Luk 4
4
IMAAMA DZE ZEZU
1Zezu, ayinga nzali ye Zulʉde. Singa ye Fudzu ye Umpende yedze nedzi, Fudzu ye Umpende ya bapa wangu se ikanye. 2Awawu ye Sata emaama Zezu se masi meku menayi. Se masi mamu mesi wangu akuta utsʉlu ve nzala, ye mana nzala ya kwata wangu. 3Sata atanda nedzi ati: «Ti wedzi ni ŋwana we Nzambi, tanda ne imanya dzi dze yikwene bila.» 4Zezu akalule nedzi ati: «Batende se Sanguvu ye Umpende.» Ati: «Muutu nde lunga ne bila bitu.» 5Yumana vavu, ye Sata ebapa Zezu ikulu ne ulaka wangu melongo mesi. 6Wangu atanda nedzi ati: «We ni wami itse kaba ukani ne untamvu ŋwe melongo mesi, byangu byesi ni byami, me tuka kaba ne wami itondo. 7Ti wa vʉna mebongo busu vami ne ubondo me, me tse kabe we byesi.» 8Zezu nedzi ati: «Batende se Sanguvu ye Umpende.» Ati: «Wowe itse bondo si Kuŋwu Nzambi ne sadzi yowe itse pika si yedzi mene.» 9Ye Sata ebapa Zezu Zeluzalemi, yedzi esatse wangu kule ŋwanza ŋwe ndaku ye Nzambi atanda nedzi ati: «Ti wedzi ni ŋwana we Nzambi, padzɨme sɨna.» 10Ni batende se Sanguvu ye Umpende ati: «Utsɨna nowe Nzambi aluma betuma bedzi ne ubata we.» 11Bangu betse supa we se meboko me bangu toko mekulu mowe makʉla memanya. 12Zezu akalule nedzi ati: «Batende se Sanguvu ye Umpende.» Ati: «We nde maama Kuŋwu Nzambi wowe.» 13Sata amana maama Zezu se misumvu myesi, yedzi etse ulayi nedzi nzii ne ndili ye Nzambi etanda.
Zezu abanda dzanza dzedzi Ngalilee
14Fudzu ye Umpende ye mana lundise Zezu, yedzi evʉtse Ngalilee. Batu bedze ne uyuka likʉma ledzi se bingundu bye nongo ne Ngalilee. 15Wangu edze ne ulakɨse Iwowe dze Nzambi se mendaku me umbondu, ye batu besi bedze ne ukakɨse wangu.
Batu balewe Zezu Nazaleti
16Zezu atse Nazaleti, ngundu yedzi enene. Vʉsa ve idzundu Zezu anyindzile se ndaku ye umbondu, yangu ni ku yedzi, ye utelime ne untangala Sanguvu ye Umpende. 17Ye bekaba wangu sanguvu ye Ezayi Muutu we Nzambi. Zezu adzuvʉle sanguvu, ayene buma ye batende ati: 18«Fudzu ye Kuŋwu yedzi kule yami,
Wangu ni we metobo me,
ne utandaka be mimvuvu misisli mive,
wangu ni we meluma me
ne utandaka ne bidzi mingenenge ati, Bangu baya ni nyengele,
ne utandaka ne be nde mɨsa ati, bangu betuka yene,
ne utandaka ne be binyokile ati, bangu baya ne singa.
19Ne utandaka ne batu
ayi ni ndili ye beyi bitse yene itondo dze Kuŋwu.»
20Zezu adzuba Sanguvu, avʉtise Sanguvu ne uŋdzanzi, asunda untsitsi, batu besi bedze se ndaku ye umbondu bedze ne mɨsa kule yedzi. 21Zezu atanda ne bangu ati: «Me beyi beme yuka me tangala se Sanguvu ye Umpende, velolo mamvu mamu mayikwe umbu.» 22Batu besi bayene wangu uve, bakima ne mamvu meve medze ne upula se uŋdzumvu ŋwedzi, ni muutu yu, ka ŋwana we Zozefi. 23Zezu atanda ne bangu ati: «Me yiba miti beyi befumba te me ngana ye unsaki, saka we, we mene, beyi betandele me ati, besu bayuka mowe me pika se ngundu ye kapenayumi, pika mangu motu se ngundu yowe mene.» 24Zezu avele tanda ne bangu ati: «Me tanda beyi ni umbu amene, Muutu we Nzambi, batu nde mekidze wangu se ngundu yedzi mene.» 25Me tanda beyi ni umbu, ndili ye Eli Muutu we Nzambi, se ilongo dze Izayeli yedze ne mikwili miyitsi. Ndili mene yangu mbotu, badze bisiwu bisatu ne liyi, mvula nde no, ne pinga ya kwa se ilongo dzesi dze Izayeli. 26Nzambi eke luma Eli kwele ye uŋkwili ŋwe Izayeli, ni wangu awana luma Eli kwele ye uŋkwili ŋwe ngundu ye Salepeta se ilongo dze Sidoni. 27Ndili ye Elizi Muutu we Nzambi, yedze ne batu beyitsi bedze ne bifima se Izayeli, Elizi eke lungise muutu tine motu se Izayeli, ni Elizi alungise Naama we ilongo dze Sili. 28Batu besi bedze se ndaku ye umbondu, beyuka me Zezu edze ne utanda ye bangu besi bekamve nedzi. 29Bangu batelime, bapanza Zezu se ngundu, babapa wangu se kudzi ye bangu betunga ngundu, bangu bafumba linda wangu. 30Ni Zezu asʉta tima ye bangu, yedzi etse.
Zezu asaka muutu wedzi ne umbiti
31Zezu atse Kapenayumi ngundu ye Ngalilee vʉsa ve idzundu, Zezu alakɨse batu. 32Bangu besi bakima nda wangu edze ne ulakɨse, ni Zezu edze ne uwowe ne singa ye Nzambi ekaba wangu. 33Se ndaku ye umbondu, yedze ne muutu motu wedze ne umbiti, wangu awʉla unsima ne singa ati: 34«We Zezu we Nazaleti, yowe ifumba ne besu niyi? We meya ni ne utsala singa ye besu? Me yiba we, we ni umpende ŋwe Nzambi meluma.» 35Zezu atanda ne umbiti ati: «Dzʉba uŋdzumvu, pula.» Ye umbiti ŋwe naŋwule muutu mene busu ve batu besi, ye ŋwangu ŋwe pula, muutu mene eke yukʉve mbozi. 36Batu besi bakima, bawowe tima ye bangu ati: «Ami miwowili ni miza? Apanza mimbiti ye myangu mipula.» 37Ye batu besi bewowe ne kumvu ye Zezu se ilongo dzesi.
Zezu asaka mibedzu miyitsi
38Zezu apula ndaku ye umbondu, atse ndaku ye Simo, akobise utsʉlu ve Simo ve saba ne uŋwaku ve singa. Batu basuŋwule Zezu ne usaka wangu. 39Zezu adondime kule yedzi, akamve ne uŋwaku ye uŋwaku ve siya, ye utsʉlu ve Simo ve telime ne ukaba bangu bila. 40Ne ikolo batu bedze ne mebedzu mesi, babapa bangu kwele ye Zezu, yedzi esatse bangu meboko, ye mibedzu myesi mye lunga. 41Ne mimbiti miyitsi mya pula se batu ne uwʉla misima ati: «We ni Ŋwana we Nzambi.» Ni Zezu abaŋwule bangu asumba bangu ne uwowe ne bangu beyiba ati, wangu ni we Nzambi etobo.
Zezu alakɨse se mendaku me umbondu
42Vʉsa ve seŋwe, Zezu apula se ngundu, atse se buma ye ikanye. Batu batse ne ufumba Zezu, bakobise wangu, ye bangu besumba Zezu ati: «We nde tse.» 43Ni Zezu atanda ne bangu ati: «Uve matse ne utandaka misisili mive mye likʉma le Nzambi se bingundu byoko, Nzambi ameluma me ni utsɨna ne vavu.» 44Ye Zezu etse ne utandaka misisili mive se mendaku me umbondu me Zudee.
Terpilih Sekarang Ini:
Luk 4: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
