp, nà nø shøtshúcè v́l èlúnshì yà:ngì nø̀ Lazaru nø dvshà mvhøtlv́m vhǿm yà:ngà we sv̀ng dvdvm nàshat. Íwe akvt àng nø yayv́ngø nøt shvlø̀m we lú:nòe. Nà nø gvzà dèshàe. 26Vrá, nøngmaq nv̀ng nàmaq dvhø̀ taq rvnaq we vkungmè tiqlòng dvhv́ng rvt, yapa kèní nàmaq pa sv̀ng léshì mvyǿ rì gø léshì mvlú:nò. Nàmaq pa kèní gø nøngmaq pa sv̀ng kagǿ gø léshì mvlú:nò,’ wa vtá:nòe.
27Mvgàmpèí, ‘Vkopmé, wedø í nìnø vpè chø̀m sv̀ng Lazaru dvzv́ralv́m kórshø̀nge. 28Pàwá wani ngà vnvm pungwàpè shini cúnshìe. Àngmaq dvbvng dvshà mvhøt we yamóng sv̀ng mvdìlv́m àngmaq kaq laq dvshatná:mò,’ a:lòe.
29Íwe Abrahamí, ‘Moshi Dvrá gø, Kàdvtutshúrì kà gø, àngmaq yv́ng vle. Nvnvmpèla nø werì kà laq ta,’ a:lòe.
30Wepèí, ‘Mø̀íé, vkop Abrahamá. Shì yà:ngì rì kèní tiqgǿ àngmaq yv́ng vtv́ngvm kvt, àngmaq nøt língshì longe,’ a:lòe.
31Abrahamí, ‘Àngmaq nø Moshi Dvrá nv̀ng Kàdvtutshúrì kà sv̀ng dv́ng mvta nìnø, shì yà:ngì rì kèní tiqgǿ dèzá:rò nìgø, àngmaq kv́m long we mø̀í,’” a:lòe.
Terpilih Sekarang Ini:
Luka 16: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
