Luk 2
2
Nda bedziya Zezu
1Ndili yayu, kani Ogisɨti aluma ne utala batu se ilongo dzesi. 2Yedze ni untalu ŋwe wika. Ndili mene Kɨlinusi edze ni kani we ilongo dze Sili. 3Ye batu besi betse untalu, muutu ne muutu se ngundu ye bedziya wangu. 4Ne Zozefi atelime ngundu ye Nazaleti, se Ngalilee ne utse ngundu ye Betileyemi se Zudee ye bedziya Davidi, ne Zozefi edze we imbisa dze Davidi. 5Zozefi atse bane Maliya witse yikwe ŋwadzi wedzi, yayu betala ne bangu, Maliya edze ne dzimi. 6Ye bangu bedze Betileyemi, ndili ye Maliya ye udziya ya kalwe. 7Maliya adziya ŋwana wedzi we wika we ibaka, wangu avʉngule ŋwana mikanda ayala wangu se batsi ye bibodzi bidza, ne bangu beke kobise buma se ndaku ye bezenze.
Tuma we Nzambi aya tanda misisili mive ne bebati be bibodzi
8Se ngundu mene yangu yotu, yedze ne bebati be bibodzi bedze ne udze se mekʉba ne pinzi, ne ubata bibodzi. 9Tuma we Nzambi aya palikɨse tima ye bangu ne likʉma le Nzambi kwalala, ye bangu beyene bongo amene. 10Tuma we Nzambi ne bangu ati: «Dzikayi yene bongo, me meya ni ye tanda beyi misisili mive, mitse dze itsisa dzineni dze batu besi. 11Velolo se ngundu ye Davidi, badziya beyi unlungisi Kɨlisɨti we Nzambi etobo, wangu ni kuŋwu. 12Yenayi ndimvu ye beyi bitse yimba wangu, beyi betse kobise ŋwana we teketeke bavʉngule mikanda bayala se batsi ye bibodzi bidza.» 13Palɨkise, ye boko betuma beyitsi beyinga ikulu, baya kobise we wika ne uvʉtise Nzambi live ati: 14«Likʉma le Nzambi we kata ikulu amene, ne itavu se senze ne batu bedzi itondo.»
Bebati be bibodzi batse Betileyemi
15Ye betuma be Nzambi bevʉtse ikulu, bebati be bibodzi bawowe tima ye bangu ati: «Tumbayi Betileyemi betse yene mamvu me meya, me Kuŋwu Nzambi ilaka bebe.» 16Bangu batse mesadzi mesadzi, ye bangu bekobise Maliya ne Zozefi ne ŋwana we teketeke, bayala se batsi ye bibodzi bidza. 17Ye bangu beyene wangu, bangu batanda ne batu besi me tuma we Nzambi etanda bangu se ŋwana. 18Batu besi bakima, ne me bebati be bibodzi betanda. 19Ni Maliya edze ne bata mamvu mesi se unlima, ne utsimene uyitsi. 20Ye bebati be bibodzi bevʉtse kwele ye bangu bibata dzimvu dze bibodzi bye bangu, ye bangu betse ne yakwe mimvu ne ukʉmise Nzambi, utsɨna ne me bangu beyene, ne me bangu beyuka: «Ni mesi mesuta si nda tuma we Nzambi etanda besu.»
Baluka ŋwana kumvu
21Vʉsa ve uŋwambi ve dzanga, ye bangu bekwise ŋwana sakwe, baluka ŋwana kumvu ye Zezu. Kumvu ye tuma we Nzambi eluka ŋwana, Maliya asande ne bapa dzimi.
22Ndili ye Zozefi bane Maliya bepika itsɨnda dze Maliya ipula ndaku ye vali nda bitsɨla bye Moyizi eluma bangu pika ya dzanga, ye Maliya bane Zozefi bebapa ŋwana Zeluzalemi, ne utse laka ne kuŋwu. 23Ni batende se bitsɨla bye Kuŋwu ati: «Ŋwana we wika tadze ibaka, badzika wangu kwele ne sadzi ye Kuŋwu.» 24Ye bivele kaba ne mekunda mole, tiya wata vavu baana be bembinga bole, ne upika nda bitsɨla bye kuŋwu eluma bangu pika.
25Se Zeluzalemi, yedze ne muutu we kumvu Simeyo, wangu edze ni muutu we umve wedze ne ukuuna Nzambi, wangu edze ne ubuka wiya lungise Izayeli, Fudzu ye Umpende yedze nedzi. 26Fudzu ye Umpende, ye tanda nedzi ati: «We nde waa, ti we nde yene Kɨlisɨti we Kuŋwu eluma.» 27Ye Fudzu ye Umpende ye luma Simeyo se ndaku ye Nzambi, ndili mene mbotu yali ye Zezu ya bapa wangu, ne utse pika bitsɨla bye Kuŋwu, nda beluma bangu pika. 28Simeyo aboko ŋwana se meboko medzi avʉtise Nzambi live ati:
29«Kuŋwu, yayu we tuka dzika uŋdzanzi wowe awaa se itavu nda we tanda.
30Mɨsa mami mayene unlungisi wowe meluma.
31Unlungisi wowe eyebise busu ve mekaka mesi.
32Wangu atse dze ni ibamvu dzitse yibise we se melongo mesi, wangu ni witse kaba batu bowe be Izayeli likʉma.»
Simeyo atanda misisili mive
33Tata ne mama we Zezu, bakima ne me Simeyo edze ne utanda kule Zezu. 34Simeyo abondo ne bangu ati: «Nzambi abata beyi.» Wangu ne Maliya mama we Zezu ati: «Utsɨna ne ŋwana wowe batu be Izayeli beyitsi betse naŋwe, boko betse telime, wangu atse dze ni ndimvu mbotu ye Nzambi, ni batu betse lewe wangu, 35ye bitse yiba metsimini me se milima mye batu beyitsi. We mama wedzi, unlima ŋwowe ŋwetse yene ubi, nda we beme tsʉba pusezulu.»
Ana avʉtise Nzambi live
36Yedze ne ŋwatu we kumvu Ana, ŋwana we Fanuyele we ikaka dze Azele, wangu ni Muutu we Nzambi, wangu edze adzʉna. Ana etse ibala ni asaka ngondo, bane unlumi wedzi badze bisiwu untsami. 37Yedzi evuka uŋkwili, wangu edze ne bisiwu meku ŋwambi ne bisiwu binayi, Ana nde teme ndaku ye Nzambi, adzanza ne musa ne pinzi, ne ukuta utsɨlu ve nzala ne ubondo. 38Ndili mene mbotu, ne Ana akalwe ndaku ye Nzambi, yedzi evʉtise Nzambi live, Ana avele wowe mamvu me se ŋwana ne batu bedze ne ubuka wangu ati: «Nzambi alungise Zeluzalemi.»
Zezu anene Nazaleti
39Yali ye Zezu yemana pika bitsɨla byesi bye Kuŋwu eluma bangu pika, ye bangu bevʉtse ngundu ye Nazaleti se Ngalilee kwele ye bangu bidze. 40Ye ŋwana elungwene ne singa yesi, wangu edze ne ukani ne polo ye Nzambi yedze nedzi.
Zezu adzi ne bisiwu iku ne byole
41Yali ye Zezu yedze ne utse bisiwu byesi Zeluzalemi ne utse pika itsɨnda dze bangu bepula se uyika. 42Ye Zezu ebomo bisiwu iku ne byole, ye yali yedzi ye bapa wangu itsɨnda Zeluzalemi nda bangu bedze ne upika ne kala. 43Bemana itsɨnda, bangu bavʉtse ye Zezu evuka Zeluzalemi, ni bangu beke yiba. 44Bangu beyiba nati, ŋwana adzi tima ye batu bedze ne ulanda kone bangu. Bangu balanda unyindile ŋwesi, ye bangu befumba ŋwana tima ye yali ne bembatsi. 45Nda bangu beke yene ŋwana, bangu bavʉtse Zeluzalemi ne utse ne ufumba wangu. 46Vʉsa ve unsatu, ye bangu beyene Zezu se ndaku ye Nzambi, untsitsi, tima ye belakɨsi be iwowe dze Nzambi. Wangu edze ne uyuka ne ukaba bangu midzitsi. 47Besi bedze ne uyuka wangu, bakima ne utsengu vedzi edze ne ukalule midzitsi. 48Ye yali yedzi ye yene wangu, bangu bakima. Mama wedzi nedzi ati: «A ŋwana wami, yowe me pika besu vavu niyi? Besu ne tata wowe beme fumba we ne bayi yesi.» 49Ye Zezu ekalule ne yali yedzi ati: «Ye beyi bifumba me niyi? Beyi nde yiba ati uve ma dze se ndaku ye Tata wami.» 50Ni bangu beke yuka medzi edze ne utanda bangu. 51Ye Zezu evʉtse bane yali yedzi Nazaleti, Zezu edze ne ukuuna yali yedzi. Mama wedzi edze ne ubata mamvu mamu se unlima ŋwedzi. 52Zezu anene ne ukani vesi ne Nzambi ne batu, bayene wangu uve.
Terpilih Sekarang Ini:
Luk 2: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
