Luka 1
1
Kàru vruò we mvtú
1Vshaqpè Tiopiluá, nøngmaq dvhø̀ taq bø̀ná:mì we mvshǿlrì dang vsv̀ng mvmeí vrushaq íe. 2Àngmaqí nø nv̀mlat kèní neí yà:ngò nø̀ mvshǿl welòng dvsha:ngò rìí shø̀:nò dø vru mvsø:ngò we íe. #Yoh. 15:27 3-4Ngàí gø yadv́ng pv̀n shvngbe sv̀ng nv̀mlat kèní shvla mvcha gùn dvtøp bǿngà. Wervt nà sv̀ng dèshvnga bǿì rì nø jø̀ngjǿng dìnge, wa nàí shálv́m dvpvt mvshǿl yalòng àng dvtí vl dø nà sv̀ng vrua nìnø shvlae, wvng dvdvmò nø̀ vrongvtnòe.#Dzr. 1:1
Tìløp Yohan gv̀llv́m dang
5Herot nø Yuda móng koqkv́m wáshì dvgvp, shvrúngshú Abiya mvdò taq Zekaria tǿshì we shvrúngshú tiqpè v̀l yà:ngì. Àng chø̀mmè gø Aron pvlí pvlaq tiqmè í nø̀, àng bø̀ng nø Elizabet íe. #1Dg. 24:10 6Àngní svma nø Gvray mv́rdv̀ngø døngman vsv̀ng í nø̀ Kàngpè dvkv́mkàrì nv̀ng dvrárì shvngbe sv̀ng shvlá wa cà:nò vsv̀ng íe. 7Àngní nø àngcè màdá. Pawá wani Elizabet nø vdǿm í nø̀ àngní gø gvzà cvrǿng ráì.
8Tiqni taq Zekaria nø, àngmaq mvdò rvtø̀ tuq ráì nø̀, Gvray mv́rdv̀ngø shvrúngshú bv̀nlì taq dvzømshìe. 9Shvrúngshú vtóng vl dø shvwøn dó bǿà kvt, Kàngpè Shànshér Vtvng Dǿng taq ngórcì wv́r nv̀ng gònglv́m àng sv̀ng lut bǿà. #Bng. 30:7 10À:ngí ngórcì wá:rò rvtø̀ taq, bashàrì loksok shvngbeí nø vngám lapmø júrø:tnòe. 11Wekvt Kàngpè muqlàng dvzv́r tiqgǿ ngórcì wv́rrà vbàng paø rip daqì nø̀, àng sv̀ng dvtánshìe. 12Zekariaí yv̀ng bǿà kvt shérvkaq svre lú:ngì.
13Íwe muqlàng dvzá:rí, “Zekariaá, mèsèreni. Nà júrøtkà Gvrayí ètáa bǿì. Nvchø̀mmè Elizabetní nà dvpvt cv̀mré tiqpè gv̀l daqòe. Àng bø̀ng nø Yohan, wa tǿ ràe. 14Nàí nø àng rvt dvbùlv́m vtvng èlún lú:ngòe. Vsv̀ng mvme nø àng gv̀l daqò rvtnø dvbù longe. 15Kadø íe wani Kàngpè mv́rdv̀ngø àng nø ring we í longe. Àng nø bìmtì nv̀ng nø̀ vmuq kadvgvp gø aq mvdaq. Àng nø àngmè góng kèní ni Shànshér Pvlàcè dv̀nzø̀ng longe. #Dcr. 6:3; Drj. 13:4,5; 1Sm. 1:11 16À:ngí Israel dvcìcèrì mvme sv̀ng àngmaqò Kàngpè Gvray kaq vwv́ngshì dvzv́r lú:ngòe. 17Àng nø Eliya døni nøt laqyà nv̀ng pvlàcè jórnònggùn taq Kàngpè vzv̀ngzv̀ng di daq nø̀ àngpè nv̀ng àngcè maq vrv́m dvzv́r lú:ngòe. Kà mvta rì gø døngman vsv̀ngò zitnøt kaq vwv́ngshì dvzv́r lú:ngòe. Yalòng nø Kàngpè dvpvt bashà tiqmvdò dvgǿalv́m rvt íe,” a:lòe.#Mal. 3:1; 4:5-6; Mat. 17:11-13
18Zekariaí muqlàng dvzv́r sv̀ng, “Ngà nø cvrǿng rángà. Ngà chø̀mmè gø vsvk cvrǿngá:mì. Íni, yalòng dìng we sv̀ng ngàí kadø lvshángònøng?” a:lòe. #Nnp. 18:11
19Muqlàng dvzá:rí, “Ngà nø Gvray mv́rdv̀ngø rip pè Gabriel ǿngà nø̀ nà sv̀ng dvbùshv̀ngkà yalòng dvtálvm rvt dèzv́r dakngà. #Dan. 8:16; 9:21; Heb. 1:14 20Èyà:ngò, ngà kà sv̀ng mèkv́m rvtnø, yadv́ng pv̀n màhøm ra dv́ngte nà nø màá èí long nø̀, kà shǿn mèlún lú:ngò. Kadø íe wani àngrvtø̀ høqa:tnò dvgvp ngà kàrì nø vhøm rae,” a:lòe. #Luk. 1:45
21Bashàrì nø Zekaria sv̀ng caò sórí àng nø Shànshér Vtvng Dǿng taq pàwá wedv́ngte tø̀má:mì má wa dvtiqshìe. 22Àng léshì daqì kvt, àngmaq sv̀ng kà shǿn màshvlá bǿì rvt Shànshér Tø̀ngnø vdòngø à:ngí shø̀ngran yv̀ng bǿà we sv̀ng àngmaqí dǿm bǿà. Àng nø màá lè í dá:rì nø̀, àngmaq sv̀ng wu:rí wa dvta:nòe. 23Zakaria nø Noqngø̀m Tø̀ngnø taq dvzømshì rà we àngni gømá:mì kvt chø̀m sv̀ng loá:mì.
24Wenila mèpvng àngchø̀mmè Elizabet nø, cv̀mré góng í lú:ngì nø̀ chø̀m yv́ng pungwà shvlá kúrshì sórí yadø wae. 25“Vsv̀ng dvhø̀ø ngà shvraq màchaq ǿngà lòng sv̀ng À:ngí lúalv́m rvt, Kàngpèí ngà kaq jejú èzǿng dakngà nø̀, ngà sv̀ng yadø èwv́ngang bǿngà,” wae.#Nnp. 30:23
Yesu gv̀llv́m dvtáò we
26Elizabet cv̀mré góng í we chuq shvlá mèpvng, Gvrayí muqlàng dvzv́r Gabriel sv̀ng Galili rvgaq Nazaret mvrìng taq, 27chø̀myo vjø̀ng Mari a:lò mè vl yv́ngsv̀ng dvzá:ròe. Àng nø Dawi dvgø̀ng taqkèní Yosep a:lò pè sv̀ng vdv́nshìshaq íe. #Mat. 1:16,18; Luk. 2:5 28Muqlàng dvzv́r nø Mari yv́ng dìa:tnì nø̀, “Jejú èlú:nò mèá, pàmvrà! Kàngpè nø nà nv̀ng tiqdø vle,#1:28 Àngké kà tiqmaq taq, “Nà nø svmarérì taqkèní ìshøt ìgv̀n èvl mè èíe” wa gø vrue. ” a:lòe.
29Wekà rvt Mari nøt mvsø̀n v́l mvnàmá:mì nø̀, kà yalòng nø kadø wa kà í má, wa dvdáshìe. 30Wekvt muqlàng dvzá:rí, “Mariá, mèsèreni. Pàwá wani nàí nø Gvray mv́rdv̀ngø jejú èlún bǿà. 31Èyà:ngò, nà nø cv̀mré góng èí long nø̀, cv̀mré tiqpè ègv̀l daqòe. Nàí Àng bø̀ng sv̀ng Yesu, wa tǿ ràe. #Drj. 13:3; Esa. 7:14; Mat. 1:21-23 32Àng nø ring we í long nø, Àng sv̀ng nø Vháng Vtvng Gvray Àngcèpè, vl lú:ngòe. Àngkop àngkàng Dawi koqkv́m rúngtv̀ng gø Kàngpè Gvrayí Àng sv̀ng zí lú:ngòe. #2Sm. 7:12-13,16; Esa. 9:7 33Àng nø Yaku dvcìcèrì mvdv̀mø dvciqlvpat koqkv́m wáshì longe. Àng móngdàn nø kadvgvp gø màlevm,” a:lòe. #Dan. 7:14; Mik. 4:7
34Wekvt Marií muqlàng dvzv́r sv̀ng, “Ngà nø chø̀myo vjø̀ng shini ǿngà ke, kadøwa yalòng lvbø̀n daq ni?” wa rø:tnòe.
35Muqlàng dvzá:rí, “Shànshér Pvlàcè nø nà mvdv̀m lashì daq nø̀, Vháng Vtvngpè Àng jórnònggù:ní nà sv̀ng dèkøq daqe. Wervt nàí ègv̀l daqò we shànshér we cv̀mrépè nø Gvray Àngcèpè, wa tǿ lú:ngòe. 36Ku, nvrì nvrvpmè Elizabet gø cvrǿng ráì dvgvp wa cv̀mré gv̀llv́m dá:nòe. Vsa:ngí vdǿm a:lò mè nø cv̀mré góng í we akvt vchuq shvlá íá:mì. 37Kadø íe wani Gvrayí wá mvlú:nò we pà gø màvl,” wa vtá:nòe. #Nnp. 18:14
38Marií, “Íe, ngà nø Kàngpè Àng vshuqmè ǿngàe. Nà èshø̀n dø tiqdvchá ngà taq laq í daq,” a:lòe. Wekvt muqlàng dvzv́r nø àng yv́ngkèní vtv́ngá:mì.
Mari nø Elizabet yv́ng di we
39Wemèpvng Mari búng nø̀, Yuda móng shigùng rvgaq tiqmvrìng sv̀ng cancan dìá:mì. 40Zekaria chø̀m sv̀ng àng gòngá:mì nø̀, Elizabet sv̀ng pàmvrà a:lòe.
41Mari pàmvrà wa kà sv̀ng Elizabetní tá bǿà kvt, àng góng taq cv̀mré gǿ chóngshì lú:ngì nø̀, Elizabet nø Shànshér Pvlàcè dv̀nzø̀ng taqsórí, #Nnp. 25:22; Luk. 1:15 42shaqmèí, “Svmarérì taqkèní nàí nø ìshøt èlú:nòe. Nà góng taq vl we cv̀mrécèí gø ìshøt lú:nòe. #Drd. 28:4 43Kàngpè àngmè nø ngà yv́ng tùng di høq, kadøwa nàpǿngvtnà má? 44Ku, nà pàmvrà èwa kà ngàí tángò chàng, ngà góng taq vl we cv̀mré nø dvbùnø:tní chóngshì lú:ngì. 45Kàngpèí nà sv̀ng shø̀n daqà kàrì shvngbe nø vhøm longe, wa èkv́m rvt ìshøt èlú:nòe,” wa shø̀ne.#Luk. 1:20; 11:28
Marií Gvray kaq shvri:ngò we
46Wekvt Mari nø,
“Ngà dòngnø:tní Kàngpè sv̀ng shvringòe.
#
1Sm. 2:1-10
47Ngà pvlàcè gø ngà Chv́ng Kàngpè Gvray vdòng taq dvbònge.
48Kadø íe wani vcip vyǿm we Àng vshuqmè sv̀ng
À:ngí yv́ng ètv̀mv́m bǿngà.
Èyv̀ngnø̀ng, akvt kèní mvril vrv̀m vsv̀ng shvngbeí ngà sv̀ng,
ìshøt lú:nò mè, èvl longe. #1Sm. 1:11; Luk. 1:25; 11:27
49Pàwá wani Jórnònggùn vl Pèí ngà dvpvt ring we bv̀nlìrì èwv́ngang bǿngà.
Àng bø̀ng nø shànshére. #Shz. 111:9
50Àng sv̀ng vpǿ svre vsv̀ngrì kaq nø, mvril laril À:ngí dvsházaòe. #Shz. 103:13,17
51Àng jòr we wu:rí ring we bv̀nlìrì wà bǿà.
Dòngnøt taq shvringshì rì sv̀ng nø, À:ngí dvkang bǿà. #2Sm. 22:28; Shz. 89:10
52À:ngí dùgàmzø̀rì sv̀ng nø øpkv́ng rúngtv̀ng kèní dvjá bǿà nø̀,
cipshì rì sv̀ng shvring bǿà. #1Sm. 2:7; Yob. 5:11; 12:19; Shz. 147:6
53Svríshìrì sv̀ng nø gvm we v́mpà vgà høq shvá:mò nø̀,
mvgàmrì sv̀ng nø vhúng shvlo bǿà. #1Sm. 2:5; Shz. 107:9
54-55Nøngmaq vkop vkàngmaq sv̀ng dv́n yà:ngà dø,
Àng dvzømshú Israel sv̀ng dvbvng daqà.
Abraham nv̀ng àng dvcìcèrì sv̀ng
dvciqlvpat dvsházalv́m dvdvm rǿn daqà,” wae.#1:54-55 Nnp. 22:17; Shz. 98:3; Mik. 7:20
56Mari nø Elizabet nv̀ng vshø̀m shvlá dv́ngte vl dá:ngí àng chø̀m sv̀ng loá:mì.
Tìløp Yohan gà:lò we
57Elizabet nø àngcè gv̀llv́m rvtø̀ gø̀ ráì kvt, àngcè tiqpè gv̀l daqà. 58Kàngpèí Elizabet kaq gvzà mvréza daqà we sv̀ng tiqdv́ng vsv̀ngrì nv̀ng àngrì àngyàngrìí tá bǿà kvt, àng nv̀ng tiqdø dvbùe.
59Vshvtni wani cv̀mrépè sv̀ng rvmølalv́m bóy taq àngmaq dì ráì nø̀, àng sv̀ng gø àngpè bø̀ng dø Zekaria, wa tǿlv́m dá:nòe. #Nnp. 17:12 60Íwe àngmèí, “Mvdaq. Àng sv̀ng Yohan tǿlv́m íe,” a:lòe. #Luk. 1:13
61Àngmaqí, “Nvrì nvrvprì taq wedø tǿshì we nø tiqgǿ gø la màvl ni,” a:lòe. 62Wervt àngmaqí àngpè sv̀ng màá kàí, àng sv̀ng bø̀ng kadø tǿ mèyǿe, wa rø:tnòe. 63À:ngí nø rushvp tiqgø̀m rø:tnò nø̀, “Àng bø̀ng nø Yohan íe,” wa vruòe. Wervt àngmaq shvngbe dàá:mì.
64Wekvt chàng Zakaria àng pvlè vpǿná:mì nø̀ kà vpuq lú:ngì kvt, Gvray kaq shvring shvtàòe. 65Gùrhøm vl vsv̀ngrì nø svre nø vtiqá:mì. Yuda rvgaq shìgùng móng kayv́ng màyv́ng kà yarì dvshvng bǿà. 66Kà yarì táò we í dv́ngte nø dvdvm vtiq sórí, “Wedø íni cv̀mré yapè nø kadø í we tiqpè í longe má?” wae. Pàwá wani Kàngpè Àng wur nø cv̀mrépè nv̀ng àngjǿng tiqdø vle.
Zekariaí Gvray kaq shvri:ngò we
67Àngpè Zekaria nø Shànshér Pvlàcè dv̀nzø̀ng nø̀ kàdvtut lú:ngì.
68“Àng bashàrì sv̀ng Kàngpèí yv̀ng daqà nø̀ chv́ng daqà.
Wervt Israel dvcìcèrìò Gvray, Kàngpè kaq shèringnø̀ng! #Shz. 41:13; 72:18; Luk. 7:16
69Àng dvzømshú Dawi dvgø̀ng taqkèní,
nøngmaq dvpvt jórnònggùn vl we Chv́ngshú tiqpè#1:69 Àngké kà taq “gø̀nshaq shvlutna we Vrø̀ng tiqtáng” wae. dèzv́ra daqshà.
#
Shz. 18:2; 132:17 70Yalòng nø darì bàn Kàngpèò shànshér we kàdvtutshúrì taqkèní shø̀n yà:ngà dø,
71nøngmaqò ngv̀nshàrì nv̀ng nøngmaq kaq shèngoì rì shvngbe wur kèní, chv́nglv́m nv̀ng, #Shz. 106:10
72nøngmaq vkop vkàngrì sv̀ng dv́n yà:ngà we dvsházalv́m lòng dvtà:nò nø̀,
Àng shànshér we kàgvp sv̀ng dvdvm rǿnlv́m dvpvt íe.
#
Nnp. 17:7; Lew. 26:42; Shz. 105:8; 106:45 73Nøngmaq vkop vkàng Abraham sv̀ng dvgv́mshì we kàí dv́na yà:ngà dø,
#
Nnp. 22:16-17; Mik. 7:20 74-75ngv̀nshàrì wur kèní nøngmaq sv̀ng shèlut daqshà.
Yalòng nø nøngmaq cúnshàì àngni í dv́ngte taq,
ngv̀nshàrì sv̀ng màsvrere, shànshér nøt nv̀ng døngman nø:tní,
Àng mv́rdv̀ng dvzømshì lúnlv́m dvpvt íe.
76Cv̀mrépèá, nà sv̀ng nø Vháng Vtvngpèò kàdvtutshú èvl longe.
Kadø íe wani nà nø Kàngpè dvpvt tvrà dvgǿalv́m rvt Àng vzv̀ngzv̀ng èdi longe. #Mal. 3:1; Mat. 3:3
77Mvrà chutnaò yv́ngkèní chutchv́ng lúnshì tvrà Àng bashàrì sv̀ng nàí shá dèzv́r lú:ngòe. #Yer. 31:34
78-79Nøngmaq Gvray Àng dvsháza nøt luqpǿng rvtnø̀,
dø vdòng nv̀ng shì bàngzì vdòng taq vl rì sv̀ng vwanalv́m nv̀ng
nøngmaq hírì sv̀ng mòngzø̀l tvrà taq shøllv́m dvpvt
muqlàng kèní vsháng nv̀m nøngmaq mvdv̀m dèsvra daqshà,” wae. #Esa. 9:2; Mat. 4:16
80Cv̀mrépè nø té mvnshì nø̀, àng pvlàcè gø nònggùn kv́ng lú:ngì. Àng nø Israel vsv̀ngrì kaq dvtánshìlv́m àngni mvhøqò dv́ngte, rvgaq mvgung móngø vle. #Mat. 3:1
Terpilih Sekarang Ini:
Luka 1: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
