लूका 17
17
ठोकरा रे कारण बडना
(मत्ती 18.6,7,21,22; मरकुस 9.42)
1तेबा तेऊ आपणे चेले वै बोलू; एडा होई नांई सकदा कि ठोकर नांई लागे, पर हाय, तेऊ मन्शा वै जासकी बजहा संघे परीक्षा में सह पड़ा। 2जोह याह होछे में कासु एकी वै ठोकर खिलाऊंदा, तेऊवै यह भला हुंदा, कि चाकी रअ पाट तेऊरे गले लटकाऊंदा होर सह समुद्रे फैंकी दीनदा। 3ध्यान डाह; ज़ेबा थारअ भाई अपराध करा, तेबा तेऊ डांटी करे समझाये, होर जेबा सह पचताए तेबा तेऊ क्षमा करे। 4अगर पूरी धियाड़ी में सह सात वैरअ अपराध करे होर सात वैरा सह तहा सेटा इच्छी करे बोले, कि हाऊं पचताए, तेबा तेऊबै क्षमा करे।
बुशाह
5तेबा प्रेरित चेले प्रभु वै बोलू; माहरा बुशाह बढा। 6प्रभु तेऊवै उतर दिना; अगर तमा राई रे दाणे बराबर भी बुशाह साहा, तेबा तमे एउ शहतुता रे बूटे वै बोलणा कि जड़ा का उखड़ी करे समुद्रा में लागअ, तेबा तेऊ थारी मनणी।
एक नोकरा रा कर्तब्य
7पर तमामें एढअ कुण साह, ज़ासरअ नोकर हल़ लाऊदा, या भेडा चारदा होर, जेवा सह खेचा कअ इछे, होर तेवरी रोटी खांदअ वैशे? 8होर एडा नांई बोलणा कि मेरा खाणा त्यार करे, होर जेबरे तक हाऊं खाऊ पीऊ नांई तेवरे तणी मेरी सेवा करे, एता बाद तूह भी खाए पिए। 9कैह सह तेऊ नोकरा रा एहसान मनलअ, कि तेऊये सह काम करू जासकी तेऊवै आज्ञा दीनी दी थी। 10एऊ साबे तमे भी त्याह सभी काम करी छेकी जासकी तमावै आज्ञा दीनी दी थी, तेबा बोला, कि हामा निकाम्मे नोकर साह, कि जोह हामा करना जरूरी थी, हामे सह करू।
दस कोढा रे रोगी
11होर एडा होऊ की सह यरूशलेमा वै नाहदे सामरिया होर गलीला रे प्रदेशा बीच होई करे नाहनद लागदअ थी। 12होर एकी ग्राए में नाहंदे वक्ते तेऊ दस कोढ़ी भेटे। 13होर त्याह दूर खडे होई करे, जोरे-जोरे बोलू; हे यीशु, हे मालका हामा पैंदे दया कर। 14तेऊ त्याह हेरी करे बोलू; नाहा आपणे आपा बे याजका वै रीहाई ईच्छा। होर नाहदे-नाहदे त्याह शुद्ध होई। 15तेबा त्याह में एकी यह हेरी करे कि हाऊं ठीक होऊ, जोरे-जोरे परमेश्वरा री बड़ाई करदअ बापिस आउअ। 16होर यीशु री टांगा सेटा लामअ पडू, होर तेऊरा धन्यवाद करदअ लागअ, होर सह सामरिया थी। 17एता पैंदे यीशुये बोलू, केह दस शुद्ध नांई होई, तेबा होरा नौं कंही नाठे। 18कैह एऊ परदेशी छाडी कोई होर नांई निकदअ, जोह परमेश्वरा री बड़ाई करे? 19तेबा यीशु तेऊवै बोलू, “उठ, होर नाह तेरे बुशाहे तूह बचाऊ ठीक करू।”
परमेश्वरा रे राज्य रा इंहणा
(मत्ती 24.23-28,37-41)
20जेबा फरीसी तेऊ कअ पुछु, कि परमेश्वरा रा राज्य केबरे इंहणा? तेबा तेऊ त्याहवै उतर दीना, कि परमेश्ववरा रा राज्य प्रगट चिन्ह रूपा में नांई इंहदा की लोका तेऊ हेरे। 21होर लोका एडा नांई बोल़णा, कि हेरा अखे सहा कि तखे सहा; किबेकि हेरा परमेश्वरा रा राज्य तमा बीच साहा। 22होर तेऊये चेले वै बोलू; त्याह धयाडी ईहणी, जासू में तमा मणशा रे शोहरू री धयाडी में एक धिहयाड हेरन चाहण पर नांई हेरी पाऊले। 23लोका तमावै बोला, हेरा सह अखे सहा, याह हेरा तखे सहा; पर तमे नांई तखे नाहे होर ना त्याह पीछे नाहा। 24किबेकि जेहडी बिजली सरगा रे एकी फेरे का छेहड करी करे दूजे फेरे में छेहड करी करे सरगा कअ चमकदा, तेहडे सावै मणशा रअ शोहरू भी आपणी धयाडी प्रगट हुणअ। 25पर पहिले यह जरूरी साहा, कि सह पहिले बहू दुःख चुआके होर एऊ जुगा रे लोका तेऊ नीच मने। 26जेड़े नूहा रे धयाडे में होऊ, तेहडा ही मणशा रे शोहरू री धयाडी में भी हुणा। 27जासू धियाड़ी तणी कि नूह जहाजा में नांई चढू, तेसा धियाड़ तणी लोका खांदा पींदा थी, होर त्यामें ब्याहा हूँदा थी। तेबा पाणी री प्रलय संघे सब कुछ नाश होऊ। 28होर जेड़ा लूता री धयाडी में होऊ थी; कि लोका खांदे-पींदे, लेणा-देणा, बूटे लांऊदे होर घरा बणऊँदे थी। 29पर जासू धियाड़ी लूत सदोमा कअ नाठअ, तेसा धियाड़ी आगी होर गंधक सरगा कअ आई होर सभे साह नाश होऊ। 30मणशा रअ शोहरू प्रगट हुंणे रे वक्ते भी एडा हुणा। 31होर तेसा धियाड़ी जोह छापरे होलअ; होर तेऊरा समान घरा में होला सह तेऊ आणदअ नांई निखले; होर जो एडे खेचे होलअ सह पीछे नांई नाहे। 32लूता री लाड़ी याद डाहा! 33जोह कोहे भी आपणे प्राणा बचाऊणा चाहदा, तेऊ आपणे प्राणा रा नाश करना होर जोह कोहे आपणे प्राणा खोऊलअ तेऊ आपणे प्राण बचाऊणे। 34हाऊं तमावै बोला, तेसा धियाड़ी दुई मणश एकी मांजे पैंदे हुणे एक निणअं होर दूजअ छाढणअं। 35दुई बेटड़ी घरटे पीश्ती हुणी, एक नीणी होर दूजी छाडणी। 36दुई मणश खेचे हुणे, एक नीणअ होर एक छाडनअ। 37यह शूणी त्याहे तेऊका पुछु, हे परमेश्वर यह कई हुणा? तेऊ त्याह वै बोलू, जखे शव साहा, तखे शषणी भी कठे हुणी।
Terpilih Sekarang Ini:
लूका 17: ISJNT
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
