Mataio 26
26
Ko te Taupulepulega ke Tāmate ia Iehu
(Mlk 14.1-2; Luk 22.1-2; Ioa 11.45-53)
1Kua uma te akoako atu e Iehu i nā mea uma iēnei, oi na vāgana atu ai ki ona hoko, 2“E vē ona koutou iloa, toe lua ia aho oi pa ki te Kaiga Fakamanatu o te Pāheka, ma ko te Ataliki o te Tagata ka tuku atu ke fakahātaulo.” #Eho 12.1-27
3Oi na fakapotopoto ai nā ohitāulaga pule ma te kau toeaina ki te fale o Kaiafa te Ulu Ohitāulaga, 4ma na taupulepule ai kilātou ke puke munimuni ia Iehu ma tāmate. 5Kua lea vē kilātou, “E hē tatau ke fai e kitātou te mea tēnei i te taimi o te Pāheka, auā e i na ka fakatupu ai he vevehi lahi o tagata.”
Kua Fakauku ia Iehu i Petania
(Mlk 14.3-9; Ioa 12.1-8)
6Ko Iehu nae i Petania i te fale o Himona, he tamāloa nae maua i he tauale kino o te kili.#26.6 tauale kino o te kili Kikila ki te 8.2 7Ka koi kai ia Iehu, kae kua hau kia te ia he fafine ma he fagu alapaha e tumu i nā lolo manogi taugatā, ma na liligi ai e ia ki tona ulu. #Luk 7.37-38 8Kua kitea atu e te kau hoko te mea tēnei, oi na feita lele ai ma lea vē atu ki te fafine, “Heā te kua fakamāumau ai? 9Ko nā lolo manogi na tatau ke fakatau atu ke maua mai ai he tupe lahi, ke kave mā nā tino mātitiva!”
10Kae kua hāfia e Iehu te mea e lea ai kilātou, oi na vāgana atu ai ki ei, “Heā te fakalavelave ai koutou ki te fafine? Kua fai e ia kia te au he mea e gali ma mānaia. 11Auā ka iei pea lava nā tino mātitiva ma koutou, kae ka hē iei pea lava au ma koutou.#Teu 15.11 12Kua liligi e ia te lolo manogi tēnei ki luga o toku tino ke hāuni ai mo toku tanuga. 13E takutino atu e au kia te koutou, ho he mea lava e tālaki ai te tala lelei tēnei i te lalolagi kātoa, ko te mea na fai e te fafine ka fakailoa ki tagata, ke manatua ai pea lava ia.”
Kua Malie ia Iuta ke Fakalata e Ia ia Iehu
(Mlk 14.10, 11; Luk 22.3-6)
14Oi na fano ai tētahi o te kau hoko e toka hefulu lua—ko Iuta Ihikaliota tona igoa, ki nā ohitāulaga pule, 15ma fehili vē atu ki ei, “Heā te koutou fōki maia kāfai e kō tukulima atua kia te koutou ia Iehu?” Oi na totogi ai e kilātou ia Iuta i nā tupe hiliva e tolu hefulu.#Hkl 11.12 16Ma na kāmata mai ai lava i te taimi tēnā te tautuku e Iuta o he avanoa, ke ia tukulima atua ai ia Iehu kia te kilātou.
Kua Kakai ia Iehu ma Ona Hoko i te Kaiga Fakamanatu o te Pāheka
(Mlk 14.12-21; Luk 22.7-13, 21-23; Ioa 13.21-30)
17I te aho muamua o te Kaiga Fakamanatu o te Falaoa Hē Fakafefetea, na ōmamai ai te kau hoko kia Iehu ma lea vē mai ki ei, “Ko fea te fofou koe ke hāuni ai e kimātou te kaiga o te Pāheka mo koe?”
18Kua lea atu ia Iehu kia te kilātou, “Olo ki he tamāloa i te kakai ma lea vē ki ei: ‘Lea mai te Faiākoga, Ko toku taimi kua pili mai; ko oku hoko ma au ka ōatu mo te Kaiga Fakamanatu o te Pāheka i te fale o koe.’ ”
19Oi na fai ai e nā hoko e vē ona fakatonu ai kilātou e Iehu, ma na kilātou hāunia ai loa te kaiga o te Pāheka.
20Kua pa ki te pō, oi na nonofo ai ki lalo ia Iehu ma ona hoko ke kakai. 21Ka koi kakai kilātou, kae kua vāgana atu ia Iehu, “E takutino atu e au kia te koutou, e iei te tino o koutou ka ia fakalatagia au.”
22Na lagona e te kau hoko te fakanoanoa lahi, ma na kāmata ai oi fehilihili tau toka tahi atu kilātou kia Iehu, “Te Aliki, e hē ko au ni, te lea ai koe?”
23Na tali mai ia Iehu, “Ko te tino e lolō tana falaoa ki loto o te ipu fakatahi ma au, ka ia fakalatagia au. #Hal 41.9 24Ko te Ataliki o te Tagata e oti lava e vē ona lea mai ai nā Tuhituhiga Paia; kae heāloa la te tino e fakalata e ia te Ataliki o te Tagata. Na hili lele atu mo te tino tēnā, moinei ake na hēki fānau mai ki te lalolagi.”
25Oi na lea atu ai ia Iuta, tē ka ia fakalatagia ia Iehu, “Te Faiākoga, e hē ko au ni, te lea ai koe?”
Kae na tali atu ia Iehu, “Ko tēnā lava e lea ai koe.”
Ko te Kaiga a te Aliki
(Mlk 14.22-26; Luk 22.14-20; 1 Kol 11.23-25)
26Ka koi kakai kilātou, oi na tago ai ia Iehu ki he falaoa, kua fakafetai ki te Atua, ma na tavaevae ai ma fōki ki ona hoko ma na vāgana atu ki ei, “Puke mai ma kakai ki ei. Ko toku tino tēnei.”
27Oi na tago ai ki he ipu, kua fakafetai ki te Atua ma na fōki ai kia te kilātou. “Feinu ki ei koutou uma,” na vāgana atu ai ia, 28“ko toku toto tēnei e fakamau fakailoga ai te feagaiga a te Atua, ka fakamaligi mo nā tino e tokalahi, ke fakamāgalo ai a lātou agahala.#Eho 24.8; Iel 31.31-34 29E lea atu au kia te koutou, ka hē toe inu lele au ki te uaina tēnei, heiloga kua pa ki te aho e inu ai au i te uaina fōu fakatahi ma koutou, i te Mālō o toku Tamana.”
30Oi na uhu ai e kilātou he pehe e viviki ai ki te Atua, ma na olo ai loa ki te Mauga o Olive.
Kua Vavalo e Iehu te Fakafiti a Petelu
(Mlk 14.27-31; Luk 22.31-34; Ioa 13.36-38)
31Oi na vāgana atu ai ia Iehu kia te kilātou, “I te pō lava tēnei, ko koutou uma lele ka hōhola kehe kae tīaki au, auā e leamai te tuhituhiga paia, ‘Ka tāmate e te Atua te leoleomāmoe, ma ko nā māmoe o te lafu ka takape.’ #Hkl 13.7 32Kae kāfai e uma te toe fakatu o oku mai te oti, ko au ka muamua atu ia te koutou ki Kalilaia.” #Mat 28.16
33Na lea atu ia Petelu kia Iehu, “E hē kō tīakia lele koe, e tuha lava pe hōhola kehe uma tētahi vāega!”
34Oi na lea atu ai ia Iehu kia Petelu, “E takutino atu e au kia te koe, ka ko hēki vivini ia moa i te pō nei, ka kua fakafiti fakatolu koe, e hē kē iloa au.”
35Na tali mai ia Petelu, “E hē mafai au ke lea vēnā, e tuha lava pe kāfai e oti ai au fakatahi ma koe.”
Ma na lea vēnā foki iētahi o te kau hoko.
Kua Tatalo ia Iehu i Ketehemane
(Mlk 14.32-42; Luk 22.39-46)
36Oi na olo ai ia Iehu ma ona hoko ki he koga e igoa ko Ketehemane, ma na vāgana atu ai ia Iehu kia te kilātou, “Nonofo i kinei ke hōhō atu au ki ko oi tatalo ai.” 37Na kave e ia ia Petelu ma nā ataliki e toka lua o Hepetaio, ma na lagona e ia te fakanoanoa lahi ma te fakaātu. 38Ma na vāgana atu ai ia kia te kilātou, “Ko au e vē he tino kā mate i te fakanoanoa lahi o toku loto. Nonofo i kinei ma tautuku fakatahi ma au.”
39Na hēleka mālie atu ia Iehu ki mua, oi na fakapakū fakapūlou ai ki te kelekele ma tatalo vē, “Toku Tamana, kāfai e mafai, kave kehe kō te ipu o puapuagā mai ia te au. Kae nahe faia toku loto kae fai tō finagalo.”
40Oi na toe liliu ai ia Iehu ki ona hoko e toka tolu, ma na ia maua atu e momoe; oi na lea vē atu ai kia Petelu, “Oi, e hē koutou lavā lele oi tautuku fakatahi ma au mo he itūlā lava e fokotahi? 41Tautuku lelei ma tatalo ke nahe maua koutou i ni fakaohōhoga; ko te loto e fofou ki ei, ka ko te tino kua vāivai.”
42Kua toe fano kehe ia Iehu ma na tatalo vē ai, “Toku Tamana, kāfai tēnei ipu o puapuagā e hē mafai ke kave kehea heiloga ke inu au ki ei, e fai lava tō finagalo.” 43Kua toe liliu ia Iehu ki ona hoko ma na ia maua atu e momoe; kua hē mafai lava ke pupula o lātou mata i te fia momoea.
44Oi na toe tuku ai foki e ia kilātou kae kua fano oi tatalo, ma ko te fakatolu tēnei o taimi na tatalo ai, ma na fakaaogā e ia nā kupu lava na tatalo ai muamua. 45Oi na toe liliu ai foki ia Iehu ki ona hoko ma na lea vē atu ki ei, “Ko koutou koi momoe lava ma mālōlō? Kikila, kua pa mai te itūlā e tukulima atu ai te Ataliki o te Tagata ki te pule a tagata agahala. 46Tutū mai loa ki luga keina tātou olo. Kikila atu, kua i kinei te tino e ia fakalatā au!”
Kua Puke Fakapāgotā ia Iehu
(Mlk 14.43-50; Luk 22.47-53; Ioa 18.3-12)
47Ka koi tautala ia Iehu, kae pa mai ia Iuta, tētahi o te kau hoko e toka hefulu lua. Na ōmamai fakatahi ma he kaifenua o tagata e tokalahi ma nā pelu ma nā pōvai, na uga mai e nā ohitāulaga pule ma te kau toeaina. 48Oi na fakatonu ai nā tino e tē ka fakalata e ia ia Iehu, kua lea vē atu ia kia te kilātou, “Ko te tino e hogi au ki ei ko ia tēnā e hakili e koutou. Puke fakapāgotā.”
49Ma na havali hako atu ai loa ia Iuta kia Iehu ma lea vē atu ki ei, “Mālō ni te Faiākoga,” ma na hogi atu ai ki ei.
50Na tali mai ia Iehu, “Te uho, fai loa te mea na hau ai koe!”#26.50 Te uho… ai koe pe Te uho, heā ta koe e fai i kinei?
Oi na ōmamai ai kua puke e kilātou ia Iehu. 51Na heki ake te pelu a hētahi nae fakatahi ma Iehu, ma ta ai e ia hētahi o kaukauna a te Ulu Ohitāulaga, ma na motu ai tona taliga. 52Oi na vāgana atu ai ia Iehu ki ei, “Tuku tau pelu ki tona huluga; auā ko kilātou uma e tago ki te pelu, ka feoti i te pelu. 53E vēake koe e hē kō mafaia oi kalaga ki toku Tamana ki he fehoahoani, ma uga vave mai ai e ia ni lekeona#26.53 lekeona ko te lekeona e fokotahi e 6,000 ia fitafita āgelu e hili atu i te hefulu lua? 54Kae kāfai ia au ka kalaga, oi vēhea ai ona fakatāunuku te kupu i nā Tuhituhiga Paia, e lea mai ko te mea tēnei e tatau ke taunuku?”
55Oi na vāgana atu ai ia Iehu ki te kaifenua, “Ko au nei he tino kaihohoa kua ōmamai ai koutou ma nā pelu ma nā pōvai oi puke au? I aho uma ko au e nofo i loto o te Mālumalu ma akoako atu ki tagata, kae e hēki koutou pukea au i kinā. #Luk 19.47; 21.37 56Kae ko nā mea uma iēnei kua tutupu, kae ke taunuku ai nā mea nā tūhia e te kau pelofeta i loto o nā Tuhituhiga Paia.”
Oi na tīaki ai ia Iehu e te kau hoko uma, kae kua fetutuli kehe.
Ko Iehu i mua o te Taupulega
(Mlk 14.53-65; Luk 22.54-55, 63-71; Ioa 18.13-14, 19-24)
57Kua kave ia Iehu e nā tino na kilātou pukea ia, ki te fale o Kaiafa te Ulu Ohitāulaga. I kinā, kua fakapotopoto ai nā faiākoga o te Tūlāfono ma te kau toeaina. 58Ka ko Petelu na taumulimuli mamao atu i tua ke pa lava ki te lōtoā o te fale o te Ulu Ohitāulaga. Kua fano ki loto o te lōtoā ma nofo ki lalo i te mea nae iei ai nā leoleo o te Mālumalu, kae ke ia kitea pe ko heā te ka pa ki ei. 59Oi na taumafai ai nā ohitāulaga pule ma te Taupulega kātoa, ke hakili ni mau pepelo mai tagata ke mōlia ai ia Iehu, kae ke tāmate ai e kilātou, 60kae na hēki maua e kilātou; e ui lava e tokalahi nā tino na ōmamai oi fai a lātou fakamatalaga pepelo. Mulimuli ake, na ōmamai ni tamāloa e toka lua 61ma na lea vē atu, “Ko te tagata tēnei na lea vēia, ‘E kō mafaia oi talepe ki lalo te Mālumalu o te Atua ma toe fakatū ai ki luga, kāfai e teka nā aho e tolu.’ ” #Ioa 2.19
62Oi na tū ai ki luga te Ulu Ohitāulaga ma kua lea vē atu kia Iehu, “E hēai lele hau tali e fai? E hē kē lagona atu te mōliaga kua fai e uiga kia te koe?” 63Kae na hēki kīkī lele ia Iehu. Ma na toe fehili atu ai kia te ia te Ulu Ohitāulaga, “Ko au e lea atu nei kia te koe i te igoa o te Atua e ola, taku mai kia te kimātou te meamoni: ko koe moni ko te Mehia, te Ataliki o te Atua?”
64Na tali mai ia Iehu, #Tan 7.13“Ko tēnā lava e lea ai koe. Kae e lea atu au kia te koutou uma, e kāmata atu nei, ka koutou kitea te Ataliki o te Tagata e nofo i te itū taumatau o te Atua Mālohihilihili, ma e hau i luga o nā ao o te lagi.”
65Oi na hae ai e te Ulu Ohitāulaga ona kofu#26.65 hae ai… ona kofu Ke fakailoa ai tona fakanoanoa lahi ma lea vē atu, “Ko te tino tēnei kua fāifai ki te Atua. Heā te toe fofou ai kitātou ki ni molimau? Kua fakalogo uma koutou ki ana kupu fāifai ki te Atua. #Lev 24.16 66Heā he koutou manatu?”
Na tali mai kilātou, “Ko te tino tēnā kua tatau ke tāmate.”
67Oi na tūfeanu ai kilātou ki ona mata ma kini i o lātou lima; ma ko nā tino nae kilātou kinia #Iha 50.6 68kua lea vē, “Ko koe e lea, ko koe ko te Mehia? Mate mai ake la pe na hei tukia koe?”
Kua Fakafiti ia Petelu e hē Ia Iloa ia Iehu
(Mlk 14.66-72; Luk 22.56-62; Ioa 18.15-18, 25-27)
69Ko Petelu nae nofo i fafo i te lōtoā kae hau he kaukauna fafine a te Ulu Ohitāulaga kua lea vē mai ki ei, “Ko koe foki tētahi tino nae iei fakatahi ma Iehu te tino Kalilaia.”
70Kae na fakafiti ia Petelu i mua o tagata, kua lea vē atu, “E hē kō iloa te mea e lea ai koe!” 71Oi na fano ai ia Petelu ki te faitotoka o te lōtoā, kae kua hau tētahi kaukauna fafine ma na ia kitea ia Petelu, oi na lea vē atu ai kinā tino nae tutū i kinā, “Ko te tino tēia nae fakatahi ma Iehu te Nahaleta.”
72Ma na toe fakafiti foki ia Petelu ma tali vē atu, “E hē kō iloa te tino tēnā.”
73I he taimi mulimuli ake, oi na ōmamai ai nā tino nae tutū i kinā ma lea vē mai kia Petelu, “E hako lava ko koe ko he tino e o te kāuga tēia. E kimātou matea i tō hikuleo!”
74Oi na lea atu ai ia Petelu, “E tautō atu au ko te mea e lea atu ai au e moni! Ke fakahala au e te Atua kāfai au e hē tautala i te meamoni. E hē kō iloa te tino tēnā!”
Ko te taimi lava tēnā na vivini ai te moa, 75ma na manatua ai loa e Petelu te kupu a Iehu na fai ake kia te ia, “Ka ko hēki vivini te moa, ka kua fakafiti fakatolu koe e hē kē iloa au.” Oi na fano ai ki fafo, kua tagi aueuē ai.
Bible Society New Zealand Charitable Trust